ااه من الحب وعذابه ....قصة رومانسييييية 100%

[الحياة حلوة بس نفهمها]

اروع ما يكون هي قصتك الجميلة يالزنبقة
قصة فاتنة ومليئة بالاثارة
وانت العسل يا سكر ويا احلى صديقة وزنبقة في الدنيا
تحياتي
رمضان كريم وفل وياسمين علينا وعلى جميع المسلمين

[الزنبقة السوداء]

المشاركة الأصلية كتبت بواسطة الحياة حلوة بس نفهمها

اروع ما يكون هي قصتك الجميلة يالزنبقة
قصة فاتنة ومليئة بالاثارة
وانت العسل يا سكر ويا احلى صديقة وزنبقة في الدنيا
تحياتي
رمضان كريم وفل وياسمين علينا وعلى جميع المسلمين

ولك تسلميلي زوقك العسل ....
وحنزل لك الحين جزئبن لخاطر عيونك ...وردك الحلو ...
وتشرفنا ....

[الزنبقة السوداء]

الجزء الرابع عشر)))))الجزء الرابع عشر)))))
الساعه 8 بالليل في بيت بوحمد وكل العوايل راح تيي عشان تهني حمد بسلامه ييته ..
حمد كان قاعد بالصالة يوم وصلت عايلة عمه بوحمدان مع بويعقوب ..
الوحيد اللى ماكان معاهم هو يعقوب .. لأنه إتصل وقال إنه بيتأخر شوي بس بييي ..
نزلو كلهم وسارة راحت عند سمر اللي كانت ترتجف من الخوف والتوتر وتحس إنها بترجع ((أكرمكم الله))
وناصر وراشد طايحين فيها غشمرة وهي تنادي أبوها عشان يشوف لها صرفة وياهم ..
دخلو داخل والحشرة كانت كبيرة .. حمد كان واقف يم الباب ويسلم على عمامه وعيال عمه ..
والبنات راحو عند أم حمد يتشكرونها سلامة ولدها ..
ناصر أول ماشاف حمد حضنه بقوة : حمووووووووووووود وينك إنت ياخي ..
حمد : هههههههههههههههه كاني ياحبيب قلبي هني أنتظرك ..
ناصر يتدلع مثل البنات : جذاب .. لو أصلا تنتظرني جان سألت عني يوم بالمطار .. مو قابض لي تظن بهالسبال ..
بوحمدان : ناصر ..
ناصر : شنو يوبا .. الخيانة جدام عينك ..
مشعل : إنت أصلا لا تتكلم يالقزم .. موكفاية قزم وبعد لسانك طويل!!
ناصر بكآبة : وآنه أقول طولي وين رايح .. أثاريه قابع بهاللسان ..
حمد والكل : ههههههههههههههههههههههههههههههههههه ..
حمد : ولا يهمك ياولد عمي إنتظر .. يوم آنه كبرك كنت بطولك .. بس رحت أمريكا طولت على طولي ..
ناصر يطالع أبوه بفرحة : يله يوبا قص التذكرة بروح أمريكا ..
بوحمدان : إنت قبل إفلح بالثانوية بعدين فكر بأمريكا ..
الكل إلا ناصر : ههههههههههههههههههههههههههههههههههه ..
ناصر : أصلا النجاح بيد الله سبحانه وتعالى مو بيد البشر ..
وراحو كلهم للصالة عن الوقفة على الباب .. وهني سمر قلبها قام يدق بقوة وهي منزلة عينها بالأرض ماتقدر تشوف ولد عمها ..
وليد كان واقف يم سمر وهو يبسبس لها : كاهو حمد روحي سلمي عليه ..
سمر : وليدو جب زين .. وإنطم ولا تتكلم .. تراني بفقد أعصابي .. إسكت واللي يعافيك ..
وليد ضحك عليها وسارة تكلمت وياها : سمر يله سلمي على حمد!!
سمر توها بترد على سارة ويه حمد صوب البنات ..
حمد : الله .. الحين منو اللي راد من السفر آنه ولا إنتو؟!
سمر رفعت عينها لولد عمه وبلعت لسانها ماتدري شتقول ..
وسارة شافتها وحاولت تنقذ الوضع : هلا هلا حمد .. حياك الله .. والحمد لله على السلامة ..
حمد إلتفت حق سارة .. ومن سمعها تتكلم وقلبه يدق .. الصوت مو غريب عليه .. صوت أحد يعرفه ..
حمد : إنتي سارة مو؟!
سارة بعد حست إن الصوت موغريب عليها : إي نعم ..
تطالعو بس حمد نزل عيونه يسلم على سمر : وإنتي على الرغم من هالتنورة .. سمر الشيطانة مو ؟!
قالها بكل حنية الطفولة والعواطف الرائعة اللي ماقصر عليها بها يوم هي صغيرة ..
وخلا عيونها تلمع بدموع الذكريات : إي .. آنه ..
حمد وهو يبتسم إبتسامة حلوة : شلونج سمر؟!
سمر وقلبها يدق ولسانها مايقوى يتكلم : بخير .. الحم .. الحم .. الحمد لله على السلامة ..
حمد يتفحصها بعيونها : لا يكون قلبتي صج بنت وآنه مادري!!
ضحكت سمر وسارة على كلامه وتدخل وليد : أصلا سمر لا تنورة ولا فستان يشيل لسانها .. بس هي يازعم مستحية الحين ..
ضحك الكل على خزة سمر حق وليد اللي قام يطالع أخوه بالنجدة ..
حمد : كافي كافي .. سمر ماتتغير .. أصيلة .. مو سمر؟!
سمر وهي تطالع وليد : أكيد .. واللي عنده شك يتكلم ..
ورد الضحك ويه نصور : شعليه الضحك .. ضحكونا وياكم ..
سمر : شنو داخل مسرحية إنت!!
ناصر : مسرحية المسترجلة .. تعرفينها إختي؟!
سمر نست حالها : نصور!!
حمد قاطعها : يله عاد ناصر ووليد .. إستوو رياييل وخلو بنت عمي لحالها لا بتضطرون إنكم تواجهوني قبل ..
سمر ماصدقت حالها يوم سمعت ..
ناصر : الله وأمره .. أقول قرندايزر هالإسلوب بعد من أمريكا؟!
حمد وهو يلوي إذن ناصر : هالإسلوب إسلوب العرب يا بولسانين ..
وضحك الكل : هههههههههههههههههههههههههههههههه ..

