الحقيقه يا جماعه انا بقالى كتير بتصفح المنتدى
ومش عارفه فيه ايه
يعنى كل المواضيع حسه انها مكرره
واسلوب مش حاسه انه عميق
انا مش عارفه ايه اللى وصلنا لكده
عايزين نتعمق شويه فى التفكير
مش عارفه اسئله دا حرام ولا حلال دى اتكررت كتييير اوى
انا معاكوا ان المفروض نسال ناس يعرفوا فى القران وكده
لكن مش لدرجه ان الاسئله بالتفاهه دى
النظره دى لا الجمله دى لا الحركه
فيه ايه للدرجه دى مش قريبين لربنا ومحتاجين حد فى النص يعرفنا ايه يرضى ربنا وايه يغضبوا
واى واحد تفكيره وداه لنحيه يفتكرها هى الصح ويبدا يعمل عملية غسيل مخ للشباب وياخدهم معاه باسم الدعوه
يا جماعه كل واحد فينا داعيه للاسلام فى مجاله ومكانه
باخلاقه واسلوب حياته اللى هيجذب الناس ليه ولدينه او ينفرهم منه
لكن الاسلوب اللى موجود دلوقت مش فاهمه يعنى
قصص منعرفش اصلها تتحكى وكانها لاطفال صغيرين
والعذاب العذاب العذاب
ياريت نهدى شويه
انا نفسى تعملوا كل حاجه ترضى ربنا وانتوا فاهمين وحابين دا مش خايفين ومرعوبين انكوا تكونوا بتغضبوا ربنا وحياتكوا كلها اصبحت اسئله فى اسئله
ياريت كل واحد يفكر شويه ويعمل لنفسه لسته كده ببعض اسباب احب ربنا عشانها
ويبدا يقرب منه بدون خوف ولا تردد ولا قلق
انا عن نفسى لما قعدت افكر مع نفسى لقيت اسباب كتير منها مثلا
ان ربنا هو اللى خلق ليا امى تخيلوا
خلق حد فى الحياه كده يغمرنى بكل الحب والحنان دا
ويوهب حياته ليا
شوفوا انتوا يبقى ربنا ايه
وفى مره كده وانا فى الميكروباص رايحه الجامعه
خطرت فى بالى فكره مجنونه
ياترى الرسول (ص) لما جاله جبريل عليه السلام
وكان مرعوب ياترى قال ايه
ايه الكلمات او الجمل اللى قالها عشان تساعده انه يتخطى الموقف
والاسلام مكنش لسه ظهر باذكاره وجمله اللى بتخلينا نذكر الله وتطمئن قلوبنا
واللحظه دى فى الميكروباص كانت لحظه رومانسيه جدا فى حب الله والرسول والاسلام
حاجات كتير اوى
ياريت المره اللى جايه لما ادخل المنتدى الاسلامى اشوف فيه مواضيع جميله تبنى جوانه شخصيات اجمل بتفكر وتستوعب
وخلينا نبدا بالموضوع دا
وكل واحد يرد
يذكر فى الرد بتاعه لحظه كده من اللحظات اللى ذكرتها
وفكره خطرت فى باله
حببته وقربته اكتر لربنا
معلش طولت عليكوا
سلام مؤقتا
09-03-2008, 11:21 PM
مش عارفه عنوان 
العرض العادي
