الجزء السادس والعشرون
ليت الأمانــي بفلوس
--------------------
حيره..الفه..مشاعر غريبه..
هذا كان مجمل اللقاء الأول بين تركي وغلا..
والأهم كان راحة تركي اللي استشعرها بعد ماكانت حليلته..وفي اقل من ثلث ساعه طلع بعد ماودعها بهدوء ..
لدرجة انه نسى ياخذ رقمها.. او يوعدها بزياره ثانيه قبل رجعته الرياض..
وكل اللي سواه بعد طلعته من الباب انه شغل سيارته ومشى بشوراع الخبر بحيره..
اما عند غلا فطلعت غرفتها على طول والبسمه انرسمت بشفاها بتلاقائيه لحد ماسيطر عليها النعاس ونامت بلبسها واحلامها الخجوله سكنتها..
------------
فعلا مر اليوم بهدوء..وتغمضت عيون كثيره بدمعه او بسمه او امل ممكن يتحقق بالمستقبل
وجاء يوم الجمعه اللي اجتمع فيه الكل بيت الجد يوسف على الغداء بمناسبة ملكة تركي وغلا..
بعد الغداء بالتحديد
"اسكت ياماجد..وعصيبتك هذه بتعبني..!!"
ماجد\يعني شلون..اسمعكم تخططون وانا اناظركم..!!
سلطان يحاول يخفف التوتر اللي حصل بين ابوه واخوه وعبدالرحمن..وبنفس الوقت متفشل انه حصلت هالمشاجره بالمجلس قدام القاعدين\ياماجد..لله يهديك انت دخلت بالموضوع بدون ماتفهم..!!
ماجد\انا امس جاني تلفون المغرب انه هالصفقه اللي ناوين عليها بتخسر مليون بالميه..وانتوا بكل سهوله تبوني انطم وماأبدي رأي..!!
ارتفع صوت الجد يوسف بحده والتعب باين فيه\انت ماتفهم..قلت لك اسكـت.اسكـت..
قام ماجد من مكانه بتهور..ورمى نظرة استحقار لـ عبدالرحمن وكأنه يحمله المسؤليه كلها..وهو مايدري انه عبدالرحمن مو ناقص ابدا.. وطلع مثل النمر اللي يبيله ترويض
وسكت الكل بعد خروج ماجد وعم الهدوء والكل استحقر تصرف ماجد وخروجه قدام الرجال.. اما الجد يوسف صابته كحه قويه متتاليه ونابعه من صدره اللي ماسكه بقل حيله ووهن..اجتمعوا العيال عليه بخوف وهم يشوفون وجهه المحمر من شدة المه..
قرب منه محمد بسرعه وفتح ازارير ثوبه\جيبوا ماي بســرعه..يبه تنفس الله يرضى عليك..تنفــس
خذ سلطان جيك الماي وصب لأبوه بكاس وقربه لفمه..والجد استجاب لسلطان وفتح فمه
عبدالرحمن والذنب يحتوي كل مافيه\سلطان وين دواء عمي..يمكن ماخذاه..!!
سلطان بسرعه رد\لا انا شفته ماخذه بعد الصلاه..
ظل كل اللي في المجلس ملتمين حول الجد يوسف وعياله محاوطينه بخوف وهلع.. ويراقبون وجهه اللي واضح عليه التعب..والكحه اللي كل مالها وتزيد..حاولوا فيه يروح المستفى لكنه رفض بتاتا..
لكن كحته كان لها صوت معذب.ماقدروا يستحملون المه اكثر....وقرروا بالأخير ياخذونه بدون رضاه..
وكل هذا والحريم مايدرون عن الموضوع..ولاماجد اللي كان السبب الرئيسي في تعب ابوه..
قرب سلطان سيارته وركب ابوه ورى..وعبدالرحمن ركب قدام..
ووراهم سيارة محمد وبوتركي وبواحمد وجاسم..وبقية الشباب..
=======
جمانه\قرف..وربي قرف..بتبتدي الأمتحانات..!!ومافي الظهران..هذا اخر يوم بنجتمع فيه..!!
راوين واعتفس وجهها\كلنا لها..على الأقل انتي بالشرقيه..
جمانه\ولو والله مالي خلق..
ابتسام\حمدي ربك..ولا جلست البيت..اناقررت اخذ دورة حاسب..!!
فجر\حلو..هالأيام مطلوب كثير دورات الحاسب,,
ابتسام بابتسامه حزينه\شسوي والله من الطفش..على الأقل اسلي وقتي الضايع على الفاضي..