(((((الجزء الخامس عشر)))))
يعقوب مثل ماقلت لكم آخر من وصل ..
ويوم وصل وقف عند سيارته قبل لا يدخل وهو يفكر .. ياترى شلون حمد الحين .. مثل قبل ..
المثالي اللي ما يعيبه شي .. اللي دايم قدر يسرق القلوب حتى قلب سمر ..
مايندرى .. وقبل لايدخل دز مسج حق سمر يقول ((إكتشفت إن لك وجهين ..
معليه هاذي حقيقتك .. مرة قمر يسطع .. ومرة بدر يلمع)) ..
دخل يعقوب وعيونه تدور سمر ..
ويوم مالقاها إلتفت حق ولد عمه حمد .. أول ماشافه نسى الكره اللي دوم وجهه حق حمد وحضنه بقوة وباسه ..
يعقوب : الحمد لله على السلامة يابوسليمان ..
حمد : الله يسلمك يابويوسف .. والله محد وحشني كثر ماوحشتني إنت يالغالي ..
يعقوب مستغرب : الله يخليك ياولد عمي .. والله نفس الشعور .. شخبارك بعد؟!
حمد : مرتاح وفرحان حييييل ياولد عمي .. ماتتصور شكثر آنه مستانس لأني رديت حق هلي وناسي ..
يعقوب : الله يخليك يالغالي وإحنه بعد فقدناك وايد ..
طول ووسامه وأخلاق .. هي الكلمات اللي وصف يعقوب حمد فيها ..
حتى إنه حس بالنقصان جدام طيبة ولد عمه اللى كان حاقد عليه من دون سبب ..
وفكر يمكن هاذي الطيبة هي اللي محببة الناس فيه ..
الكل سلم على يعقوب إلا سمر اللي كانت مشغولة تقر المسج اللي وصلها من يعقوب أو ((سعد))
مثل ماهي فاكرة .. ويوم رفعت عينها تشوف سبب الحشرة هاذي دق قلبها للي شافته ..
يعقوب كان قاعد وياالشباب وهو بكامل أناقته .. معروف عن يعقوب وسامته وكشخته ..
بس اليوم كان وسيم بشكل مضاعف عن كل مرة .. وسمر لأول مرة تشوفه بهاذي الصورة ..
واللي يشوفه يقول وسامته وكشخته كانه تحدي .. بس شهدت إن لومنو يوقف ويايعقوب بيكون يعقوب هو الغالب ..
حس يعقوب للعيون اللي تراقبه بعجب وطالعها ... طار قلبه من كثر ماكانت بنت عمه حلوة ..
اليوم على غير عوايدها .. أحلى وأحلى .. والله إنج كبرتي يا سمور وصرتي أحلى البنات ..
حتى سارة الأنيقة غلبتيها بهالكشخة .. ربي يخليج لي .. بس لي آنا بروحي ..
سمر نزلت عينها يوم طالعها ولد عمها بحيا .. أول مرة تستحي من يعقوب هالشكل ..
هي تعجبت من حالها .. بس اليوم يعقوب شكله غريب وغير عن كل مرة ..
ويوم رفعت عينها لقته للحين يطالعها بس بإبتسامة ولا أحلى .. وإلتفت حق سوالف عيال عمه عنها ..
سمر ضاعت بحيرة .. شفيه ولد عمها اليوم يوزع إبتسامات والطيبه ماخذته .. دوم مويوم ياربي ..
حمدان عيونه مافارقت بنت عمه سارة اللي مو معبرته بنظرة .. بس بين حمدان وبين نفسه أحسن .. عشان يطالعها براحته ..
ونصور ومشعل يالسين بزاوية طاقينها سوالف وضحك على أخوهم العاشق .. وراحو ييلسون يمه من دون إنتباهه ..
ناصر : شنو هذا حمدان .. إنت ماتستحي؟!
إنتبه حمدان بخرعة : بسم الله .. إنت من وين تطلع يا اليني؟!
مشعل : ههههههههه .. إنت اللي ماتخيل على ويهك .. طايح قز في بنت عمنا يالأربد .. صج ماتستحي ..
حمدان : ها مشعل .. يود لسانك لاقطعه وأوكله هالزطي أخوك ... والله إنها طالت وشمخت بعد!!
ناصر : لا وتلمعت بعد ..
ناصر ومشعل : ههههههههههههههههههههههههههه ..
حمدان : قومو الحين لاتطق براسي ولاخلي أبوي يوافق على الحداق ..
ناصر للحين يضحك و مشعل اللي إنصدم : الله عليك ياخوي .. إنت ليش جذي ما تحب إلا نفسك؟!
ناصر : ماعليك منه هذا .. تهددنا بالحداق.. آنه إللي أروح وأقول حق سارو عنك أخليها تفشلك ..
حمدان : تخسي يانصور الصرصور تتحرك من مكانك وآنه اللي أوريك ..
ناصر وهو يتعنتر على أخوه : إي أقول لك تهديد بتهديد ..
مشعل يقلد على حركات أخوه ناصر : مثل ماقال بو بدر ..
حمدان يطالعهم بإستخفاف : والله وإنكم تتعنترون .. يله زين قلبو ويوهكم يله ..
إلتفت حمد ويعقوب حق حشرة حمدان وإخوانه ..
يعقوب : إنتو وين ماالله يقطكم تتناجرون!! خفو شوي فشلتونا!!
ناصر : الله عليك إنت يا زير زمانك .. ماتقول لي وينك متأخر للحين!!
يعقوب : مرتي ولادري عشان تسألني؟!
ناصر : لا بس ماحب افكر إنك كنت تستانس وآنه مو وياك ..
يعقوب : موت من الحرة ولا بقول لك ..
ناصر : بنشوف .. الإسبوع الياي سمور بتكشفك جدام الكل مثل كل مرة تسويها ..
حمد : ههههههههههههههههههههه شدراها سمر؟!
يعقوب : لا تسأل ياحمد .. لأني مادري ..
الكل يضحك ويعقوب معاهم ..
سمر وسارة يالسين مع بعض ..
ورغد يالسة يمهم وتطالعهم وهي مسبهة .. كل ما تناديها سمر عشان تقوم ماتطيعها ليما ظلو يتكلمون بالسر ..
بس رغد شيطانة وأول ماسمعت غسم حمد بالسالفة راحت صوب حمد وهي تناديه : حمد حمد ..
حمد : لبيه عيون حمد ..
رغد : سارو وسمور القرفة يتكلمون عنك ..
يعقوب تغيرت ألوانه.. وحمد اللي إنحرج من إخته : يعقرون علينا ليش إنا مانعطيهم ويه ..
رغد : لا لا لا لا .. سمر تقول حق سارة يحليله حمد إحلو بأمريكا وسارة تقول لها إي والله وايد ..
يعقوب إفتر مخه ..
وطالع رغد بنظرة كلها حقد وإجرام .. وحمد حس حق غضب يعقوب وكلم رغد بجدية : عيب رغد حبيبتي ..
مايقولون جذي .. مو كل شي تسمعينه تقولينه .. وآخر مرة أسمع منج هالكلام زين ..
رغد شوي وتبجي من لهجة أخوها وياها .. وحمد قلبه عوره على إخته .. بس لأنها ياهل لازم تتعلم إن هالحركات عيب ..
يعقوب غير من شكله اللي ظهر كل مشاعره على ويهه وقال : ماعليه ياحمد رغودة إلا ياهل .. ماتدري شتقول ..
ماصعب هالكلمات على يعقوب وهو يقولها لأنه يدري اللي قالته رغد هو الصج ..
حمد بعد ماقال لرغد تروح تيلس عند أمهم :
لا ياخوي .. لازم نعلم اليهال إن عيب هالحركات .. نسيت يوم إحنه صغار شلون عانينا ..
يعقوب من غير نفس : إي والله ..
حمد : السموحة ولد العم ..
يعقوب : لاعادي .. ياهل ماناخذ على كلامها ..
إبتسم حمد بس من داخله عرف إن يعقوب متضايج حيييييييييل من اللي قالته رغد .. بس ليش .. مايدري ..
على العشا الجو كان ولا أروع .. حمد كان يسرق النظرات وهو يطالع بنات عمه ..
ويعقوب محد حاس فيه ولا جاس بالأكل لأنه كان مهموم حيل ..
وهو يراقب بنت عمه اللي كانت مشغولة بالسوالف والنجرة ومطالع حمد ..
وحمدان نفس الشي .. مشغول بمطالع سارة .. وناصر ومشعل مومخلينه في حاله
...وراشد وناصر طايحين تلعوز بوليد اللي معروف عنه هدوءه وعدم مبالاته حق حركات عيال عمامه ..
بعد العشا طلعو كلهم بالعريش اللي من ورى بيت بوحمد .. ويلس ناصر حذال مشعل وراشد وقعدو يغنون أحلى الأغاني ..
أول ما بدو بدو بالأغاني الوطنية عشان خاطر حمد اللي يضحك على حركات عيال عمه ورقلتهم ..
سمر وسارة يمثلون ادوار المغنيات مع إن الحيا ماخذ سمر وسارة .. بس حاولو إنهم يشاركون بالجو بعد ماضايجوهم الشباب وايد ..
وحمدان كان يالس من بعيد يكتب أشعار على سارة وهو يقول في خاطره ((بسمعها إياهم بأيام الخطوبة)) ..
يعقوب اللي كان بعالم ثاني ..
كلام رغد خلاه يتكدر ويتضايج حيل ويحس حاله مخنوق ويبي يطلع من بيت عمه بأي صورة .. بس شلون مايدري ..
سمر وهي تضحك من السوالف اللي بيناتهم إلتفتت حق يعقوب
اللي كان يطالع الأرض وحواجبه معقدة من كثر الكدر والهم .. ضاج قلبها .. مهما كان هذا ولد عمها ..
سمر بصوت واطي : سارو ..
سارة : ههههههههههههههههه لبيه ..
سمر : سارة روحي شوفي شفي يعقوب .. متضايج حيل شكله ..
سارة : شدراج إنه متضايج؟!
سمر : شوفيه مبوز ومايشاركنا الجو!!
سارة وهي تطالع أخوها : أي والله خانت حيلي أخوي .. بروح أشوفه ..
وراحت سارة تيلس حذال أخوها وسمر ردت حق الجو وياعيال عمها وإخوانها ..
ولاحظت حمد يطالعها وهو يبتسم .. إستحت وضحكت وهي تنزل راسها ..
يعقوب للأسف إلتفت حق الإبتسامة الطايرة من سمر وزفر زفرة قوية من خاطر .. وشوي بيقوم إلا وسارة يلست يمه ..
سارة : الله بالخير أخوي ..
يعقوب من غير نفس : الله بالنور ..
سارة : شفيك بويوسف؟َ حد كدرك؟!
يعقوب يكلمها من دون مايطالعها : لا ..
سارة حست بكدر أ خوها بصوته : إنزين تعبان؟!
يعقوب : لا ..
سارة : عيل حد ضايجك بكلمة ولا شي؟!
يعقوب بضيج صدر : أوووووووف سارو .. لا تقعدين تتسأليني .. مالي خلقج موليه ..
