سنوات في عالم خفي

[lamino]

متابعينك و متشوقين أكثر
لله اخليك اكمل مشكور

[arabic_horse]

شكرا كتير Morf2010 وعلي فكرة دول كانوا جايين لهدف فقط وانتهي هانعرف بعدين بالظبط هما مين ..... وبصراحة أشكر كل من مر علي القصة واخجلتوني بشكركم الزائد والمقابل سأعطيكم جرعات الرعب كما يجب .. ههههههههههههه متخافوش يا جماعة كلها أمور العقل البشري يستطيع إدراكها والله بس أكيد طبعا مش كل العقول علي راي حبايبي إياهم عندما قالوا لي في إحدي المرات كل علي قدر علمه ..... صح يا جماعة ولا لأ ..... تصدقوا يا جماعة انا بقيت أقعد في شغلي أفكر في الجزء القادم وكيف أقدمه لكم بطريقة مسلية تنزع الرعب شوية من قلوبكم .... وإن شاء الله الجزء القادم تنبسطوا أوي أوي .......ههههههههه
تحياتي للجميع ........................

[arabic_horse]

الجزء الحادي عشر :
بعد أن دخلنا الشقة عند عودتنا من عند حماتي ومتعشيين تمام ونتيجة لأن الأكل كان دسم شوية دخلنا الشقة واسترحنا قليلا في الأنتريه وأنا طبعا مبسوط وطاير من الفرح إن مفيش حد تعب الليلة دي لا أنا ولا زوجتي ومنيت نفسي بليلة جميلة إن شاء الله نظرا لاننا احنا الاتنين كويسين والحمد لله ......... المهم قلت لزوجتي قومي اعملي لنا اتنين شاي لان الاكل كان كابس علي أنفاسنا .... قامت متثاقلة إلي المطبخ .......... طبعا لا انا ولا هي دخلنا غرفة النوم لسة ............ اه وما ادراك غرفة النوم ......... المهم عملت الشاي وجات قعدت معايا في الانتريه وفتحنا التليفزيون علي ما نشرب الشاي يكون الاكل اتهضم شوية وبعدين نقوم ننام ............. خلصنا الشاي والأمور تمام التمام والليلة تبشر بشيء جميل ..... وزوجتي قالت لي أنا هاقوم أغير هدومي ........... قلت لها أوكي .... قامت صاحبتنا راحت لغرفة النوم وإذا بها تصرخ صرخة جعلت الأكل يطلع في رأسي ........... انا بصراحة خايف أقوم من مكاني بس لازم أروح أشوف في إيه ؟ وجدتها واقفة مذعورة في الغرفة وتبكي بشدة ... لماذا ؟ علي فكرة انا نسيت أوصف لكم غرفة النوم ......... الغرفة كبيرة وفي منتصفها السرير ثم علي شمال السرير تسريحة الزينة عبارة عن مرايا كبيرة وعلي يمين السرير دولاب كبير واجهته كلها مرايات ثم امام السرير قطعة موبيليا اسمها السكرتارية عبارة عن مجموعة ادراج وأنا كنت حاطط عليها كاسيت كبير لزوم الموسيقي الخفيفة لإضافة الجو الشاعري بالغرفة والذي لم يزور هذه الغرفة مطلقا .... المهم دخلت الغرفة وجدت التسريحة والدولاب وهم من المرايات مرشوشين مياه كثيرة كما لو إن واحد جاب برميل مياه وسكبه بشدة علي الدولاب والتسريحة والأرض من أثار نزول المياه من المرايات تعوم في الماء .............. الله الله إيه ده بقي .... وزوجتي تبكي بحرقة وتقول لي أنا لازم أروح لما ما دلوقتي انا مش قاعدة في الشقة دي دقيقة واحدة تاني ...... انا قلت في سري شغل يا واد الجمجمة بيتك هايتخرب وانت لسة ما كملتش كام شهر !!!!!! قلت لها تعالي بس أفهمك ..... أنا فكرتك شوفتي عفريت ولا جن الله يخرب بيتك ..... بقي مش عارفة ايه المياه دي ؟؟؟ طيب تعالي بس برة في الانتريه أفهمك .... وهي أبدا لازم تمشي ......... صرخت في وجهها لكي تصمت وتسمع ما سأقول وإذا لم تقتنع فلن أمانع خروجها من الشقة ...... جلست علي مضض في إنتظار ما سأقول ..... قلت لها أنا هاقوم أعمل اتنين ليمون أحسن شكلك مرعوبة وتهدي شوية .......... طبعا أنا قلت كدة علشان أفكر هاقول إيه لها ....... بس وأنا في المطبخ جاءت الفكرة الرهيبة........ رجعت لها بالليمون وشربنا الليمون الذي هدأني أنا قبل منها ....... قلت لها إنتي إنسانة متعلمة ومدرسة يعني مربية أجيال عيب عليكي التخاريف دي تشتغل في دماغك وبعدين كل شيء في الدنيا له تفسير ..... قالت لي طيب فسر لي اللي شوفته بعيني ده؟؟؟ قلت لها بس كدة ؟ حاضر يا ستي بس لو معرفتيش إنتي من نفسك التفسير والله أنا هاكون زعلان جدا لأاني اتجوزت واحدة متخلفة ...... قالت لي معليش بقي نصيبك كدة قولي التفسير يا تيجي توصلني لأمي ...... قلت لها يا بنتي إحنا في الشتاء والمطبخ جنب غرفة النوم بالظبط يعني أي بخار أو دخان سيذهب مباشرة إلي غرفة النوم ........ طبعا كلام هجص في هجص أنا بضحك عليها به وكمان المطبخ شباكه كبير وبه مروحة تهوية يعني الكلام اللي بقوله لها ليس له علاقة بالواقع نهائيا ...... كملت وقلت لها وشيء طبيعي نتيجة إن الدنيا برد فالبخار اللي طلع من براد الشاي وهي بتعمل الشاي أتكثف علي المرايات وبقي مياه ......... ضحكت بسخرية وقالت لي شوية الدخان دول يعملوا كدة؟ قلت لها والله انا حزين إني بسمع الكلام ده من مدرسة فاهمة وعارفة ..... يلا بلاش دلع نقوم نمسح الزجاج بتاع المرايات والأرض وانا قايم قدامك اهو .............. مشيت ودخلت الغرفة وغيرت ملابسي وبدأت في النظافة وهي معي وأنا اغني وكانت كلمات الأغنية من تأليفي عبارة عن مخاطبة من بالغرفة بلاش يعمل كدة معانا إحنا مش مضايقينك في حاجة والذي منه والبنت ميته علي روحها من الضحك ....... بس والله العظيم انا من جوايا رعب لا يعلمه إلا الله .... وانتهت الليلة علي خير طبعا زي كل ليلة رعب قبلها نوم بخوف وقلق ............ مرت أيام والامور عادية وبعدين فكرنا نغير جو ونخرج يوم كامل برة البيت نتفسح والذي منه ......... خرجنا فعلا في يوم بدري من أوله وذهبنا لزيارة بعض الأولياء وبعدين جبنا فطار وفطرنا ثم ذهبنا إلي حديقة الحيوانات بالجيزة واتمشينا شوية فيها إلي أن وصلنا عند حيوان غريب مش فاكر أسمه تقريبا كدة فرس النهر وكان في المياه والراجل الحارس بتاعه يرمي له البرسيم بالحزمة مرة واحدة وصاحبنا فرس النهر يلتقطها زي ما يكون واحد يلتقط ترمسة بفمه وهذا الحيوان فمه كبير جدا ورأسه تزن حوالي طن والمنظر كوميدي بصراحة انا واقف مبتسم من اللي بيحصل إلا وانظر لزوجتي أجدها واقفة تنظر لي نظرة غريبة تريد ان تفترسني ...... أنا أستغربت تصرفها هذا وقلت لها في أيه...... قالت لي مش عارف في إيه؟؟ قلت لها والله ما أعرف ..... قالت طيب بتبتسم لمين ؟ قلت لها علي منظر رأس الحيوان الغريب ده وفمه ..... قالت يعني مش للحلوة اللي واقفة قدامك دي؟ طبعا الناس واقفة صف يمين الحارس وصف شماله بصيت امامي لقيت واحدة واقفة بوجه ملا ئكي سبحان الله في خلقه تبتسم لي .... أنا ذهلت والله العظيم الوجه ده شوفته قبل كدة ليلة الدخلة ام العيون الزرقاء ........ فاكرين ؟؟؟ ولا ترجعوا للجزء اللي فات ؟؟ انا بصراحة إرتبكت وقلت لها يلا بينا من هنا ومشينا من المكان غافلت زوجتي وبصيت للخلف لقيتها لفت وتنظر لي بحسرة كانها زعلانة إني مشيت ........ كان الله في عوني وعقلي والله العظيم يا جماعة ولا الأساطير ......... سبحان الله .......... قعدت أهزر مع زوجتي مفيش فايدة برضوا زعلانة وأقسم لها إني ما أعرفها برضوا مفيش فايدة ....... قلت لها طيب بذمتك وأنا راضي ذمتك القمر اللي كان واقف ده يبص ليا أنا ........ المهم الوقف عدي بسلام وخرجنا من حديقة الجيوان لزيارة بعض الأماكن القديمة في القاهرة زي الأزهر والحسين وخلافه ......... وحان وقت الرجوع للشقة وأنا سلمت أمري لله فعلا انا تعبت بجد والله كل يوم حكاية ورواية انا مش هاخلص بقي ولا إيه؟ كل إنسان له طاقة وأنا كدة عايش حكاية غريبة مش عارف اتصرف فيها وزي ما بيقول بيدو لوحكيت لحد هايقول عليا مجنون ولا عبيط ......... يبقي لازم استحمل للنهاية وعرفت إن النهاية قريبة جدا وإني مش هاعيش مع زوجتي ولا هاعمر معاها وحزنت جدا داخليا علي نصيبي فقد كلفني مشروع الزواج تحويشة عمري من عملي في التجارة والتي أنهكتني كثيرا فوضت أمري لله وكل هذا واحنا راجعين للشقة وإذا بها تقول لي سرحان في ايه ؟ في البنت بتاعة الجنينة صح؟ قلت لها خلاص بقي كفاية تهريج أنا دماغي مش رايق للخزعبلات بتاعتك دي ........... ووصلنا إلي البيت وصعدنا للي مفيش منه مهرب بس لابد من المواجهة بقي انا تعبت ومش هاسمح بالكلام ده تاني .......... دي مش تسلية ولا أنا جايب بنت الناس أبهدلها معايا..... ووقفت أمام باب الشقة أضع المفتاح في الباب .............................. يتبع

[lamino]

و لله الامر مشوق جدا
أصبحت اترك عملي و ابحث هل اضفت شئ جديد
أخي كان لله في عونك
اكمل مشكور

[سندريلا السعودية]

[morf2010]

متبعين يا كنج

[souka229]

يسلموااااااااااااااااااااااااااااااااااااااا

[9al3a]

inta ba9i 3ala had lhal ?.??

[بيدو الاحمر]

ممكن أقول حاجة
فى ليلة الدخلة
انت دخلت بالجنية يا حلو
كانت متلبسة فى جسد أمراتك
وأظهرتلك شكلها وانت طبعا أسف فى التعبير عملت اللازم
كدا كان برضاك دا اول الالتباس
وعلى فكرة انتوا كدا 3 مجرد أحساس باى مان

[فتاه حالمه]

بيدو ايه الاسئله دي

يا راجل عليك اسئله ولا شويش عطيه