فجر بصوت هادي لأبتسام\..شخبار عمي..!!
ابتسام استغربت من سؤال فجر المفاجأ..لكنها ردت بسرعه\زين..الحمدلله..
فجر\تصدقين لي فتره ماشفته..
ابتسام\تسأل عنك العافيه فجور..مافي شي جديد..وسكتت لأنها فعلا ماعندها شي تقوله بالنسبه لأبوها..
هل عندها القدره عشان تقول ابوها تجي أيام ماتشوفه.!!وعايش بعالمه الخاص الحزين..!!
للأسف ماتقدر..لأنها تعرف اجابة سؤالها..
لكن اللي مضايقها اكثر انه بوجود الوليد كانت تشوف ابوها اكثر..وبسفرته ماصارت تحس بوجوده من الأساس..
حست فجر فيهايوم شافت وجهها اللي تغير يوم سألتها..وحاولت تغير الموضوع
جمانه\اموت واعرف سماح شعندها مع غلا..!!
راوين بضحكه\يمكن تعطيها بعض تعليمات القفص الذهبي..!!
جمانه واستنكرت الموضوع\حشى تو الناس..!!لاحقه..
قطع سوالفهم صوت تلفون الصاله اللي ردت عليه فجر وكان سلطان
سلطان\هلا فجر..
فجر\هلا سلطان خير تبون شي..!!
سلطان\لا اسمعي اللي بقولك اياه ابوي بالمستشفى لأنه تعب علينا
فجر بخوف\لاتقول..شفيه جدي..
سلطان\قصري صوتك..
فجر حاولت تهدي نفسها لكن قلبها يرجف\طيب..واللحين..
سلطان\لاتقولون لأحد..وعطيني هند..بس لاتخليني امي تحس..
فجر\ ان شاء الله..لحظه شوي..
نادت فجر عمتها هند اللي كانت شايله بأيدها عمر.اخذت عمر منها.. واعطتها السماعه..
وظلت تراقب عمتها اللي عرفت بالخبر وكانت جامده لكن واضح اظطراب اعصابها من مسكتها السماعه..
سكرت هند السماعه وجلست على اقرب كرسي..
فجر بمساواه\عمتي.ان شاء الله خير,,
هند\فجر..يارب..مدري شقول..!
فجر\لاتقولين شي..اذكري الله..
هند بعجله\بدق على جاسم.
فجر\عمتي دقي عليه بره..
قامت هند على طول وطلعت تدق على زوجها للي رد عليها وطمنها انه كل شي مستقر ولأنه فيه القلب تعب بسرعه..
من جهه ثانيه حسوا البنات انه في شي بالموضوع..وغلا وسماح اللي كانوا بعيدين شوي قربوا اكثر
وفجر حاولت تقول لهم الموضوع بهداوه..والكل انفعل وخاف..
غلا\ياويلي ..جدي..
سماح\بنات خلاص..لاتحسسون اللي جالسين..!!
جمانه\يعني المجلس مافيه احد..!!
غلا\وهذا اللي يهمك يعني..!!
جمانه وتنرفزت\ردي على سؤالي اول وبعدين تطنزي,,!!
فجر لجمانه\ايه مافي احد ليش..!!
جمانه\انتوا تعرفون انه جدتي تدخل عليهم..واكيد بتلاحظ صح..!!
غلا\ويه..شلون مافكرنا فيها..!!
راوين لفجر\دقي على سلطان خلي احد يجي مو كلهم يجتمعون هناك..وش بيسون يعني..!!
فجر\صحيح..خليني ادق..
دقت فجر على سلطان اكثر من مره وماكان يرد..وبالأخير قفل جواله وعرفت انه مشغول..
لكن اللي ماتعرفه انه بعد ساعه رجعوا الشباب البيت عشان يهدى الوضع بعد ماتطمون على جدهم..
---------
بو احمد\اخوك هذا بيذبحنا كلنا وبيرتاح..!!اكلملهه ومطنشني..
بو تركي\الكلام ماله فايده اللحين..ولاتكلمه خله على عماه..!!هو الخسران..
بواحمد\لابكلمه.خلي يشوف نتيجة افعاله..
محمد\اهدوا شوي..واجلوا كلامكم في البيت..
سكت سلطان وناظر عبدالرحمن اللي كان واقف مع احمد وجاسم..واشفق عليه هو يتذكر كيف خاف على ابوه ومتندم انه فتح الموضوع الشركه قدام ماجد....
وكلها ربع ساعه وطلع الدكتور واجتمعوا حوله
محمد\بشر يادكتور..!!
