مستحيل أعيش من دونك
هذا عنوان روايتي اللي دارت إحداثها في دوله الكويت وهي قصة واقعيه نسجها القدر وكتبتها الضروف,وعشان
اكون صريحه وياكم انا قررت اكتبها لمعرفتي الشخصيه في بطلة
القصه الاولى,تعرفت عليها في ثانويتي كنت
في اخر كورس في الثانوية وكانت البطله تكبرني بسنتين تقريبا 0
حسيت ان فيها اختلاف من بين باقي زميلاتي وصارحتها بشعوري
وطلع حدسي في محله وبدات تروي قصتها اللي بسببها تاخرت دراسيا
وعشان ماامللكم ببدا في القصه مباشره ,وسلوبي في قصتي هذي
اخلي القارئ يقرب من الشخصيه ويسمع القصه مباشره من البطل
وقرب من ادق التفاصيل عشان يقدر يسمع ويشوف من خلال القراءة,
وسمحوني اذا زل قلمي او اذا لم تحوز قصتي على اعجابكم ’
الحبن استأذن بخليكم مع البطلة من الفصل الأول من القصة
رهام
انا بنت كويتيه عاديه اعيش حياتي مثل اغلب بنات الخليج,من اسره احواله الماديه جيده,واصلي بدويه يعني من احد القبايل المعروفه في الكويت,افراد اسرتي ثمانيه مع امي وابوي(4بنات وولدين والبنات هم الاكبر)ترتبي الرابعه بين اخواني واشهر الشخصيات في قصتي من خواني (منيره –مشاعل -فاطمه)لانهم لكبار,وكاغلب العوايل في الخليج وجود بيت يتجمعون فيه خميس اوجمعه,وهذا البيت بيت عمي "محمد"وبلاساس بيت جدي الله يرحمه,وكان بيت عمي كل خميس يكتض في بنات العايله اللي اعدادهم قولوا مشاء الله ثلاثين
وحقيقتي المره اني كنت لين عمر 14سنه ضايعه بطوشه تقدرون اتقولون البطل الصامت وماكان لي أي دور سوى المطاريش (رهام جبي هذا ..رهام حطي ذاك )
وكنا في اغلب العطل مثل الصيف والربيع نقضيها مع بعض مخيمات او سفر وشالهات,يمكن بتقلون وناسه بس كان بنسبه لي روتين ممل,ومع وضيفتي اللي كنت اسويها للاسف كنت مرسال غرام بين شباب وبنات العايله وطبعا كان نص شباب العايله مايعرفون اسمي واذا تازموا قالوا تعالي يابنيه"آآآه كنت مصخره ليش ذكرتوني"
وطبعا تسالون نفسكم ليش هذا التجاهل من الكل,عشان اكون صريحه في ثلاث اسباب الاول لاني كنت صغيره ونتفه ومافيني شي يجذب مثل غيري من بنات عمامي, وثاني كثرة العدد في العايله, وثالث يرجع لشخصيتي كنت خجوله واميل للعزله واعيد واكرر ان هذي كانت فتره من حياتي لين كملت14سنه
برد لجمعتنا "بنات العايله"كان حديثهم في كل جمعه ينقسم قسمين الاول احاديث منوعه من اهتمامات البنات سواء في الموظه او المكياج والقسم الثاني لاشهر شخصيه في العايله "السوبر ستار"مشعل ولد عمي محمد,كان الحديث عنه طويل بس كله ذم في سلوكه وتصرفاته وشلون شافته مريم مع بنت جيرانهم وشلون اسمعته فاطمه اكلم وحده وللي شافته يغازل امس في السوق وووو.....,شقول وشخلي