سارة حزنت وقامت عنه : برايك ..
تووها بتمشي وناداها يعقوب : سارة ..
سارة : لبيه ..
يعقوب : روحي إستأذني لي من عند الوالدة عشان أترخص ..
سارة : ليش على وين تو الناس!!
يعقوب طالع إخته وحقده كله بعيونه : ولج عين إنتي وبنت عمج تسألون!! سوي اللي قلت لج عليه وكافي أسئلة ..
سارة بحزن : إن شالله ..
وراحت .. وسمر حست لصوت يعقوب على سارة وطالعته بإحتقار وهو رد النظرة بنظرة قاتلة خلتها توسع عينها على وسعها ..
هذا يصير آدمي . .بو طبيع ما ييوز عن طبعه .. صج خسيس .. وإلتفتت عنه ..
رودت له سارة : أمي تقول لك على راحتك ..
يعقوب قام وراح صوب ولد عمه : أستأذن آنه ياحمد .. مضطر أمشي ..
الكل تكلم بكلام متفرق : وين ياولد العم؟! تو الناس .. بدري .. وين ياخي؟!
حمد : على وين ياولد عمي؟! تو الناس .. ماستانسنا وياك!!
يعقوب : إن شاء الله الأيام بيناتنا .. ولا معزم تسافر مرة ثانية؟!
حمد : هههههههههههههههه لا لا .. توبة ونوبة ماعيدها ..
يعقوب من غير نفس : هههههههههههههههههه برايك .. ولو آنه مكانك إنحشت من هني ..
حمد مافهم ولد عمه يمزح ولا يقول كلام الخاطر بس بسخرية ..
يعقوب : يله شباب .. من رخصتكم ..
راشد : وين يايعقوب؟! والله ماتحلى القعدة بدونك ..
يعقوب : وإنت شكو!! إنت بتروح تنخمد بعدين ليييييه الظهر .. آنه ريال وراي دوام ولازم أرتاح ..
ناصر : إي إي خلوه يروح يرتاح .. وايد مشغول ولد عمي ..
مو قرندايزر هو يروح ويي .. أقول لك ولد عمي .. للبيت مباشرة .. لا مني ولا مناك .. مفهوم؟!
يعقوب شوي ويحط حرته في ولد عمه بس هدى باله شوي وقال : مو شغلك إنت ..
ناصر يقول حق مشعل بصوت واطي : كل تبن زين ههههههههههههههههههه ..
مشعل ضحك ويارشود ونصور على مزاج يعقوب الزفت ..
حمد : بالسلامة ياولد عمي ..
يعقوب : الله يسلمك ..
وترخص من الشباب ومشى من دون مايعبر سمر بنظرة ..
سمر : سارو شفيه أخوج شقارصه؟!
سارو بحزن : والله مادري .. ناجرني وخلاني بيزة ماسوى ..
سمر : شقال!!
سارة : ماقال شي .. بس قال لي لج عين إنتي وبنت عمج؟!
سمر إستعجبت : بنت عمج!! شسوينا إحنه؟!
سارة : مادري مادري سمر ..
سمر ضاعت .. إنقهرت .. شفيه هذا يزعل روحه ويحط الحرة عليها هي وسارة .. والله ماله حق .. وقامت سمر ..
سارة : على وين ..
سمر ماردت عليها وراحت صوب ممشى السيارات تلحق على يعقوب ..
سمر بحمق : يعقوب .. يعقوبوووووو ..
يعقوب توه بيدخل السيارة بس إنتبه لصوت يناديه وإلتفت .. أثاريها سمر .. وكمل دربه ..
سمر : يعقوب وقف ..
يعقوب ما قدر يحقر بنت عمه ونطرها وهو قاعد بالسيارة .. ووقفت سمر وهي تطالعه بحمق وإحتقار ..
سمر : شفيك إنت شقارصك؟1! ليش تتبلى علي وعلى سارو؟!
يعقوب خلاص فقد أعصابه وطلع من السيارة وخرع سمر بقومته وخلاها مصدومة ..
يعقوب : أتبلى عليج!! إنتي صج ماتستحين .. قبل لا تتكلمين عرفي عن شنو آنه أتكلم ..
سمر : يعني شنو!! مثل سوالفك البايخة اللي مالها معنى .. دايم تتبلى .. أصلا إنت جذي من يوم ما آنه وسارو بدينا نترافج!!
يعقوب : لأني كنت أشك بصداقتكم .. والحين شكي تأكد ..
سمر : والله .. نورني يابو المعرفة؟!
يعقوب توه بيقول اللي قالته رغد بس تصرفه هذا يعتبر منتهى التناقض .. وهو معروف بشخصيته إنه صاحب موقف واحد وسكت ..
سمر : ماتتكلم!!
يعقوب يطالعها من غير نفس .. ولأول مرة : قلبي ويهج ..
وتوه بيدخل السيارة وسحبته سمر من إيده بكل جرأة .. وسحب يده من يدها وهي متعجبة من حالها .. لكن هم واقفة مكانها بقوة ..
سمر : اليوم لأول مرة بحياتي آنه قررت شي مخالف عنك .. حسبتك آدمي مثل خلق الله لكن إنت ماتستاهل الراي الزين عن نفسك ..
إسمح لي .. إنت كنت حقير .. والحين حقير .. وبتظل حقير ..
سمر خلصت كلامها وهي ترتجف .. آنه ليش قلت جذي!! يعقوب طالعها بنظرات كلها ألم وعذاب بس مارد عليها ..
وكل اللي قاله وحطمها فيه هو : ما قصرتي .. وركب سيارته ورااااااااااااااح ..
سمر ظلت مكانها ترتجف من اللي قالته وهي متحطمه معنويا ..
ليش قالت جذي .. مو من حقها .. بس مهما كان هو اللي بغى جذي .. هو المسؤول ..
ردت سمر من مكام مايت وهي حاسه حالها مليانة هموم ..
وظلت تمشي وراسها بالأرض وهي تسمع الأغنية اللي يغنيها عبدالمجيد عبدالله بصوته الحلو ((تنتظر كلمة أحبك ..
شايفك مشغول فيها .. كل شي بوقته حلو .. ليش مستعجل عليها)).. زقعدت سمر مكانها وسارة تطالعها بإستغراب ..
سارة : سمر حبيبتي شفيج؟!
سمر : ..........
سارة : سمر .. سمور حبيبتي شفيج؟!
سمر بصوت مليان حزن وهي تتصنع الضحكة : ولا شي ..
سارة مو مصدقتها : متأكدة؟!
سمر تحط يدها بيد بنت عمها : إي ..
وإبتسمت سارة لها وردت حق أغنيه عبدالمجيد .. بس سمر ردت حق همومها ونظرات يعقوب لها ..
رفعت عينها اللي تلمع بالدموع وشافت حمد يطالعها وهو متسائل عن اللي فيها .. نستها نظرة حمد كل شي وقلبها قام يدق ..
ضحكت له وهو شكله تطمن عليها وإبتسم .. وردت له الإبتسامة بنفسها .. بس أول ماشال عينه عنها ..
ردت سمر بأفكارها حق ولد عمها يعقوب .. وماتدري ليش حست إنها تبي تكلم سعد بهالحزة ..
ناصر قطع أفكار سمر وهو يهديها هالأغنية :
أهدي أغنيتي الياية حق إختي اللي ماشالله عليها تحولت من مسترجلة الى أحلى بنوتة بالكويت ..
سمر إبتسمت حق أخوها ويلست تتسمع الأغنيه وهي مو ملاحظة غياب بنت عمها عنها ..
ناصر : إنتي حلوة إنتي حلوة .. إنتي أحلى ملاك ..
سارة كانت قاعدة تغني وياهم يوم دق تلفونها وشافت رقم خالد المحلي متصل فيها ..
قامت على طولها بعيد عن الفوضى وراحت عند سيارتها عشان تتكلم على راحتها وياحبيبها ..
خالد : مساء النور ..
سارة بفرحه كبيرة نستها كلام أخوها : هلا والله ..
خالد : شخباره قلبي؟!
سارة بدلال : للحين يدق ..
خالد : شيقول؟!
سارة بدلال أكبر : مريم مريم مريم ..
خالد : شاطرة ..
وضحكو إثنيناتهم على ميهلهم ..
خالد : وينج إنتي الحين؟!
سارة جذبت عليه : بالبيت .. وإنت؟!
خالد : يالس وياربعي بالديوانية .. خبرج إشتاقو لي ..
سارة بدلع : بس مو أكثر مني ..
خالد : متأكدة؟!
سارة : كل التاكيد ..
وبعد صمت ..
خالد : أحبج مريم ..
سارة : وآنه بعد ياخالد ..
خالد : الحين آنه بخليج .. بروح لربعي .. مايصير أخليهم حبيبتي ..
سارة : براحتك حبيبي .. تصبح على خير ..
خالد : إي صج .. هذا اللي حبيت أسألج عنه ..
سارة بإهتمام : شنو؟!
خالد : ممكن اليوم تصبحين على السبت وياي؟!
سارة : ههههههههههههههههههه .. بس هذا طلبك!! ماطلبت ياعيون مريم ..
خالد : هههههههههههههههههههه .. عساني مانحرم منج قولي آمين ..
سارة : يارب العالمين ..
خالد : أخليج الحين حبيبتي ..
سارة : بنتظرك يابعد روحي ..
خالد : رقدي وآنه بوقظج ..
سارة : إن قعدت ..
خالد : تتحديني؟!
سارة بدلع : إي أتحداك ..
خالد : بنشوف ..
سارة : أوكي ..
خالد : يله أخليج حبيبتي .. باي ..
سارة : باي حبيبي ..
طووووووووووووووووووووووووووووووووووط
سارة باست التلفون بعد ماسكر خالد وهي تقول : باي ياأحلى حبيب بالدنيا .. باااااااااااااااااي ..
طلعت سارة من السيارة وراحت عند العريش ويلست مكانها ورد من بعدها حمد ولد عمها اللي تلقائيا طالعها بعيونه وهي طالعته بعد ..
بس بكل براءة على الرغم من العواطف اللي تملكتها وهي تطالع بعيونه ..
حمد يقول في خاطره : حلوة .. بس حبيبتي أحلى .. وسارة تقول في خاطرها : وايد وسيم ..
بس اخليه حق بنت عمي .. مالي إلا بو وليد .. وكملت السهرة والكل رد بيته ..
وأول مادخلت سارة البيت حبت أمها وراحت مباشرة لغرفتها .. فتحت الباب شافت أخوها يعقوب فاتح باب البلكون
وقاعد هناك ومبين إنه مانتبه لدخلتها .. بس إلتفت على صوتها اللي ناداه بكل إهتمام : يعقوب!!
وطلع من البلكون وصدمها شكله ..
يعقوب كان يبجي ودموع من خاطره تسري على خدوده من دون توقف ..
وأول ماقربت سارة صوبه إنتفض وطلع من الغرفة بدون أي كلمة ..