بو احمد\عسى خير ان شاء الله..!!
الدكتور ناظر سلطان بضيق\انا مو قايل لكم لازم مايتعرض لأي عصبيه..!!
سلطان تفشل وماعرف وش يقول..الدكتور عبدالله..دكتور العايله وبألأخص للجد يوسف ومتعامل معاه من سنين طويله وهو اكثر واحد يعرف مرض الجد...فرد بو تركي عليه\يادكتور الوالد عصبي..وانت عارف..!!
الدكتور\له اكثر من موعد ماحضرهم والمشكله اني مأكد عليه..لكنه عنيد..ولو انه ماتعب عليكم اليوم كان ماجبتوه اظن..
المهم ماراح يطلع الولد الا بعد التحاليل اللي مأجلها ويستحسن يجلي كم يوم عندنا..وان شاء الله خير..وتقدرون تتفضلون اللحين مالها داعي جلستكم..الوالد بنطلعه لقسم التحاليل وبعدها ألأشعه وبيطول..
عبدالرحمن\يعني هو بخير..!!؟؟؟
الدكتور وتنهد بضيق\ان شاء الله..لكن ارجوكم ااذ تهمكم صحة أبوكم لاتعرضونه لأي عصبيه..وقولوا له يترك شغله..عن اذنكم.
سلطان باستنكار\يترك شغله..والتجاره تجري بدمه..!!
محمد\لاحول ولاقوه الا بالله..
عبدالرحمن ووجه كلامه لهم\اعذروني انه السبب في هذا كلــ
بو احمد ماعطا عبدالرحمن فرصه يكمل كلامه\شتقول ياعبدالرحمن..لاتحط اللوم عليك..واحنا كلنا عرفين مين السبب..وابوي مانقدر نحكم عصبيته الشديده..
عبدالرحمن\والله مو عارف شقول..!!
بو تركي وربت عليه\لاتقول شي ياعبدالرحمن..رايتك بيضا يااخوي..خلونا نرجع البيت قعدتنا مالا فايده..ونجي المغرب..
عبدالرحمن\روحوا انا بتم..
محمد\محد بيتم غيري..وانت يابو تركي وراك طريق..ولازم تروح..وحتى انت ياجاسم..توكلوا على الله..
في هاللحظه درت الجده يوم دخلت المجلس وشافت الشباب قاعدين وماقدروا يتسترون بالموضوع اكثر وقالوا لها وقلبتها مناحه لمن جاو عيالها وطمنوها انه بخير....لكنها مازالت خايفه وماهدت الا لمن راحت مع سلطان المستشفى وخذت هند معها..
مر الوقت بسرعه..وغربت الشمس وهند رجعت بيتها بعد ماتطمنت على ابوها..وبوتركي رجع الرياض..وتركي مالقى الفرصه يشوف فيها غلا خصوصا في هالوقت الحرج وكان لازم يرجع الرياض ويشرف على "مبنى جنا"..
------------------
ماعرف ماجد عن دخول ابوه المستشفى الا من زوجته مريم اللي رجعت البيت وشافته بالصاله...وعلى طول توجه للمستشفى وشاف سلطان ومحمد واقفين وعبدالرحمن وامه جالسين على الكراسي..وماقدر يستحمل نظراتهم ..وقوى قلبه وسأل سلطان عن حالة ابوه..
بواحمد\بدري ياأخوي..
ماجد\ وش فيه ابوي
سلطان مارد عليه..وجن جنونه..لكن محمد تكلم بصوت كله تعب\مافيه ش الوالد شوية تحايل وبيقوم بالسلامه..
بو احمد وماسك اعصابه\ليش ماكنت ترد على التلفون..!!
محمد\يابو احمد خلاص احترموني على الأقل....وانت ياماجد ابوي مو ناقص تتعبه زياده..اللي فيه كافيه..واللي حصل يوم مانبيه يتكرر..فهمت..
ماجد ماكان عنده رد..هو بالأٍساس ماوده الأمور توصل لدرجة مرض ابوه .هو ماينكر انه غلط بحق ابوه..لكنه يعرف كل هالمصايب اللي تتحذف عليه سببها عبدالرحمن..من اول ماتزوج اخته سما وهو رافض هالزواج..وخصوصا لأنه غريب عنهم بحكم انه كويتي.. وحاول اكثر من مره انه يوقف ضد هالزواج لكن محد سمع رايه دام ابوه واخته موافقين..وصار اللي صار..وحقد عليه اكثر يوم عينه ابوه وكيل على الشركه اللي تحتها بيكون المصنع..