بس على خرابطه هذي كان فيه شين مايختلف عليهم اثنين الاول انه اجمل شباب العايله وثاني حبه لدراسته اللي خلاه يتفوق وكمل دراسته بأمريكا
خلوني ابدي معاكم من نقطة تحولي في سنت 2001 قمت من النومي كلعاده نزلت الصاله لقيت امي وبوي وخواني يتريقون
ابومحمد:صباح الخير على بنت ابوها
حبيت راسه وراس امي:صباح النور لكم كلكم
ام محمد:تعالي تريقي حبيبتي
رهام:انشاء الله يمه
مشاعل:مدلعينج رهام اليوم بزياده
ابومحمد:والله رهام من زمان عيون ابوها واللي مو عاجبه كيفه
ام محمد:افى ياابو محمد والباقي
ابومحمد:غالين وفي القلب بس رهام غير
فاطمه:اموت وعرف اشمعنا رهام
ابوي:انتي مو بتموتين من الفضول من اللقافه ههههه
وكلنا ضحكنا وهذا عادة ابوي لازم يضحكنا الصبح عشان برايه يكون يومنا كله فرح
فاطمه:لاتتهرب من الرد يا ابو محمد جاوب
ابومحمد:بدون لحد يزعل رهام حنونه وهاديه ومتاكد من كل تصرفتها انها بنتي العاقل
ام محمد:أي ةالله رهام من بد بناتي احس انها بتكون اصبر وحده فيهم وحكمهم
منيره:يبه امدحنا لو خميس واحد مثل رهام ترى احنا اللي مو وياك في البيت
مشاعل:يعني اسبوع انا وثاني منيره وثالث فاطمه"لانهم مزوجات"
ابومحمد:كلكم غالين من غير مامدح
فاطمه:لا امدحني ماتبي تمدحني ولا شلووووووون
ابومحمد:فطوم الحلوه الشيخه العاقل هههههههه
ام محمد:منيره ترى اليوم بروح بيت عمكم
منيره:شنو جديد كل اسبوع عندهم
ابومحمد خذا حمود اخوي وطلع:نوره الساعه سبع خالصين
ام محمد:انشاالله يا ابومحمد
ام محمد:اليوم في حفله مسويتها مرن عمكم محمد
فاطمه:حفله ليش
منيره:يمكن مشعل وصل
ام محمد:أي مشعل رد وامه مسويه حفله
فاطمه:توكم اتقولون مدري شلبس
مشاعل:البسي البدله السلفر(رمادي)
منيره :بدق على سعد يجيب عقد الالماس
واستمرو اناقشون امور الحفله وشنو راح يلبسون ,اما انا كنت افكر شلون اقعد في البيت وقنع امي تخليني’لاني مثل ماقلتلكم اميل للعزله ومااحب الزحمه ولا الروتين الاسبوعي الممل ,وبلفعل لقيت خطه تفكني من الحفله وحضورها
رهام:يمه يمه ؟؟
امي:تعالي يا رهام انا بغرفتي
رهام:يمه انا تعبانه بطني يعورني
امي :من شنو شنو ماكله ولا حاشج برد من المكيف كم مره قلت قصريه
رهام :مادري
امي:خلاص اشربي شي دافي ونامي وتصيرين زينه واذا حسيتي بزيادت تعب تعالي اقول لبوج يوديج المصتوصف
رهام :لا يمه ماله داعي بنام
رحت وفكرت بخطه ثانيه لان خطتي فشلت ,,,,,وساعه 6
امي:رهام عسى راح العوار
رهام:راح بس فيني نوم خليني وروحي الحفله
امي:أي قولي من الاول انج ماتبين اتروحين شوفي اذا على قولتج فيج نوم نامي في غرفة ساره بنت عمج بس قعده مافي سامعه مجنونه اخليج بروحج!