[شجن العراقيه]

وين التكمله ليش صالي ساعه اقره

[الحياة حلوة بس نفهمها]

ّرائعة

[الزنبقة السوداء]

المشاركة الأصلية كتبت بواسطة شجن العراقيه

وين التكمله ليش صالي ساعه اقره

يا شجن العراقية نورتي قصتي وان شاء الله لخاطر عيونك انتي والباقي
بنزل اجزاء ولا تزعلو ...واصلا انا ما ابغى غير ردودكم الحلوة ...

[الزنبقة السوداء]

المشاركة الأصلية كتبت بواسطة الحياة حلوة بس نفهمها

ّرائعة

تسلمي حبيبة ...
وبنزل الحين كم جزو لاجلكم ...

[الزنبقة السوداء]

(((((الجزء السادس عشر)))))
قعدت سارة باليوم الثاني بوقت متأخر .. صبحت على اليوم ويا خالد ..
بس مانامت .. ظلت تفكر بأخوها اللي إستعجبت من موقفه الغامض وياها .. بس ماحبت تتدخل في شؤونه ..
حزة اللي يبي يتكلم بتكون موجودة عشان تسمعه .. ماتبي تغصبه .. وآخر شي قامت وغسلت ونزلت تفطر ولو إنه حزة الغدا ..
أم يعقوب : صح النوم ..
سارة وهي تبوس راس أمها : الله يعافيج ..
أم يعقوب : وينج إنتي؟! خلصتي نوم الكويت كلها .. خمدت عليج طوفة سارووووو ..
بدخلة راشد البيت سارة تنقرشت في أخوها :
لا يمة .. أصلا راسي تصدع من صوت رشود أخوي وهو يخرب أغنيه عبد المجيد عبدالله ..
راشد بتكبر : الله أكبر .. يسلم لي صوتج ياسوبر ستار سارة .. إنتي حصلي حلاة صوتي بالكويت بعدين تكلمي وياويهج ..
سارة : لا لا بوحمني .. مو قصدي .. آنه أتغشمر .. شفيك ماتشد!!
راشد : إلا بصوتي يابنت نعمة ..
أم يعقوب : ياااااااااااروح نعمة ..
راشد : يله يمة .. آنه بروح أنام .. تعبان حييييييييييييييييل من سهرة البارح ..
سارة : ليش إنتو مارديتو ويانا؟!
راشد : وين الواحد يرتاح ونصور ولد عمج طاقة براسه الساعة 1 يروح الشاليه!!
سارة : هههههههههههههه .. الله عليه نصور .. طاقة بشرية ..
رشود وهو يتثاوب : ماعطلكم .. بااااااااااااااي ..
أم يعقوب : نوم العوافي ..
راشد باس أمه على جبينها : الله يعافيج ياأحلى مامي بالدنيا ..
سارة : الله والمامي ..
طقها على راسها وراح لغرفته ..
سمر كانت رايحة في سابع نومه من بعد ليلة أمس .. واللي صار بينها وبين يعقوب حسسها بالدنيا وثقلها على راسها ..
وأول ماإنبطحت نامت بثيابها ووعت الفير .. ومامداها تغير قامت إنبطحت مرة ثانيهة وكملت نومها ..
صحت من النوم الساعة 11 ونص بعد ماناداها أخوها حمدان ..
وطلعت له وهي للحين النومة في عيونها .. بس مابغت إنه يناجرها ورضخت ..
سمر : نعم .. آمر .. تدلل ياولد ضاري ونجاة ..
حمدان : بل بل بل عليج .. شهالمزاج!!
سمر : بعد مقعدني من نومي وإنت تدري إني رديت البيت بوقت متأخر .. شتتوقع!!
حمدان : هاااااااااه .. إنتي لسانج موكأنه طولان زيادة؟!
سمر مابغت نجرة أكثر وياأخوها : نعم .. أي خدمة حمدان؟!
حمدان : إي جذي الواحد يقدر يتكلم ويطلع اللي في قلبه ..
سمر في خاطرها ((إنت في جثتك هاذي مكان حق الكلام)) ..
حمدان وهو يطالع الأرض : سمر .. آنه بقول لج شي ..
سمر تنتظره يتكلم : شنو؟!
حمدان : بس مابي الكلام يطلع من بيننا .. ولاحد يعرفه ..
سمر : متأكد؟!
حمدان بإستغراب : ليش؟!
سمر وهي تضحك : ولين بغيت أنكت حق ربعي بسوالفك .. ماعليه أطري السالفة هاذي؟!
حمدان بعصبية : قومي ذلفي زين .. إنتي ويه أسرار إنتي؟! الشرهة علي آنه اللي يالس أحاجي لي ياهل ..
سمر ماردت عليه بس تمت تضحك من خاطر لين ماعصبته زود وراح عنها ..
وردت دارها تكمل نوم وهي تفكر .. الله ياحمدان تبي تساسرني .. مسيجين أخوي ..
حمارة آنه .. لازم أعصبه .. بس أقوم بروح أستسمح منه وأخليه يقول لي اللي يبيه ..
نمر على بيت بويعقوب ..
أم يعقوب يالسة تحت مع عيالها راشد وسارة يسولفون عن حمد وليلة البارح .. وفي نص الكلام تذكرت أم يعقوب شي ..
أم يعقوب : سارة حبيبتي قومي خذي الأسبرين حق أخوج .. بعد قلبي قال لي عنه من مساع وآنه كنت أزهب أغراض أبوج ..
راشد : شأغراضه؟! أبوي بيسافر؟!
سارة وهي تبتسم : لا ياحبيبي .. أبوي بيروح وياكم مع عمي بوحمدان الحداق ..
راشد والصدمة على ويهه : هااااااااه .. أبوي وعمي بو حمــ .. لا مايصير .. أروح أتصل في النصري أصدمه ..
أم يعقوب : سود الله ويهك .. إنت متى بتستوي ريال وتترك عنك هالحركات البطالة؟!
راشد : طالع هاذي ..
الدنيا إنقلبت فوق تحت .. عمي وأبوي بيون ويانا الحداق وهي تقول لي متى بتعقل!! أبوي وعمي وراها شي ..
وحنه مخططين بالسوايا يايمة .. أقول راحت علينا .. نكنسل الطلعة أحسن لنا ..
سارة : هههههههههههههههه to late أبوي راح اليوم وشاف البيم اللي بتركبون فيه ..
راشد وهو طالع من الميلس : مالت عليج .. اللي يقعد وياج ويسمعج يزيد مغصه وعوار بطنه ..
عند الخيول ..
راشد : الحقني يالنصري ..
ناصر والنوم في صوته : هاااااااا شصاير بعد؟!
راشد : إنت نايم للحين!!
ناصر بقلة صبر : تكلم ياراشد لاسده بويهك ..
راشد : إحبس روحك .. أبوي وأبوك عزمو ينزلون الحداق ويانا ..
ناصر وعى على كلام ولد عمه وهو يصارخ : لاااااااااااااااااااااااااااا .. قول والله .. إحلف!!
راشد والخيبة بصوته : إي والله ..
ناصر : ياخسك من حظ .. والمخططات؟!
راشد : غرقت بالبحر ..
ناصر : والعربدة؟!
راشد : آآآآآآآآخ ياناصر .. لاتحرق قلبي زود ..
ناصر : مالت عليك وعلى أخبارك .. والله إنها تخيس النفس .. خلاص مابطلع وياكم الحداق ..
راشد : آنه بعد قلت جذي .. بس أبوي وعمي بيحسون ..
ناصر : خلهم يحسون ..
آنه قبل ليلة الحداق بروح على السطح مبلل وبتفصخ يالله تشلني برودة وأطيح مريض ولا إني أروح وياهم الحداق ..
راشد : إذكر الله يالباهس .. صج ماتستحي .. بس عيل خبر مشعلو قبل لايتصرف وهو مايدري بالسالفة ..
ناصر : وإنت بعد خبر يعقوب لأني موصيه بشوية أغراض .. الله والخيبة .. والله قهرتني .. مالت عليك إذلف ..
سد ناصر الخط بويه ولد عمه اللي قط التلفون من القهر في المسبح .. حليلاتهم المراهقين ..
سمر كانت واعيه بذيج الحزة وما تدري ليش ياها خاطر تروح بيت عمها بويعقوب .. بس مسرع فكرت بيعقوب وغيرت رايها ..
وتذكرت تلفونها والمسج الأمسي اللي من عند سعد وراحت تقراه مرة ثانية
..الله وإنكك تذكرني بكل حزة .. ماكو إلا آنه اللي مافيني خير ..
وقامت تدز له مسج بسرعة ((في قلب يذكر حبيب .. وفي لسان يشكي الحال .. في عيون تتريا اللقا ..
وفي دموع تشكي الهم .. الغالي سعد .. آسفة مارديت عليك أمس))وتقط جهازها وتنزل تحت ..
بدار يعقوب اللى لافها الهم والغم اللي بيعقوب من بعد ليلة أمس ..
نغمة المسج تهز الصمت كله .. وتلفت يعقوب حق الجهاز ورفعه ..
شاف مسج من عند قلبي ((هو حافظ رقمها بجهازه بإسم قلبي)) أولا تردد يفتح بس ..
وبعد مافتحه وشاف الكلام إبتسم شوي ورجع حق ضيجه لما شاف الكلام من بعد المسج
((الغالي سعد)) يعني الكل غالي عندها .. الكل قلبها يتوحش عليه ..
الكل في عيونها حبيب وقريب ..
إلا آنه .. إلا آنه .. إلا آنه الحقير .. إي الحقير بنظرها .. ورمى حاله على فراشه ..
ليمتى بصبر عليها .. لمتى بتم جذي .. هي ياهل وأخليها تجرح فيني متى مابغت وآنه مثل الهرم يالس أسمعها بدل ماأأدبها ..
قعد على طرف سريره وهو كله تصميم إنه ماينزل نفسه أكثر من ماهو مسوي في حاله ..
وسمر لازم تنتهي من حياته لأنها نزوة .. وهو أدرى إنها أكثر من النزوة .. بس مويعقوب اللي ينزل حاله حق ياهل ماتفتهم شي ..
قال في خاطره ((خل حمد ينفعها)) وقام ودخل الحمام يغسل ويبدل هدومه ويطلع شوي عند خيوله ..