وكل يوم يزيد الحقد بقلبه على عبدالرحمن ..وكل يوم يخطط لأمور كثيره ضده..
وموعارف وين بترسيه هالأفكار..لكن اللي يعرفه لازم ينفي عبدالرحمن وبأسرع وقت
ومن كثر ماخذته هالأفكار لبعيد انصدم يوم شاف الكل اختفوا من حوله..لف جهة امه وماشاف احد وعرف انهم دخلوا الغرفه.سرع من خطواته ودخل وراهم..
========
بعد مرور يومين على الأحداث..طلع الجد يوسف بالسلامه.ورجع كل شي مثل ماكان.. ولاكأن شي صار بتاتا ويمكن كثرة دخوله المستشفى بسبب مرضه اعطى الكل طابع انه هالوضع طبيعي وممكن يصير بأي لحظه..
-------------
تولهـت عليـه
هذه الجمله اللي ممكن تعبر عن حالتها طول هاليومين اللي مروا..
هي ماتعرفه..عشان تتوله عليه..
لكن يمكن حظوره..او ابتسامته الهاديه هي اللي اشتاقت لهم..
مر على بالها موقفها معاه يوم شربها العصير..بذيك اللحظه شعرت انها ماهي عايشه بألأرض..حست مالها جاذبيه تثبتها..حسته بلحظه انها طايره لفـوق..واللي مثبتها كان تركي اللي بوجوده حسسها باأحلى لحظه ممكن تعيشها..
صحيح هو صدمها بحركته..لكن بنفس الوقت حسسها بشعور جميل تمنت لو يطول اكثر..
وتوها تستكشف فيه جديد..دايما يصدمها باأمور تجهلها..
كانت تتوقع بتشوفه الجمعه قبل مايرجع الرياض وهيئة نفسها لهالزياره..صحيح هو ماوعدها..بس كانت تظن انه هالأمر بيكون..
وللأسف ماكان..
ماتدري هو من حقها تقول هالكلمه والا لا..!!لكن بالفعل هي متوله عليه..
خذت القلم الأحمر اللي ماسكته بايدها وكتبت بأول صفحة كتابها اسمه بتلقائيه
"تركـي"
غمضت عيونها بأرق وخذت غفوه قصيره على طاولة مكتبها
سمت صوت ازعج غفوتها..ويوم انتبهت عرفت انه تلفونها يرن..
مدت ايدها الطويله وهي لازالت على وضعيتها وظغطت على رد
غلا\الـو
جاها صوت رجولي..\هلا
ابعدت غلا السماعه عن اذنها..ودققت بالرقم..وكان غريب اول مره تشوفه..
وعرفت انها غبيه ومتهوره بعد!!؟..كيف ترفع السماعه هالحزه..!!
كل هالأمور مرت بثواني ببال غلا..لكن الصوت رجع ثانيه وهالمره كان غير وباحساس غير..
:
:
تركي\غـلا
رفعته..وكيف ماتعرفه..!!هذا صوته اللي رن باذنها طول هالأيام
غلا بخوف ووله وحيره\تركـي..؟!؟
كان تركي طول هاليومين في باله غلا..وموعارف كيف يوصل لها..ولمن تعب من التفكير قرر ياخذ رقمها من راوين اللي انصاعت له وعطته بدون أي اعتراض..ويوم راح لمكتبه العصر قرر يحاكيها اذا فضى..لكن شغله المتكدس شغله وماحس الا بالساعه 11 واغلب الموظفين رجعوا لبيوتهم ماعدا المكاتب اللي بالطابق الفوقي..
وبلحظه حس انه هذا الوقت المناسب عشان يكلمها وخصوصا انه المكان فضى..وعم الهدوء..
طلب له قهوه عربيه..وسكر المكتب..وكلمها من تلفونه والنوم بدى يداهمه لأنه هذه قومته من ست الصبح..
رجع تركي لصوت غلا..وابتسم لأنها عرفت صوته.
سند ظهره على الكرسي ورد عليها\معاك تركي
غلا وقلبه يخفق\لحظه
تأكدت غلا انه تركي.. ومن ارتباكها ماعرفت وش تسوي.. عدلت وضعيتها وطوت الصفحه اللي فاتحته بكتابها.....و رتبت نفسها بسرعه وظبطت لبسها اللي مو محتاج تظبيط.. ورفعت شعرها عن عيونها بطرف اصبعها..وخذت نفس طويل..وجلست على الكرسي ورفعت السماعه
غلا بخجل\سوري
تركي\خذي راحتك وسكت ثواني...ورجع يتكلم بصوته الرجولي..عسى ماازعجتك..