طبعا رضخت لراي امي وماقدرت اقاوم ورحت اكشخ ولبس بس كشخت بنت عمرها14 سنه,لبست نفنوف ازرق مزموم من الصدر والايدين ولين الركب كان فيه قصات وشرايط كان حلو ومناسب عمري مشطت شعري الاسوداللي كل العايله تشهد انه روعه في الجمال سوئ طول او كثافه او نعومه وابوي يعشق انه يمشطه وسويه اخيوط الحرير ,حطيت قلوس"مرطب"وهذي كانت كشختي
لبست وجهزت ولبسو خواتي ورحنا الحفله
كانت مرت عمي مو مبقيه احد ماعزمته ولكل كان كاشخ ,وطبعا تجمعنا كلنا بنات عمامي وقعدنا الصاله الداخليه او مقر التجمع مثل مانسميه وبدت السوالف واكذب عليكم ان قلت اني كنت مو مستمتعه لانه أي بنت طبيعيه تستانس بسوالف مع قرينتها ,وبين ما كنا نسولف طلبت مشاعل من اجيب ماي حقها,ورحت المطبخ لقيت مرت عمي تعطي اوامر لسيرفس اللي جايبته وقبل مااطلع نادتني
مرت عمي:رهام حبيبتي ممكن تروحين غرفتي اللي فوق راح تلقين على التواليت علبه مخمل اخضر فيها عود آسفه ماقدر اخلي الخدم ادشون الغرفه ولا مااعنيج
رهام:عادي ياعمه ماطلبتي شي
رحت لطابق الفوقي اللي كان عكس الطابق الاول كان هادي حد السكون تسمع فيه دب النمله ,دخلت الغرفه وكانت مرتبه واول ماقربت من التواليت سمغت صوت خرفشه طالعه من غرفة الملابس اللي داخل الغرف
رهام:منو......منو داخل؟؟؟؟
وقفت الخرفشه وخفت
رهام:منو ؟؟؟منو
وفجاه طلع آخر واحد كنت اتصور اني اشوفه خصوصن بهلقرب
رهام:مش......عل"بصوت متردد"
مشعل:منو انتي؟؟ليش داشه غرفة امي ياشيطانه"ببتسامه ونوع من السخريه"
رهام:انااااا....ر ..رهام
مشعل:هلا رهام شلونج "بكل برود" "على اسا اني بنت صغيرونه "
وقرب مني وباس خدي وطلع,بكل برود طلع وهو يدندن ,تصنمت في مكاني وحسيت مثل تيار من الكهربا لسعني,نسيت شنو جابني فوق ,وبيني وبين نفسي اقول هذا مشعل اللي يذمونه كل بنات عمامي باسني اللي مايستحي ,وبدون شعور بدت ادموعي تنزل على خدي ,خفت اذا درو بنات عمي وخواتي شراح يقولون,وبين كل هذي لفكار رد الصوت اللي هز كل خليه بجسمي
مشعل:نسيت اقول انتي بنت عمي سالم ولا بدر ولاحمد ولابنت وحده من عماتي
وبين ماكان يتكلم لاتشفون وجهي من الدموع وطبعن انتبه وقرب مني
مشعل:ليش تبجين احد مسويلج شي عشان اطقه
حرني في بروده وشلون يكلمني جني ام خمس اسنين
رهام:انت ماتستحي شلون تبوسني يااا
قاطعني وهو يضحك
مشعل:زعلانه عشان بوسه على خدج هذا "وبسرعه"هذي وحده ثانيه على الخد الثاني عشان مايزعل
نحشت بسرعه وطلعت برا الغرفه وهو منفجر من الضحك,كانت خايفه حد الفزع تفكيري طول الحفله مشتت حسيت اني سويت جرم فضيع0
مر اسبوع على السالفه وكنت مشوشه ولكن ظل فيني شعور لمتنان اللي كنت خايفه حتى بيني وبين نفسي اطلعه .اعترف اني ممتنه لمشعل بغض انظر عن قصده من اللي سواه ,هو اول من انتبه لي ولانوثتي ,يمكن قصده قبله لبنت صغيره بس انا متاكده ان القبله الثانيه كانت على خلاف الاولى شعور جميل اتحسه كل بنت لما تشعر بهتمام الجنس الثاني0
وفي جمعه من جمعتنا دار حديث بين البنات بخصوص مشعل
مريم:انا كلمتها وقالتلي بعضمت لسانها انها تكلم مشعل
ساره:هذي دايم سوالف مشعل اخوي
مريم:ساره اسمحلي اخوج ماخلا احد
منيره:لايكون قلتي للبنت انه ولد عمج
مريم:ليش مجنونه قلت انه رفيج اخوي
فاطمه:وشسم سعيدة الحظ يحظي هههههه
مريم:مها
ساره:عاد اتصدقون في شي متغير في مشعل
ريم:شنو؟؟؟ تاب يعني
ههههههه الكل ضحك لانه من سابع المستحلات بنسبه لشخصيته اللي نعرفها
ساره:لا صدق الولد متغير اول كنت اعرف اسم البنات اللي يكلمهم من تلفونه او يكتب فيهم شعر بس هذي المره كاتب بس حرف
منيره:أي حرف ؟؟؟
ساره:r
فاطمه:مالت عليج من اليوم تقولين متغير ومتغير وآخرتها يكتب حرف,بل عقل ياذكيه اكيد الاسم ريم او رحاب او رهام هههههه
الكل ضحك بس انا فزيت مثل الملسوعه
رهام:ليش اسمي مافي غيري
مريم:ليش زعلانه قلنا اسم ريم بعد وفاطمه اتغشمر
رهام:مااحب الغشمره الثقيله هذي
منيره:رهام لاتسرين حساسه كلنا كنا نتغشمر
حسيت بالحراج واحس اني لفت انظارهم لردة فعلي وبدون اراده مني بكيت وبررت الموقف
رهام:دايم فاطمه تحرجني وتحرش فيني
فاطمه :حقج على راسي بس لاتبكين"وباست راسي"
غيروا الموضوع بس حسيت اني جاهل بتصرفي اللي سويته وحسيت بخنقه فرحت دار جدتي.