(((((الجزء السابع عشر)))))
مرت الأيام بسعادة وحلاة عند كل من سارة وسمر وحمد وحمدان .. حمدان اللي تايه بجمال وحسن بنت عمه اللي ماتعبره بنظرة ..
وسمر بحبها العميق لولد عمها المخفي بالأخوة .. وحمد بحبيبته الخفية اللي محد يعرفها حتى هو نفسه .. وسارة مع خالد ..
طاف شهر على ردة حمد من سفره .. وبعد إسبوعين من ردته داوم في شركة العايلة بمنصب مدير العلاقات العامة ..
ومكتبه كان بالطابق اللي تحت مكاتب الرؤوساء الثلاثة بوحمدان وبويعقوب وبوحمد ..
سارة دخلت الجامعة في ثاني سنة لها دراسة ..
وسمر بتكمل آخر سنة ثانوية مع ناصر أخوها اللي السنة مو حاط في باله الدراسة أبدا أبدا ..
يعقوب اللي الكل لاحظ تغيره الجذري .. فبعد ماكان يعقوب اللعاب ..
واللي يدور فرصة عشان ينحاش من الشركة ويروح يعربد ويا ربعه تغير وصار يعقوب المسؤول عن الإدارة المالية والمحاسبية بالشركة ..
واللي ينشد به الظهر عند أبوه .. بس محد كان عالم باللي بقلب يعقوب ..
لأنه كان ساكت معظم الأوقات ومايتكلم في البيت إلا عن الشغل والدوام ..ولا سوالف غير ماكانت تطري على باله ..
حتى ربعه تباعد عنهم إلا سمر .. مع إنه قرر ينهي أحلامه معاها لكن قلبه ماطاع ..
ظلت سمر الحلم اللي يعقوب يتمناه ولا يقدر يخليه .. وكل الأوهام اللي بناها عن إنه يتركها ويترك الأحلام وياها تبخرت بالهوا ..
وظل يتواصل معاها عن طريق التلفون بإسم سعد .. وعلاقتهم يوم ورى يوم تزيد وتكبر عن قبل ..
مع إن سمر ماتعطيه الفرصة معظم الأوقات .. بس كفاية إنها تكلمه وتسولف وياه عن الوحدة اللي عايش فيها ..
أول إسبوع دوام بالمدرسة إنتهى ..
واليوم الأربعاء .. حزة ردتها من المدرسة ويا السايق .. خلته يوصلها قبل الشركة عند أبوها ..
لأنها تبي تكلمه بموضوع بعيد عن أمها .. عشان ماتضايجها مثل كل مرة وتخليها تهون ولا تقول وتخسر الشي ..
سمر لأول مرة بتروح الشركة ..
وتعجبت يوم شافتها .. ضخامة وكشخة ورقي .. وقامت تتفاخر بهالشي في خاطرها ((الله عليج يالسمرة ..
شوفي شركة أبوج .. والله ويحق لج تغترين)) بس سمر بطبيعتها كانت وايد حبوبة مع إنها ماتتخالط ويا الناس بكثرة ..
راحت عند الريسبشن تسألهم عن مكتب بوحمدان .. وقالو لها إنه بالطابق السادس .. توها بتمشي إلا وتسألهم مرة ثانية ..
بس هالمرة بحيا واضح عن مكتب حمد ولد عمها .. وقالو لها إنه يقعد بمكاتب الإدارات العامة بالطابق الخامس ..
وأول مالتفتت عشان تكمل دربها إبتسمت من خاطر على أفكارها .. ومشت لعند المصعد والكل بياكلها بعيونه من حلاتها بزيها المدرسي ..
لكن أكثر شي كان ملفت للناس هو جمالها وبراءتها وسحرها الغريب اللي عمرهم ماشافوه وموظف الريسيبشن أكثرهم ..
الموظف للموظفة الثانية : الله عليها .. حورية هالبنت ..
الموظفة : تشابه أحد بالغرور .. كأنها يعقوب الذري ..
الموظف : لا والله .. إلا كلها ضاري .. مثل عيونه ..
الموظفة : يمكن .. هي مو بنتهم؟!
الموظف : مدري بس فيها كبرياء الذري ولو إنها خجولة شوي ..
ركبت سمر المصعد للطابق الخامس والخوف مالي قلبها .. هي شلي يابها لهني .. بس قدرت على خوفها وراحت للإستقبال ..
سمر : لوسمحت .. ممكن تقول لي وين مكتب حمد الذري؟!
الموظف : من فيني أأول له؟!
سمر : بنت عمه .. سمر الذري ..
الموظف تغيرت ملامحه فورا : ياهلا ومرحبا .. شرفتينا آنسة سمر ..
سمر وهي مستعجبة : الله يحييك مشكور ..
الموظف : مكتب الإستاز حمد بأول لفة على يمينك .. عندك السكرتيرة منّا راح تدلك عليه ..
سمر : شكرا ..
الموظف : نحنا تحت الخدمة آنستي ولو ..
سمر راحت وهي تضحك ((والله إن إسمي له هيبة))لفت مثل ما قال لها وإلتفتت حق مكتب السكرتيرة منّا .. الله شنو هاذي منّّا ..
عنبو دارها ولا ملكة جمال .. حلاة وناقة وكشخة .. ماعليها كلام .. حست سمر شوي بالغيرة ..
بس مسرع مانستها يوم شافت عيون اللي يالسين وهم يطالعونها .. هي صج شوي تضايجت بس ماعبرتهم ..
سمر : إنتي منّا؟!
منّا بإستخفاف : أيوا أنا منّا .. وإنتي يا شطورة؟!
سمر بنفس الإستخفاف وهي تقط عليها القنبلة : سمر الذري ..
وبسرعة تغيرت ملامح منّا مثل موظف الإستقبال وتداركت الموضوع : ياهلا ومرحبا آنسة سمر .. كيفك وكيف صحتك؟!
سمر توها بترد عليها بنفس اللغة بس قالت في خاطرها ماتستاهل التحقير : بخير الحمد لله عايشة .. وإنتي شخبارج شعلومج؟!
منّا وهي تحاول تتكلم باللهجة المحلية : تمام .. أسال عنج .. علومي علومن طيبة ..
سمر : وينه حمد ولد عمي؟!
منّا : الإستاز حمد بمكتبه .. بدك أناديه تا إيجي لك؟!
سمر : مايحتاي .. آنه بدخل عليه ..
منّا : على راحتك آنستي .. شرفتينا ..
سمر : الشرف لج ..
منّا توها بترد بس فهمت الكلام وسكتت ..
سمر ماطقت الباب ودخلت .. حمد كان قاعد يشخط بأوراق ..
ويوم سمع الدخلة المفاجئة رفع راسه عشان يشوف من الداخل وإنصدم.. سمور ماغيرها!!
حمد : سمر!! هلا والله بنت عمي ..
سمر : هلا وغلا ولد عمي .. ِشلونك شخبارك؟!
حمد وهو مستغرب : الحمد لله تمام .. شميببج الشركة؟!
سمر بإستعلاء : الحلال وياية أتطمن عليه .. حرام؟!
حمد : هههههههههههههه .. لا بس الحلال له مو بس راعي واحد .. الكل هني يراعي حلالج يالطيبة ..
سمر : لا .. آنه ماوثق فيكم .. يمكن واحد منكم يلعب به الشيطان ويبوق الحلال كله ولا حد يدري .. لازم مراقبتكم ..
حمد : الحمد لله .. آنه مدير العلاقات العامة .. يعني بشغلي ماكو فلوس ولا كلتيني ..
سمر : عيل منو بالمالية؟!
حمد : أكبر عبقري رياضيات .. يعقوب ..
سمر : وع وع وع وع هذا راعي الحلال؟! لايوبا غيروه .. آنه هذا ماأأمنه على فلوس المدرسة شلون الحلال كله!!
حمد : ياه سمر .. هذا ولد عمج شلون تقولين هالكلام عنه؟!
سمر : إسكت واللي يرحم والديك .. هذا آنه ماقرب له شي أصلا .. والله مادري ليش مخلينه مسؤول عن الحلال!!
حمد وهو متضايج من كلام سمر : وإنتي ياعنزة الفريج كل ساعة بتفرين لي ويهج الحلال والحلال!! ماتقولين لي شمييبج يالسوسة؟!
سمر : ههههههههههههه ياحلو السوسة .. أونس مو؟!
حمد : خلصيني وراي شغل وايد ..
سمر : آنه مو ياية لك .. آنه ياية حق أبوي بس قلت أمر أسلم على ديار ليلى ..
حمد : منو ليلى؟!
سمر : أوووووووووف .. والله إنك كبرت وخرفت ..
حمد وهو يضحك عليها : الله عليج .. من الصبح للحين وآنه متكدر ويوم ييتي فج خاطري عن الكدر ..
سمر تتنهد من قلب وتقول في خاطرها ((ياويل حالي آنه منك ياولد العم)) وتقول : شمكدرك يابوسليمان؟!
حمد يتنهد بعد : لا ولا شي .. سلامتج ..
سمر بحزن : مابتقول لي يعني؟!
حمد يطالعها من طرف عينه : سوالف رياييل مالج شغل فيها ..
سمر : براحتك .. إنزين .. آنه بروح حق أبوي .. تيي وياي؟!
حمد : شنو كشتة أروح وياج!! أصلا مو كل حزة نروح لهم .. ويمكن إنتي بعد مايدخلونج ..
سمر : ها ها ها .. آنه سمر الذري مايدخلوني!! يله حمد قوم وياي ..
حمد وهو يطالع الأوراق : ماقدر سمور .. لو ياية من قبل جان رحت وياج .. بس الحين مشغول يالغالية ..
سمر : أوكي أخليك عيل .. إرعى الحلال ها ..
حمد : ههههههههههههههههههههههههه .. إن شاء الله عمتي ..
سمر : لا يفوتك ياحمد .. والله كل واحد يطالعني بإسخفاف ..
بس أقول له إسمي يقول لي صبحج الله بالخير يا آنسة سمر .. هههههههههههههههههه .. والله آنه رزة ولادري ..
حمد : هههههههههههههههههه .. الذري شتبين بعد ..
سمر : هههههههههههههههه .. إي والله .. يله بخاطرك ..
حمد : في أمان الله ..
وطلعت سمر من مكتب حمد بعد ماحفظت كل تفصيل فيه .. ويهه .. ثيابه .. شكله .. حركات يده ..