غلا\لا عادي
تركي\شخبارك ..
مسكت غلا جبينها وحست بحرارته ورجعت ترد عليه بسرعه\الحمدلله..وضاع صوتها من الخجل لكن قوت نفسها وردت..وانت.!!
تركي\انا بخير..
وسكت..وبالمثل غلا سكتت..وعم الهدوء..
كانت انفاس تركي هاديه..وثابته..لكن غلا كأنها بوسط محيط والأمواج تتحذف عليها من كل صوب..تبي تتنفس بس مو قادره..
تركي\بدت امتحاناتك..!!
غلا\ايه بكره ببدى اول امتحان وان شاء الله خير..
تركي\يعني ضيعت وقتك..!!
غلا بتهور\لا بالعكس..وسكتت تستوعب كلمتها وطلعت غصبن عنها كلمتها المعتاده....."ياربـي"..
تركي حس فيها وابتسم على كلمتها الأخيره اللي ماطتها بدلع ..وعذرها..وخصوصا لأنها اول مكامله بينهم..عشان كذا ماحب يطول عليها..لكن في كلمه بخاطره ووده يقولها قبل مايسكر
تركي\غلا
غلا\نعم
تركي بصوته الرجولي\ماأطول عليك..وبينا تلفون طيب..
غلا بخجل وتتمنى انه يطول معاها\اوكي
تركي\بسكر اللحين..لكن حاب اقولك شي..
غلا وكل جوارحها معاه\تفضل
تركي\كنتي حلوه الخميس..سلام
قفل تركي الخط..وماكان منتظر جواب من غلا..لأنه عرف انها ذابت بعد كلمته..
وفعلا غلا ذابت وماعرفت تنزل السماعه من اذنها
ولاقدرت تفتح عيونها اللي مسكرته بشده
لكنها عرفت تحبس انفاسها.!
==========
من اول مارجعت بيتهم وهي منشغله بدراستها..ومامداها تشغل النت..
واليوم لقت الفرصه عشان تفتحه..
واول شي فعلته شيكت على ايميلها وقررت ترسل للوليد رساله
وهالقرار اللي اتخذته ظلت فتره تفكر فيه من جميع الجوانب..
وعرفت انه الحل الوحيد والمريح للطرفين..
وبكذا بترتاح نفسيا وبتريحه من طول الأنتظار..
وهذه الرساله بتكون الأولى وألأخيره..
كانت كلماتها عفويه نابعه من قلبها ومسترسله وبدايتها
السلام عليكم
ولد خالي الوليد..
انا فكرت كثير قبل ماأرسلك..وفكرت كثير بكلامك اللي قلته بالبحرين وبمكالمتك ..حتى اخر شي يوم تقابلنا بالماسن..وكنت فاهمتك لكني ماقدرت اقولها.لأن كثير اشياء تمنعني واولها عادتنا وتقاليدنا وديني.. انا مو ندمانه على أي سويته..ولاراح اندم بيوم وكلنا نمر بلحظات ضعف مانعرف نتحكم فيها بأنفسنا....وانت عارف..
مدري وش اقول..لكن بجاوابك اللحين بسؤالك اللي كنت تنتظره مني من زمان..
وممكن تقول وش هالجرءاه اللي فيني..!!لكن ماعندي خيار ثاني..
الوليد انا بنتظرك حتى لو تغيب سنين طويله
هذا جوابي..وبكذا ماعندي شي ثاني اقوله لك..
وانا كذا بكون مرتاحه
بنت عمتك
جمانه
=========
بفترة الصبح كان يوسف ماسك المنيو ومتسند على طاولة المحاسب ويفكر لبعيد..
انتبه له لؤي اللي كان يرتب الكراسي ولوح له بأيده
ويوم حس انه صديقه سرحان ناداه وهويقرب له\يوسـف
يوسف لف نظره على اللي يناديه شاف لؤي قدامه\هلا
لؤي بصوت خافت\شعندك من صباح الله خير بتسرح..
ابتسم يوسف بحزن\وهي عاد تفرق صبح والا ليل..
لؤي\صدقني صرت اجهلك..ماعدت افهمك.
يوسف بحسره\يكون افضل يالؤي..احيانا نمر بظروف والصمت يحكمنا..
لؤي\وبيطول هالصمت..!!
يوسف\الله العالم..خلها على الله يااخوي..تصدق فقدت الدكتور سمير..