دخلت وسولفت معاها بس بسرعه خلص كلامنا لان
جدتي:رهام يمه شغلي التلفزيون بدا المسلسل
رهام:انشاالله
جدتي:علي الصوت مااسمع
رهام:زين الحين
جدتي:لا بعد
رهام:بعد مافي اعلى من جذي
جدتي:خلاص زين
غرفت جدتي مثل غرفت كل عجوز فيها سرير وغرفه وتلفزيون ونص قعده وثلاجه
رحت وقعت على الكنب وكان عند باب الغرفه تقريبا ورا جدتي يعني ماتشوفني لانها مع المسلسل كنت لابسه بنطلون جنز وبدي اسود عليه اكسسوار فضي واذكر ان ماصارلي سبوع متحجبه
وندمجت مع مسلسل جدتي وبين ماكنت اشوف التلفزيون حسيت ان في احد مر صوب الباب لفيت انطر احد امر بس قلت يمكن الخدم ,وبس لفيت راسي صوب التلفزيون الى اللي نط من الباب وقعد جنبي وقال"بصوت خفيف"
:شلونج رهام
لفيت على مصدر الصوت وشهقت شهقه "ااااااااااا"
مشعل:لهدرجه اخوف؟؟؟
رهام:برا غرفه لو سمحت
مشعل:الله يسلمج بخير
رهام:انت اصمخ ماتسمع قوم
مشعل:اسمع كل اللي ابي اسمع واللي ماابيه مااسمعه
رهام:خلاص انا بطلع
وقفت عشان اطلع وقف قدامي
مشعل:وين؟؟
رهام:بطلع ولا ممنوع
مشعل:ليش زعلانه تبيني اطلع
رهام:ياليت
مشعل:اوكي بااي
لف وراح صوب الباب بس وقف
مشعل:نسيت اقول شي اليوم انتي حلوه
طلع ورديت مكاني وانا عيني على الباب وقلبي يدق جنه يبي يطلع من صدري
شنو سوت كلمة مشعل فيني اه شي اعجز عن وصفه بس اللي اقدر اقوله انه غير كل شي في حياتي صرت احب اسولف وسمع اغاني وقرا شعر تغيرت بمعنى الكلمه صار فيني ثقه بنفسي ولكل لاحظ هذا الشي بس بيني وبين نفسي ماعترفت بهذا الشي قلت مثل ماقال اللى حولي رهام كبرت وودعت الطفوله مع ايماني بان مشعل هو سبب تغيري0
مررت 3سنين ماصار فيها شي يستحق الذكر واللي اذكره ان شي داخلي كان يكبر ويستوي على نار هاديه
وفي الكورس الاول من رابعه ثانوي تعب ابوي ومرض حيل وصبحت بس اداري حالته الصحيه ونفسيه اهملت دروسي,وامي كانت تزعل وتضايقت لشافتني مهمله في دراستي بس لما تشوف شنو اللي شاغلني تمسك انفعالها بس بين على ملامح وجها0
بعد مرجعات قرر الدكتور المتابع لحالة ابي انه يسافر ليجري فحوصات مكثفه بس ابوي:ماني رايح يعني ماني رايح
امي:ليش ياابو محمد حرام عليك صحتك
رهام:يبه ليش معاند كلها شهرين وترد الكويت
ابوي:وشنو الفرق بين برا وهني
امي:في مليون فرق كافي بنكون مرتاحين عليك
ابوي:اذا ربي كتبلي الموت مافي شي يمنعه او ياخره وانتي مامنه
رهام:يبه ليش الكلام هذا انشاالله مافيك الا العافيه .