كل شي .. وتنهدت من قلب وكملت دربها بعد ماحقرت منّا وراحت صوب المصعد ..
توه المصعد بيقفل إلا ويفتح مرة ثانية .. سمر كانت تعدل شعرها بمرايا المصعد وشافت اللي واقف بره .. يعقوب ماغيره ..
هو ظل واقف مكانه يطالعها من المرايا وقلبه يرتعد من كثر شوقه لها .. صار له أكثر من شهر ماشافها ..
حتى سمر اللي غطت مشاعرها بنظرات إحتقار خفيفة قلبها دق لولد عمها من دون ماتدري بالسبب ..
وحشها .. إشتاقت له ولسوالفه .. بس مسرع ماتجاهلت هالشعور وإلتفتت له ..
سمر : بتدخل ولا شنو؟!
يعقوب : بلى بدخل ..
وتوه بيدق على زر الطابق السادس وشافه مضوي : وين رايحة؟!
سمر : بشوف أبوي ..
سكت يعقوب ولاتكلم .. وشغل حاله بالأوراق اللي حاملهم .. وسمر إحتر مخها من كثر ماتفكر ..
صج إنه عديم إحساس .. ماسأل عن أخباري .. شهر من آخر مرة شفته وهو ولا حاس ..
وتذكرت ليلة ردة حمد والكلام اللي دار بيناتهم وحست بالندم .. بس قلبها ماطاع ..
وبسرعة رفعت راسها مثل مانزلته .. ولاعتبرت حق يعقوب .. اهو إللي ياب حق روحه الكلام مو آنه ..
تعتقدون يعقوب ليش كان ساكت؟! يقرى الأوراق؟! لا والله ..
يعقوب كان ساكت عشان يقدر يسمع أفكار سمر ويتصنت على دقات قلبها ..
وهو خايف لاتنسمع صوت دقاته اللي كسرت صدره وناوية عليه بالفضيحة ..
ماصدق إنه ممكن يقعد معاها بمكان واحد مثل المصعد ومايقدر يكلمها ..
صخ يعقوب وهو يتنفس عطرها .. كله دلع وشقاوة وشطانة بنات .. بس مو أي بنت ..
هاذي سمر .. اللي يخاف عليها من النسمة لا تجرحها.. وحشتيني سموووووووور وحشتيني ..
وقف المصعد وطلع يعقوب قبل سمر وكل اللي قاله : أشوفج على خير وراح ..
سمر توها بترد عليه بس ماطلع منها الكلام وطلعت من المصعد لا يسكر عليها مرة ثانية .. سمر حست بإحباط لكن ماتدري شنو سببه ..
يعني معقولة بتشتاق لولد عمه هالكثر .. والله حمد ماشتاقت له جذي ..
هزت راسها تبعد عنها هالأفكار .. ونفخت عمرها لمكتب الإستعلامات ..
ونفس الحركة ونفس الإستخفاف حصلته ..
ونفس التقدير اللي لاقته من بعد الإستخفاف .. دخلت على مكتب أبوها اللي وصله خبر من حمد قبل لا تدخل عليه ..
بوحمدان : هلا هلا .. هلا والله بحبيبة قلب ابوها ..
سمر دلعها كبير عند أبوها لذا راحت تقعد عند كرسي أبوها : هلا يوبا .. شلونك حبيبي .. إن شالله بخير؟!
بو حمدان حس من كلامها إنها تبي شي وقال في خاطره ((والله لالعوزج يابنت نجاتو .. حيالة مثل أمج))
وقال : تمام حبيبة قلبي تمام .. إلا ماتقولين لي شمييبج هني الشركة؟!
سمر : ولييييييييه .. كل من رحت حق أحد سألني نفس السؤال .. راعية حلال وأتطمن على حلالي .. مايحق لي!!
بوحمدان : إلا يحق لج ونص .. واللي يقول خلاف هالكلام أقطع لسانه ..
سمر : الله عليك يوبا .. محد مثلك ..
وحل السكون بالمكان وبوحمدان شغل نفسه مرة ثانية بالأوراق اللي جدامه ..
وسمر تمت تتحقرص تبي تقول حق أبوها اللي براسها بس ماتدري شلون ..
بوحمدان : شلون المدرسة؟!
سمر : بخير يوبا ..
بوحمدان : مممممممممممممم .. تمام الحمد لله ..
وصمت آخر كسره صوت سمر وهي تقول : يوبا ..
بوحمدان : عيون أبوج ..
سمر : بتتأخر وايد بشغلك؟!
بوحمدان : إي حبيبتي .. وإتصلت بأمج وقلت لها إني ما بيي البيت حزة الغدا ..
سمر بخيبة : آهاااااااااااااا ..
بوحمدان : ليش في شي صاير؟!
سمر : صاير؟! شنو صاير؟! لا ماصاير شي ..
بوحمدان : وإنتي بتمين هني تطالعيني وآنه أشتغل؟!
سمر : يوبا .. الحلال الحلال ..
بوحمدان سكت عنها : على كيفج ..
سمر تمت تتحقرص في خاطرها .. آنه طول الدرب قاعدة أتدرب عشان أتكلم على طول ويوم دخلت ضاع مني الكلام ..
الحين شاقول له .. والله حالة .. الله ياخذ إبليسج ياسارو ..
كله منج اللي تحطيني بهالمواقف .. بس سمر تشجعت وفتحت الموضوع جدام أبوها وهو ولا معبرها ..
سمر : يوبا .. طلبتك طلبة ..
بوحمدان من دون مايرفع راسه : لبيه يابنيتي ..
سمر : يوبا .. أبي أسوق سيارة ..
بوحمدان رفع عينه على طول : ليش؟!
سمر : شنو يوبا ليش!! خلاص ناصر وكاهو خلص تدريب وعنده سيارة ..
آنه بعد أبي .. آنه بنت وراي مشاوير وأحس إني أنغص عليك ويا السايق .. آنه أبي أريحك يوبا ..
بوحمدان : بس خلاص خلج وياي بالسايق .. آنه مرتاح جذي ..
سمر وشوي تفقد أعصابها : يوبا .. يله عاد ..
آنه أدري إنك ساعات تتورط وياي بالسايق بس ماتقول .. أحسك يوبا .. إنت ماقلت إني مثل أمك؟!
بوحمدان يضحك : لا ما قلت ..
سمر بإستعجاب : يوبا .. قول والله إنك ماقلت ..
بوحمدان : يله عاد يله .. والله إخوانج صاجين يوم يقولون إنج ماتنعطين ويه .. مافي سواقة ولا سيارة زين؟!
سمر : ليش يوبا؟! زين والله ربعي البنات كلهن عندهن سيارات إلا آنه!!
بوحمدان : وإنتي من متى عندج ربع؟!
سمر بتعجب : هااااااااااه .. من زمان بس إنتو ماتعرفونهن ..
بوحمدان : لا .. صج والله .. عزميهن البيت عشان تكون بيناتنا معرفة ..
سمر هني حست خلاص ماكو أمل : يوباااااااااااااا عااااااااااااااد ..
بوحمدان بصوت أبوي ينهي الموضوع : سمر .. بس عاد ..
أخوج ريال ولا تحطين عقلج بعقول الرياييل .. لا باجر بتقولين لي تبين تسافرين بره تدرسين ..
سمر فكرت إنها تجرب حظها بهالموضوع بس هي تعرف نتايجه مسبقا : وليش؟! إنت ماتفكر إنك تخليني أدرس بره؟!
بوحمدن : هااااااااااااااااه!! آنه يايب لي بنت ولا صبي!! أقول سمر .. نزلي للسايق لا الحين أحذفج من الدريشة ..
ولا أسوي فيج السوايا وأفتح الموضوع جدام أمج وأخليها تهذر عليج ليما يطلع مخ من مخج ..
سمر والحزن لابسها : إنزين إنزين خلاص لا تعصب .. حشى لوطالبة القمر جان يبته لي ..
لكن من يوم ورايح لا تقول لي سمر ييبي لي شي .. ولا سمر حبيبتي قعدي وياي .. خل تنفعك نجوت ..
بوحمدان بحمق : نجوت تسواج وتسوى إخوانج كلهم يالساحرة .. يلة بسرعة البيت ..
سمر : إنزين إنزين .. آنه بمشي ياضاري الذري ..
بوحمدان وهو منزل راسه يطالع أوراقه : صكي الباب من وراج .. ماحب التيارات الهوائية ..
سمر تقول بصوت غير مسموع : الله والتيارات عاد ..
بوحمدان : شتقولين؟!
سمر فزت من مكانها : لالا ولا شي .. يله مع السلامة ..
بوحمدان : في أمان الله ..
بولعت سمر من مكتب أبوها وهو رافع راسه ويضحك .. يطالع صورتها على المكتب وعمرها 12 سنة ..
يابعد عمري هالبنية والله .. بس وايد شيطانة .. إنولدتي بين الصيبان وتربيتي مثلهم بعد ..
ردت سمر البيت ومابغت تتغدى ..
وأمها فتحت وياها تحقيق .. بس قالت لها إن أبوها موصيها تزوره عشان يوريها الشركة حق تقرير المدرسة ..
نجاة : حشى .. هالمدرسة ماصار لها يومين وبدو يطلبون التقارير!!
سمر " يمة هاذي المدرسة .. تبيني أقطع هدومي يعني!!
نجاة : بس يه كافي .. ياحبج حق الأفلام .. تبين غد؟!
سمر : لا مابي .. كلت وايد بالفسحة ..
نجاة : شماكلة ؟! ماتشوفين ويهج مختفي!!
سمر : يمة بخاطرج ..
نجاة : الله معاج ..
وأول ماراحت سمر غرفتها إتصلت في أبوها وإتفقت وياه على الموضوع علشان لا تتوهق ويا أمها ..
وفتحت تلفونها وشافت فيه فويس مسج من عند سعد اللي كانت حافظة إسمه بالغريب نظرا لظروف تعارفهم ..
وشافت أغنية عبدالله الرويشد ((طمني)) وإبتسمت من قلب وقالت ((هذا وآنه كل ليلة أكلمه))
سمر كان عندها حق سعد معزة خاصة .. ومايوم ملت وهي تكلمه ..لدرجة إنه صار ينافس سارة بالغلا ..
وتمت سالفة سعد بينها وبين نفسها .. وبدورها طرشت له فويس مسج بأغنية عبدالله الرويشد وقفلت تلفونها ونامت من التعب ..
__________________