لؤي\ليش من متى ماشفته..!!
يوسف ويعدل وقفته\لي فتره ماشفته..
لؤي\طيب روح له اليوم..
يوسف\انا كنت ناوي اروح له..اذا لقيت الوقت..
لؤي\روح له العصر وانا باخذ مكانك..
يوسف ناظر الزبون اللي دخل\من وين هالكرم..
لؤي\لاتخاف..اليوم الثاني بتاخذ مكاني غصبن عنك..بطلع مع عبير..
يوسف ابتسم بسخريه\قول من زمان..لاتمثل دور الكريم المهم..نشوف وش الترتيب بعدين.. في زبون توه داخل..
----------------
سجلت اليوم دورة حاسب التربوي وبتبدى دراستها من بكره
تحس انها اتخذت هالقرار بسرعه..وكل هذا بسبب وحدتها اللي اثرت فيها..
لكنها حست براحه مدام هذا الدراسه بتشغلها عن امور كثيره..
لطيفه\ابتسام..ابتــسام..
التفت ابتسام لمرت ابوها بضجر\خير
لطيفه\لي ساعه وانا أناديك..ليش ماتسمعين..!!انا بطلع عند اهلي اتغدى..وخلي بالك على عزيز..
ابتسام\ان شاء الله..ابوي فيه.!!
لطيفه\يعني وين بيروح..بتلقينه فوق بغرفته..لبست طرحتها وطلعت
بعد ماطلعت لطيفه دق تلفون البيت..وكان الوليد..خبرته ابتسام بالدوره اللي سجلت فيها..والوليد كان مؤيد هالفكره..
الوليد\حلو ابتسام..على ألأقل تسلين نفسك..
ابتسام\هذا انت قلتها اسلي نفسي..اقول الوليد
الوليد\هلا
ابتسام\مافي اخبار
الوليد فهمها على طول..لكن ماعرف وش يقول لها..\مافي جديد ابتسام لكن صدقيني انا متفائل..
ابتسام\ياخوفي ياوليد..
الوليد\لاتخافين ياابتسام..
ابتسام وحاولت تغير الموضوع\طيب متى اجازتك..
الوليد\لسه بدري اظن بعطلة الحج..!!
ابتسام انصدمت\يعني ماراح تكون موجود برمضان..
الوليد\للأسف لا..
ابتسام بتهور\ارجع يالوليد..ارجع خلاص..
الوليد\ابتسام
ابتسام\.......
الوليد\ابتسام
ابتسام ودموعها هلت غصب\نعم
الوليد\تصيحين..!!؟
ابتسام ومسحت دموعها\لا يالوليد..انسى خلاص..
الوليد\لاتخليني اندم اني قلت لك..!!
ابتسام\غصبن عني..افهمني..
الوليد\الله كريم ياابتسام..الله كريم..قولي الله كريم
ابتسام\الله كريم..
الوليد\شخبار ابوي..!!وعزيز وحشني..!!
ابتسام\كلهم بخير لاتحاتيهم..
الوليد\طيب ابتسام مااطول اللحين خسرتيني..
ابتسام ابتسمت\يالبخيل..
الوليد\شايفه تحتي بنك..!!
ابتسام\زين..اهتم بنفسك..والبس ثقيل..اعرفك خبل.
الوليد\ان شاء الله ماما..اوامر ثانيه..
ابتسام\لا حبيبي
الوليد\سلمي عليهم..
ابتسام\مين بالظبط..
الوليد\كلهم..سلام..
ابتسام\مافي سلام خصوصي..
الوليد وفهمها \لا مافي..سلام..
ابتسام\الله يحفظك..
----------------
بعد ماجهزت الفطور لأحمد وتأكدت انه طلع نامت وماصحت الا على اذان الظهر
خذت لها دش سريع وصلت الظهر..وسوت له الفطور لأنه مالها نفس تطبخ غداء تاكله لوحدها...
جلست على طاولة المطبخ وظلت تاكل بدون نفس..
ويوم خلصت غسلت الصحون ورتبت المطبخ خذت دواهاوشربت كاسة ماي.. ورجعت الصاله..فتحت التلفزيون
ورست على برنامج طبخ..طولت عليه شوي..
وهي تفكر بحياتها مع احمد..
والحقيقه تقال مامر عليها يوم مر معاه..صحيح كانت في بعض الخلافات البسيطه وهذا شي عادي يحصل بين أي زوجين..لكن بشكل عام حياتها مع احمد كلها هدوء وحب وتفاهم..