امي:انا تعبت منك مافي غير اخوك حمد وبدق عليه الحين .
راحت امي ادق على عمي حمد وانا استمريت اقنع ابوي وبعد ساعه
ابوي:رهام راسي عورني من حنتج روحي غرفتج
رهام:مااروح الا بعد مااقنعـك .
ابوي:بتضيعين وقتج .
وفي هذي اللحظه دخل عمي مع امي
عمي حمد:السلام عليكم
كلنا ردينا السلام
عمي:اشفيه الشايب مايبي يروح
ابوي:انا شايب ومرتاح انتوا اشتبون؟؟
عمي:نبيلك الصحه والعافيه يا ابوا محمد
امي:قوله ياحمد عور قلبي وياه
عمي:شف يا شايب انا خلصت كل لوراق ولا تبي تضيع تعبي على الفاضي
ابوي:اني قايل من اول ماني برايح
عمي:الا بتروح بطيب ولا ترني بزخك وربطك وسفرك غصب
ابوي:لاحول ولا قوه الا بلله مصر يعني
عمي:وملزم وش عندك
ابوي:طيب ما روح الا بشرط
عمي:ابد ماقلت تم اشرط
رهام:كلنا موافقين بس سافر
ابوي:ما اسافر الا معاي رهام
رهام:انا
امي: رهام ماراح اتعرف لكم يا ابو محمد ومدرستها
ابوي:انتو وافقتم قبل لا اقول ولا بهو
عمي:انا ماعندي مانع لان معاك مرافقين انا واللي تبي
رهام:وانت اغلى من خلق ربي على الارض ببخل عليك بكورس من عمري وانت لو تطلب عمري اعطيك
امي:دامك تبي بنتك وبنتك تبيك كيفكم
ابوي ضمني لصدره:انتي خليج عند عيالج وانا بنتي معاي
عمي:يا ام محمد لاتشلين هم رهام مشعل بن محمد مدبر امورنا ورهام اميره وبس
والوعد الثلثاء الجاي جهزو انفسكم0
وبلفعل سحبت من المدرسه وجهزت نفسي بس اللي كان شاغل بالي اني من زمان ماشفت مشعل اكيد ثلاث اسنين اتغيره ’صدق كان يجي بالاعياد والعطل بس ما صدف اني اشوفه ويرجع هذا لعداتنا وتقليدنا لبدويه ,انا تغيرت وصرت اجمل بعشر مرات وبنات عمامي اللي كنت اشوف انهم اجمل مني صكيت عليهم بجمال الوجه والقوام الرشيق والكل كان يشهد في ذالك ومنهم الكاتبه ولا انسى كسوت الرحمان شعري الاسود اللي محد يماريني في جماله والحمد لله اللي من علي بهذي النعمه,كنت اتخيل شلون بكون شكل مشعل اكيد وسيم لانه من يومه مزيون , يذكرني ولا نساني؟؟ اساله واجد كانت تدخل راسي زياده عليها قلقي على ابوي المستمر0
اليوم الموعود قمت ولبست ومادري ليش حطيت كحل ومسكره لبست عباتي وملفعي وسلمت على امي وخواني كلهم ومع بعض التوصيات من امي ,وصلنا المطار وركبنا الطياره وما انسى احلى واحفل سنه بحياتي 2004مو من بدايتها من بدايت اقلاع الطياره
هبطت الطياره في ولاية(,,,,,,,)وفي المطار من بعد ثلاث سنين شفته, مشعل ماتغير مزيون ,كووول ,كان لابس بنطاون جنز ديرتي وبلوزه خضره عليها كتابه بالاسود و ضيقه مبينه تقاسيم جسمه كان كيوووت 0انا اول من شافه قبل ابوي وعمي بس ماعلمتهم ,لمحته بزحمت المطار بين كل الناس ما طولت وانا اطالعه بسرعه انتبهلي وتلاقت عيونا ودار حديث بينهم يصعب ترجمته
عمي:هذا هو ياابو محمد .. مشعل احنا هني ..
...بعد الضم والعناق والسلام ..