(((((الجزء الثامن عشر)))))
اليوم اليمعة .. يوم التجمع العائلي لعوايل الذري كلها ..
إلا زاهية وزوجها مبارك لأنهم كانو مسافرين لندن .. سمر اليوم كانت ناوية تصدمهم كلهم باللي راح تلبسه ..
جلابية من عند خالتها أم يعقوب اللي شرتها لها يوم سافرت الإمارات قبل مدة ..
هي للحين مالبستها وقالت بخليها ليما تتيمع كل العايلة .. سارة أكيد تدري عن السالفة وهي بعد بتشارك سمر بحركتها ..
الكل كان حاظر .. إلا يعقوب مايصبر يقعد بمكان واحد مع سمر يطالعها وهي ولا تعبره ..
على عكس حمدان اللي مبين إنه مل من الإنتظار وبيكلم أبوه مرة ثانيه عن سالفة سارة بنت عمه اليوم ..
يعقوب كان في بيتهم وهو يتقلب من القهر على فراشه وآخر شي زفر زفرة ولا منها .. أوووووووووف آنه ليش حاكر روحي ..
اليوم اليمعة وأم زيد الطباخة بتسوي شوربة لحم على ذوقي وآنه هني ميت من اليوع عشان الخايبة سمر .. والله ماخليها تستانس بالغدا ..
اليوم بنغص عليها .. قام وغسل ولبس الكندورة اللي أمه شرتها له بنفس السفرة وراح بيت عمه بوحمدان ..
ماتتخيلون الترحيب والإعجاب اللي حصلوه سمر وسارة يوم نزلو وهم لابسين اللي لابسينه
.. كندورة سمر كانت فرا مع عناقيد من الخرز تتدلى وكانت مفتوحة عند الركبة ..
ولبست معاها طقم ذهب خفيف وخلت شعرها هبوب بطوله ..
أم يعقوب لمعت عيونها على سمر وقعدت تفكر ليش ماتخطبها حق يعقوب ..
حمدان مثل ماتتوقعون ساح على بنت عمه االلي كانت ولا أروع .. كندورة سارة كانت حمرا مخلوطة بأسود ..
مثل العناقيد من الخرز والخيوط المتدلية .. وكانت لابسة طقم ذهب أبيض وشعرها اللي يوصل لجتوفها كان مفلول ..
بس سمر غلبتها ليش إن سارة أطول من سمر بوايد وطول سمر مقبول ..
والكندورة كانت عليها ولا أروع .. أم حمدان تطالع سارة بفخر وهي تفكر فيها .. مرت ولدي ولا أحلى ..
وحمد مافارقت عيونه سمر اللي لأول مرة من ردته من السفر حس إنها كبرت وصارت بنت مثل باجي البنات
.. بس سرا إلتفت لسارة اللي كانت مثل الأثير بالسحر ..
حسها وايد قريبة منه وإنه يعرفها على الرغم إنهم مايتكلمون وايد
مع بعض تبعا لطبيعة سارة الخجولة .. ولأنها ما تبي تتدخل بحمد عشان سمر ..
وصل يعقوب بيت عمه وهو ميت من اليوع ومن الإرتباك .. وقف برع عند سيارته الكروزر وهو متردد .. بس بعدين صمم ..
والله إن سمر تكلمت له ولاسنته بيراويها الشغل العدل .. بيحذفها في مسبح بيت عمه ولا عليه من أحد ..
جب زين والله بتحذفها ((الكلام مر في خاطر يعقوب)) يعقوب سمى بالرحمن ودخل البيت ..
وأول مادخل راحو له الشباب يحيوونه ويباركون له على الخروج من العزلة ..
وهو يضحك من خاطر وسمر وسارة كانن مشغولات ويا خالاتهن بالسوالف ..
ناصر : هلا والله هلا بولد العم .. أسير البرج ..
يعقوب : ههههههههههههههه هلا فيك ..
مشعل : وينك يايعقوب .. والله إنك مصختها .. صار لنا مدة ماشفناك ولا ييت ويانا الحداق ذيج المرة ..
راشد بحزن : بعد أحد يذكر ذيج الطلعة!! مالت عليك مشعل ..
يعقوب : اخلي الفراش وأروح حق الزفرة .. مينون إنت ..
حمد : تعال تعال عنهم .. ماعليك منهم ذيلا بايعينها ومخلصين ..
ناصر : كل تبن زين ..
حمد يطالع ناصر من فوق لأنه اطول منه .. وناصر حس بالإستخفاف وعدل من موقفه ..
ناصر : just jurkin just jurkin ..
حمد : إسمها joking يالفالح ..
ناصر : وت إيفير .. سي ويت إيفير ..
يعقوب والباجين ذابوا من الضحك على نصور ولغته التحفة .. هذا وناصر معزم يدرس بأمريكا بعد الثانوية ..
راشد : شفيك يعقوب لابس دشداشة إماراتي؟! الكويتي مايعجبك؟!
يعقوب : والله عاد كيفي .. الإماراتي اخف من الكويتي وخبرك الدنيا ثلج بره ..
ناصر : إي والله .. آنه اليوم قلت بطلع بشورت بس خفت على سارة لا تنغرم فيني وبسيقاني الحلوة ..
يعقوب : هههههههههههههههه سيقان شششششششش إسكت لا تعلم أحد .. ترى نجوى فؤاد بترفع عليك دعوى ..
ناصر : خلها .. أصلا هي من زمان متحذفة فيني هههههههههههههه ..
ودخل الكل المجلس اللي يقعد فيه الكل .. الحريم والرياييل بس بأطراف ..
أول مادخل يعقوب لفتت إنتباهه بنت عمه سمر واللي عليها .. ماصدق حاله ..
هي لابسة إماراتي وهو لابس إماراتي .. ياويل حالي من الصدف .. بس خسارة فيج ياسارو يالقلادة ..
كل شي تقلد .. آنه وسمر نفس الشي والكل على باله متفقين .. يعل عدوينج اليهد ياسويرة ..
سمر إنتبهت ليعقوب وفجت عيونها بوسعهن .. يحليييييييييييييييييييييييييييييله والله إنه يينن بالكندورة ..
سارة قرأت أفكارها وقالت : يحليله أخوي .. يينن بالكندورة ..
سمر ماردت لأنها تايهة بوسامة ولد عمها ..
سارة : سمر .. هوووووووووو وينج؟!
سمر : هاه .. هني هني ..
فكرت سمر شوي .. شهالصدف ولا؟!
سمر : سارو .. لايكو ن قلتي له إن إحنه متفقين على الكندورات وهو قام رز ويهه!!
سارة : لا والله حشى علي .. أصلا آنه اليوم طلعت بعبايتي ولاحد شافني شنو لابسة وييتج على طول ..
سمر وهي محتارة : الله والصدف ..
سارة وهي تبتسم حق بنت عمها : إي والله ..
على الغدا الإهتمام كان كله عند يعقوب وياعيال عمه ..
نصور ماخلاه بحاله وهو كل ساعة يقول له إن بعد الغدى بيدندن له بالأغاني الإماراتية ويسأله عن ذوقه ..