احمد اعطاها الشي الكثير..
حسسها بالأمان..بالطمأنينه..حسسها انه كلمة حب لها معاني كثيره..
مو كلمه وتنقال.
هالكلمه ايقنت انها افعال اكثر من اقوال..
علمها الصبر..وهي اللي ماكنت تعرف وش معنى الصبر..
علمها حلاوة النظام..اللي كانت تكره من يوم وهي صغيره..
كل شي كان له نظام في حياة احمد..الأكل له نظام..النوم له نظام ومواعيد..
في البدايه كانت تكره هالخصله في احمد..لكن صار اللي ماكانت تتوقعه..حبت هالنظام لأنه من احمد..
كل يوم يزيد حبها لأحمد..
وتتمنى لو يجي يوم وتعطيه نص اللي عطاها اياه..
والأيام كفيله برد هالجميل الكبير..
لكن اللي لازال يأثر فيها بجنون.. خوفها وترددها وصمتها اللي يحتويها وكان من الصغر والسبب الرئيسي مرضها اللي ماشفت منه..
هالثلاث امور حاول يمتصها احمد بطريقته الخاصه..و كانت مسألة وقت عند سماح..ساعات تحس انه كل الأمور تغلبت عليها..وساعات تحس انها رجعت مثل ماكنت..لنقطة الصفر..
وهذا خوفها الأكبر.لأنها تتاثروبقوه باي موقف تتعرض له..وهذا شي طبيعي يحصل لها..
تكره الخوف تكره التردد تكره الصمت..
لكن الحقيقه مره..
--------------
وبعدين وش صار.!!
غلا\سكر السماعه..
جمانه وقفت منصدمه..وظحكت\بوجهك..!!
غلا باحراج\وهذا اللي هامك انتي..!!
جمانه\يافشيلــــتك ياغلا..ومستانسه عزيزتي..!!
غلا وحمر وجهها\اصلا لو ماقفلها اللي اللي بقفلها بوجهه..!!مايستحي ..!!
جمانه\يعني بتقولين لي انك مستحيه اللحين..!!
غلا\وليش ماأستحي..ماأحس..والا مااحس..!!
جمانه\الأثنين..ههههههه الصراحه بداية اول مكامله تبشر بالخير..!!
غلا فصخت نظارتها ورصت بأسنانها\تتطنزين..!!
جمانه\لا مااتطنز..شفيك..خذتيها جد..!!
غلا\ماأخذتها جد..
جمانه\ويه عصبوا العالي..!!وش بيراضيهم اللحين..!!
غلا وهي تمشي\بتراضيني العجوز باأحلى عصير بهالحر..!!
جمانه\ومن حلاة الكافتيرا وعصيراتها..!!حدك ببسي..!!
غلا\عادي امشي..
وبعد مادخلوا الكافتيرا..وطلبوا..
جمانه\اقول غلا..
غلا\تسمعك غلا..!!
جمانه وتناظر عيونها\قبل كل شي فصخي هالنظاره..ماأظن له داعي..!!
اظحكت غلا بدلع وفصخت النظاره\وهذا فصخناها...قولي..!!؟
جمانه ظلت فتره ساكته..وغلا تتظرها..
جمانه\انا
غلا\ايه
جمانه وارتبكت وقالت بظجر\اوف مدري شقول..
غلا\قولي ياعمري..لاتستحين..
جمانه وخزتها\مولابق..
غلا\شنوا اللي مو لابق..!!
جمانه\مو لابق عليك هالشخصيه..لاتسوين نفسك دكتوره نفسيه..
غلا\ههههههههه يقطع بليسك..تكلمي شوقتيني.
جمانه\طيب اسمعي..
غلا\اسمعك عيوني..
جمانه\امس رسلت للوليد
غلا شرقت بالببسي..وجمانه انفجعت\شوي شوي شفيك..!!
خذت غلا منديل ومسحت فمها\صج ..!!وش هالتطورات..!!
جمانه\لاتطورات ولاشي..هذه الرساله لي فتره وانا افكر فيها..!!وحسيت انه هذا القرار اللي لازم اتخذه من زمان,,صدقيني غلا اللحين ارتحت
غلا\مافهمت..
جمانه بحيره واضحه\مدري شقولك..لكن احس اني كنت طول هالفتره متوتره وخايفه لأني كنت اعرف انه اللي افعله غلط..لكن بعد تفكير طويل قررت ارسله وانهي كل شي برساله..وماأكذب عليك قلت له عن جواب سؤاله اللي سأله ابتسام..