مشعل:حمدلله على السلامه عسى ماتعبتو.؟
كلنا: الحمدلله .. الله يسلمك
ابوي:لاهنت ياولدي يامشعل شخبارك ؟
مشعل:بخير دامك بخير
عمي:شفت لنا تكسي ؟؟
مشعل:لا معاي سياره .. هاذي بس جناطكم ؟؟
رهام: .. في وحده .. عند الكرسي .
مشعل:شلونج رهام ؟؟شخبارج
رهام:بخير الله يسلمك
مشعل لبوي:توقعت عمتي ام محمد وياكم
عمي:الشايب هذا مابغى يسافر الا برهام
ابوي:بذمتك يا مشعل في احد يقدر يخلي عيونه في البيت وسافر ؟؟
مشعل:ههههه "وطالعني".. اكيييد لا
حسيت بالاحراج بس كنت مستانسه على الحركه
طلعنا من المطار ولقينا سياره سودا وركبناها ..
عمي:شنو حجزت لنا؟؟
مشعل:شقه بس روعه فيها كل شي
ابوي:ليش يامشعل الفندق اريح واحسن لرهام عشان مانتعبها
مشعل:لاتخاف ياعمي في وحده كل يوم راح تجي وتنظف وترتب الشقه
رهام:وحده شنو جنسيتها؟؟
مشعل يطالعني من الجامه : عربيه بس طبااخه درجه اولى
عمي:وانت وين بتكون؟؟
مشعل:انا جاركم باب شقتي انا وربعي اقبال باب شقتكم
ابوي:الله يهديك يامشعل يعني كل ماطلعنا شفناهم لا تنسى ويانى بنت
مشعل مره ثانيه يطالعني:لاتخاف عمي انا قلتلهم وراحوا عند واحد من اصدقائنا بحريني
عمي:كفو يامشعل ماقصرت
مشعل يطالعني:حق و واجب من لنا اغلى منكم
وصلنا الشقه وكانت روعه ونظيفه ومرتبه .. كل شي كان فيها,عباره عن ثلاث غرف ,مطبخ,صاله,حمامين وانتو بكرامه" اثاث غايه بالبساطه
ميل للمدرن ومثل ماقال مشعل باب شقته على باب شقتنا0
دخلنا الشقه ورحت مع ابوي غرفته ورتبت ملابسه وطلعت له ملابس نظيفه وفوطه ودش يسبح
طلعت ولقيت عمي ومشعل بصاله
عمي:رهام حبيبتي سولنا شاي
مشعل :تلقين في المطبخ كل شي
دشيت المطبخ وسويت لهم جاي وطلعت
عمي لمشعل:باجر الصبح لاتاخر بالقومه
مشعل:اوكي.. بس انت خلك جاهز
.. بعد ماحطيت الشاي ..
رهام:عمي وين جنطتك؟؟
عمي: ليش؟؟؟
رهام:برتب اغراظك وطلع لك ملابس نظيفه
عمي:احدقالج اني شايب مثل ابوج
رهام:ههههه لا بس ابي اريحك
عمي:لاتريحني ولا شي روحي نامي ورتاحي
مشعل:خلاص رهام خليه سويتي اللي عليج
رهام:وانت مشعل ماتبي شي
.. مشعل طالعني بنظره خبث..