بس يعقوب المغني الإماراتي اللي يسمع له هو حمد سالم العامري .. بس لان ناصر مايعرفه خلاه يتحقرص لين ما يحزره ..
وسمر كل دقيقة ترفع عيونها على ولد عمه تبوق نظرات عليه ويعقوب ينتبه لها وتنزل عيونها
.. ليش لازم يكون تصرفه خايس وياي .. لكن هو الخسران مو آنه ..
يعقوب حس إن بنت عمه غير اليوم وصار عنده أمل إنهم يتصالحون مع إنه
ماكان مقرر جذي أول مادخل البيت .. بس قرر إنه يفض النزاع بينه وبين سمر ..
مشعل حس بتوتر الجو من لبس سمر ويعقوب بس حاول إنه يضفي بعض الملاغة بالجو مثل ماينعرف مشعل ..
مشعل : إلا أقول يعقوب .. شخبار ربيعتك الإماراتية؟!
يعقوب إستغرب بس كانت فرصة ومايبي يضيعها بعد ماشاف سمر اللي إنتبهت حق كلام أخوها .. غيرة يعني ..
يعقوب وهو يبتسم إبتسامة ساحرة : موشغلك وكمل غداك .. وماظنه موضوع ينفتح على الغدى جدام الحريم ..
لكن يعقوب يعرف ناصر اللي ماراح يسكت والكل ساكت عنه وعن سوالفه ..
ناصر : آهاااااااااااااااااا آنه أقول ..
لابس دشداشة إماراتيه وكل كلمة والثانية يتفدى الناس فيها .. أثاريه طالع لي بره الكويت بالمغازل!!
يعقوب : شو مغازل!! ماتعرف ترمس!!
ناصر والغيرة ماخذته : ياويل حالي أنا .. ترمس .. شنو ترمس بعد؟!
(يعقوب يعرف يتكلم إماراتي عدل لأنه يسافر وايد هناك وعنده ربع بالإمارات ..
بوحمدان يقطع الفوضى اللي صايرة : لين رحت الإمارات بتعرف ..
ناصر : عليك نور يوبا .. إنت قلتها .. متى بنروح الإمارات؟!
بوحمدان : إنت شفيك الكل قارصك .. توها المدارس فتحت .. عنبو خل عطلة الربيع تيي!!
ناصر : إنزين يعقوب .. شسمها؟!
يعقوب وهو يطالع سمر من طرف عينه : إسمها أحلى إسم بالدنيا ((يفكر في إسمها)) ..
راشد : يله عاد يعقوب .. ماصارت حالة .. ذليتنا ذل ..
يعقوب يتسند على الكرسي ويبتسم بشاعرية : إسمها ظبية ..
ناصر وراشد بنفس الوقت يودو على قلوبهم : ياويل حالي من ظبية ..
سمر ردت على ورى .. يحب إماراتية!!
بوحمدان : أووووووص .. يعقوب علامك صرت ياهل مثلهم؟!
يعقوب : آسف عمي .. ماقدرت أحبس شعوري .. لازم أفضفض لأحد ..
بوحمدان : هههههههههههههههههههههه ..
يعقوب مايعرف وحدة إسمها ظبية .. بس تذكر إن ظبية إسم متداول بالإمارات ..
ويافرحته لأنه ذكر مشعل هالسالفة .. لأن ملامح سمر تغيرت 180 درجة ..
ناصر : ها مشعلو .. أثاريك رفيج يعقوبو وتدري بسوالفه ولا تقول لنا!! أوريك يالدقس أوريك ..
مشعل والصدمة لابسته وهو ولا يدري إن سؤال إستعباطي بيتحول لموضوع جد : آنه والله العظيم مادري بشي .. بس جذي سألت ..
حمد اللي يدري إن يعقوب يستغل الموقف ويا عيال عمه ضحك لولد عمه على دهائه اللي لا يعلى عليه ويعقوب يغمز له ..
وسمر اللي الأكل صار بدون ماتدري ليش مثل الرماد في بطنها وعافته ..
نزلت راسها وهي تفكر بحبيبة يعقوب الإماراتية الوهمية .. طول هالفترة مختفي عنا أثاريه حاب له وحدة من بره الكويت ..
خلها أكيد مثله ماعندها إسلوب وغرور على قلة الفايدة .. الطيور على أشكالها تقع .. بس محد كان محترق غيرها هي ..
بعد الغدا طلع الشباب للملحق الصيفي اللي في بيت بوحمدان الفخم اللي هو أكبر بيت من بيوت العايلة ..
ويلسو يدندنون الأغاني الإماراتية اللي ولا وحدة ضبطها ناصر .. وقام يعصب على مشعل وراشد ويقول لهم إنتو السبب
.. والسبب واضح لأن ناصر توله على الإماراتية مع إن لا وجود لها .. مساكين المراهقين ..
سمر ماحبت إنها تيلس وياهم بنفس المكان اللي فيه يعقوب لأن سارة إختفت وحمد راح يسبح في داره ووليد عنده مخيم
.. يعني ماعندها احد تسولف وياه .. وإخوانها مشغولين ويا نصور
.. مافي إلا يعقوب اللي قاعد يطالعها بين الفترة والثانية بنظرات لوم وهو يتذكر ليلة ردة حمد
.. وقامت سمر تتمشى بعزبة بيتهم البسيطة وعيون يعقوب عليها ..
إستأذن يعقوب من الشباب ويوم مالقى جواب قام عنهم من دون مايحس فيه أحد وراح عند سيارته يتصل في سمر ..
دق مرة ومرتين وثلاث ولا حد رد عليه .. يمكن التلفون مو عندها .. الحين شسوي ياربي ..
والله حالة لا تلفونها عندها ولاقدر اروح صوبها .. وقعد يقلب بتلفونه ليما مل وطلع من السيارة ومشى لعند المسبح ..
قعد على الكراسي اللي تحت المظلة وهو مغمض عيونه .. سمر كانت تتمشى بالحديقة وتفكر بحمد ووينه مختفي عنها ..
بس حست إن أفكارها مالها معنى أبد .. ويوم وصلت لهالفكرة لامت نفسها .. ليش مافكر بحمد يعني .. مو آنه أحبه ..
ظل السؤال عالق براسها ليما وصلت مشيها لعند المسبح وشافت يعقوب منسدح على أحد الكراسي المظللة وهو مغمض عيونه ..
وفرت روحها رادة من المكان اللي ياته بس إلتفتت له مرة ثانية وشافته كأنه نايم وراحت يلست وراه بس بمسافة بعيدة وقامت تطالعه من وراه
.. يعقوب فتح عيونه وقعد يزفر من قلب و قام على طوله وشاف سمر قاعده وراه ..
سمر إنحرجت منه وقامت بتروح عنه بس يعقوب وقفها لأنه حس أن هذا الوقت الزين عشان يتصالح وياها فيه ..
يعقوب : سمر تكفين لاتروحين ..

سمر دق قلبها من نبرة صوت ولد عمها : تكفى يعقوب مافيني هواش ونجرة وياك .. خلني أروح أحسن لي ..
يعقوب : ونتي سويتي شي يستحق إني أناجرج!!
سمر : إسال روحك ..
يعقوب : آنه اسألج إنتي ..
سمر ماصدقت حالها .. شلون يستفزها جذي من دون أي سبب ..
سمر بصوت واطي : أوووووووووووف .