عمي:اش يبي بعد؟؟؟ احنا ضيوفه مو هو
مشعل مع بتسامه رقيقه:مشكوره رهام ماتقصرين
ماقدرت مارد البتسامه ببتسامه ونظره بنظرع,راح مشعل شقته ودشيت غرفتي كنت تعبانه حدي ماصدقت اخذ شور ونمت على طول,وكانت نومه عميقه ماقمت منها الا على صوت جرس الباب,فزيت من فراشي وطالعت الساعه وكانت8,00قمت بسرعه وطليت على الصاله مالقيت احد رحت غرفت ابوي لقيته نايم,وصوت الجرس مستمر رحت صوب الباب
رهام:منو؟؟؟؟؟
مشعل:رهام انا مشعل بطلي
رهام:ليش وين عمي حمد؟؟؟؟
مشعل:انا وياه في السياره قومي عمي وجيبي الاوراق الطبيه وانزلو
رهام:واكي روح وحنا بننزل وراك
قومت ابوي ولبست وجبت كل الاوراق الخاصه بحالة ابوي,وقعدت انطر ابوي يخلص,كنت لابسه بنطلون جنز فوقه نفنوف زيتي لين الركبه وملفع زيتي
وبين ماكنت انطر ابوي سمعت صوت الجرس ورحت ابطله
رهام:منو؟؟
مشعل:انا بطلي
بطلت الباب
مشعل:صباح الخير انشالله نمتوا عدل
رهام:صباح النور نمت نومت المرهق
مشعل:اسم الله عليج
حاولت اخفي احراجي وناديت ابوي
رهام:يبه عمي ينطر تحت بسرعه
مشعل:تريقتوا
رهام:لا انتوا استعجلتوا علينا
مشعل:حتى انا قمت على صوت عمي حمد ماخلاني اشرب ماي بس الحين شيعت
رهام:شلون شبعت وانت ماكليت
مشعل:هههههه رهام انتي "وسكت"
رهام:انا شنوا؟؟؟؟؟؟؟
ابوي اهني وصل ,نزلنا كلنا وركبنا الصيارع
عمي:مشعل ليش طولت ؟؟؟؟؟
مشعل مرتبك:لا بس مالقيتها
عمي:ها تبون اريقكم ولا بعد المستشفى
ابوي:لاااا يابن الحلال انا اذا شميت ريحه المستشفى والادويه بتنسد نفسي
مشعل:عمي انت تبي التعذبنا
عمي:خلاص شوف مكان النتريق فيه
ودانا مشعل كفي شوب وتريقنا فيه ورحنا على طول المستشفى.. وفي المستشفى دخل مشعل مع ابوي لطبيب لقسم الفحوصات لمده ساعه نص
بعدين طلع مشعل بروحه
عمي:بشر يا مشعل
رهام:شنو قال الدكتور
مشعل:كل شي تمام بس يبي يخليه في المستشفه لاتمام باقي الفحوصات
رهام:شنووووو؟؟؟بس انت قلت ان ابوي بسوي فحوصات ويراجع بس
عمي:رهام لاتنفعلين لازم ابوج ينام في المستشفى وتمم لعلاج ولا ليش متعنين وجاين
رهام بكل عصبيه والدموع على خدها:لا مشعل قول لطبيب ابوي مايقدر يقعد في المستشفى اكثر من ساعتين الله يخليكم
مشعل:رهام انا ابيج اتساعدينا على اقناع عمي والسالفه راح تاخد اكثر من اسبوع ونص وانتي عارفه انه لازم يجري هالفحوصات ..صح؟
رهام وهي تبكي:بس .... انزين بحاول اقنعه
قرب عمي وظمني ومسح ادموعي
عمي:بس يارهام انتي عاقله بارك الله فيج
رهام:بس بنام وياه
عمي : رهام...توني اقول عاقله شلون اخليج انتي مع ابوج بروحكم واذا نمتي مع ابوج يعني انا بعد بنام ونسوي عليه زحمه واحنا جايين عشان ياخذ فصل من الراحه والنقاهه مع العلاج
مشعل:والمستشفى مو بعيده تقدرين تقعدين مع عمي طول اليوم بس وقت النوم.."وتقاطعه رهام"..
رهام:خلاص وينه الحين
مشعل حس بمدى انفعال وتوتر ريهام وخوفها على ابوها ..
دخلنا على ابوي وبعد محولات خياليه في اقناعه اقتنع ورضا ينام المسكين مع كرهه لريحه المستشفيات
مر اسبوع كان قمه في الملل من الشقه لين المشتشفا ومن المستشفى لشقه وعمي كان من النوع اللي مايحب يروح مكان مايعرفه ,وكان مشعل يحاول يقنع عمي انروح أي مكان نتمشى بس كان يقول لطلع ابومحمد تمشينا كلنا0
وفي يوم من الايام الممله ،كلعاده قمت انا وعمي لبسنا وطلعنا ويا مشعل قاصدين المستشفى وعند باب الشقه
عمي:لحظه نسيت بوكي انطروني دقيقه وراد
مشعل:شوف احنا بنقعد نتريق بذاك المطعم وانت الحقنا
عمي:خلاص بس اطلبولي وياكم
مشعل:ابشر
اول ما غاب عمي عن عيونا
مشعل:مشيتا
مشيت وراه وكان يمشي بسرعه وانا امشي شوي اشوي
مسك ايدي وقال: بسرعه
حسيت بكهربه فظيعه .. وتوتر كبييير .. شلون مسك ايدي؟؟!! .. امبيه مايخاف ؟ انا مو قاعده اتحرك .. هو اللي قاعد يحركني
.. وعبرنا الشارع عشان نوصل الكفي ,بس ..؟! مشعل لف لاتجاه غير اتجاه الكفي اللي اشر عليه,هديت ادي من ايده و وقفت
رهام:مشعل وين رايح انت قلت هذا الكفي
مشعل:تذكرت ان اكلهم فاشل بس في واحد الصوب الثاني احلى وشيف مسلم
رهام:وعمي بدق عليه بس انتي بسرعه
استغربت اصراره على السرعه بس قلت يمكن عشان مانتاخر على ابوي
مسك ايدي مره ثانيه بس كانت غير بدا يضغط عليها بقوه بعدين يرخي ,حسيت ان بعدنا اكثر لدرجت اني ماشوف عمارتنا,وقفت
رهام:مشعل لو سمحت ممكن اتقول وين المطعم اللي تقصده
وقف وعقد حواجبه وقال:انتي مازهقتي ماطقت اغلقه على هذي الحكره,صارلي اسبوع اقنع عمي امشيج وانتي ماحولتي اتبينين انج زهقانه
رهام:مشعل انا مو جايه اتمشى واضن انت عارف هالشي .. صح ؟!
مشعل:اوكي انا وياج انتي جايه مع عمي لانه تعبان وكل يوم تروحين تقعدين اقباله التسولفين لين ينام ولما ينام الظهر تقرين مجله لما يقوم في هلوقت عمي مو محتاج لج لانه نايم مافكرتي حتى تخذين لو فره في المستشفى
رهام:احد اشتكا لك
مسك ايدي وقال:لا بس احب اسوي الخير
سحبت ايدي وقلت:لو سمحت ردني
مشعل:تبين اتردين ردي بروحج
رهام:لا والله
مشعل:رهام خلج واقعيه الحين انا وياج انحشنا من عمي والحين معصب يدور علينا تبين تنزفين على شي يوى ولا تنزفين لانج مشيتي خطوتين
طلعته بنظرت اشمأزاز ,بس مسك ايدي ومشاني
مشعل:خليني اوريج اماكن روعه في احلى ولايه في امريكا
رهام:شوف انا بتمشا وياك بس مو معناه اني رضخت لك لا لانه ضايق خلقي ودي اشوف الاماكن اللي اهني
مشعل:وانا هذا قصدي وشي ثاني
رهام:شنو
سكت
رهام:شنو الشي الثاني
مشعل يحاول اغير الموضوع:في بحيره روعه تبين اتشوفنها
رهام:صدق مشعل
مشعل:وغلاج عندي
وضغط على ايدي...
مشعل:ليش ايدج بارده مع ان الجو رطب
مارديت عليه
وكمل:تخيلي حياتي في هذا المكان شنو تعتقدين
رهام:اكيد مستانس
مشعل:بالعكس اعد ليام عشان ارد الكويت
رهام:غريب
مشعل: ليش غريب من الطبيعي ان الانسان يحن لديرته وهله
رهام:لانسان اللي مو نفس شخصيتك
مشعل:شنو تعرفين عن شخصيتي
رهام:بدون زعل ؟؟؟؟
مشعل:بدون زعل
رهام:انك مثلا مغازلجي وعيار
مشعل:هذي صورتي عندج؟؟!!
رهام:هذا اللي سمعته
وقف وماحسيت ال وحنا بحديقه اتجنن
مشعل:وانتي ماتعرفين انه من الظلم انك تحكم على الواحد من شي سمعته ماشفته
رهام:انا مالي الا الظاهر واللي ينقال ..
وكملنا مشي
مشعل:والله يا رهام بربي اللي مااحلف فيه كذب اني مازت على اللي السويه اغلب الشباب منهم عيال عمي وعمامي نفسهم
رهام:ليش تحلفلي انا مالي شغل احلف لناس
وقف وهد ايدي
29-12-2007, 04:22 AM
مستحيل اعيش من دونك 
رد: مستحيل اعيش من دونك 