غلا منصدمه\والله
جمانه\ايه انا كنت عارفه انه ينتظر جوابي..وبليز لاتعلقين انا كذا مرتاحه..صح اني كنت جريئه لكن بكذا بسكر ابواب كثيره..وصدقيني انا متفائله خير..احس انه هو برضوا بيرتاح..
غلا\خلاص جمانه..اهم شي انتي مقتعه باللي سويته..وماتدرين وين الخيره فيه..واهم شي انه سالفة الماسنجر تقفلت..
جمانه\بهالموضوع لاتخافين انا بينت له انه هذه الرساله الأولى والأخيره..
آآه ياغلا شكثر انا مرتاحه اللحين..لكني احس بخوف..موعارفه تفسيره..!!
غلا \ذكري الله..وانسي كل شي..
جمانه\بحاول انسى..لكن بظل اترقب ردة فعله..!!
غلا\تتوقعين فتح ايميله.!!
جمانه وحست برجفه لأول مره\مدري..!!
غلا\شفيك ترتجفين مو من براد الجو..!!
جمانه\مدري غلا..مدري..قومي وراي محاظره..!!
غلا\صبري بروح الحمام..!!
جمانه ومالها خلق\ليش..!!
غلا\بظبط الروج بعد الببسي..!!
جمانه ورصت على اسنانها\رايقــه كثير..
===========
ماكان لها خلق تداوم اليوم..تحس بضيقه فظيعه..واختناق يحتويها..
دقت على ياسمين وسألتها عن الخبار بالسريع وطمنتها انها بخير..وقفلته منها..
نزلت المطبخ عشان تشرب لها شي..سوت لها كابتشينو وضافت ملعقتين سكر..
وشغلت الراديوا وظلت تقلب بالمحطات لمن رست على محطة السعوديه وكان فيه برنامج للداعيه محمد الضليع(شاكه باسم عائلته الي يعرفه يفيدني رجاء)
طولت عليه شوي وظلت تستمع بصنت وهي تشرب من كوبها.
كان الشيخ يتحدث عن رحلته لــ تايلند وبألأخص كان متوجه لأحياء فقيره كانوا معتنقين الدين ألأسلامي
في البدايه القى عليهم خطبه وكان روح التفاعل موجود بين الأشخاص نساء كانوا او رجال..وبوسط اللقاء وزع عليهم كتيبات واشرطه متنوعه..وبالنهايه دعاهم لمائده كانت بحظور بعض من الداعين والجاليات الأسلاميه..ومانسى يكافئهم ببعض الأموال اللي كانت مخصصه لهالرحله..
انتهى الكلام اللي القاه الشيخ ..وظلت فجر تفكر بهالعالم الكبير..اللي مهما كثرت ديناته بيظل الدين الأسلامي اول الديانات واخرها..وحتى لو الأنسان سكن باخر العالم بيظل هالدين موجود ومتماسك..وبيوصل لهم مثل ماكان في بداية رسالته.. وكانه توه مبعوث قوي وكله نور ورحمه..
حمدت ربها على نعمة ألأسلام اللي بتكون اعظم نعمه حصلت عليها..
وتخيلت لو لحظه انها مو داخله فيه..وش بيكون حالها..!!
تخيلت لو لحظه انها جاهله هالكنز العظيم اللي نهايته جنة الفردوس.
تخيلت لو لحظه انها كافره ومعتنقه ديانه ثانيه..واهلها مثلها..وماتت وهي كافره..!!
بتضيــع..!!
اكيد بتضيع..
وش الحياه بدون دين يحكمنــا..!!
مافي حياه ابدا..
قامت فجر من الكرسي وبداخلها همه عاليه..وحب كبير لدينها..وخوف من ضياع هالدين بزحمة الجهل ومشاكل الناس اللي كل يوم تزيد رجعيه وتخلف ورى الغرب.. وكل الضيقه اللي فيها اختفت بعد هالشعور الجميل اللي اثر على نفسيتها..
حطت الكوب على الطاوله..وطلعت من المطبخ لغرفتها..
لأنها نوت انها تصلي ركعتين شكر وحمد لهالدين العظيم..
وعرفت انها مهما بلغت من حزنها والمها بيهون..وبيكفيها انها عارفه ربها وماشيه بالطريق الصحيح..
صاب فجر همه عاليه وشعور غريب .توها تحس بحلاوة الحياه..توها تحس انه الدنيا لها جانب كله نور والمحظوظ هو اللي بيعرفه..
"ياحلو شعورك يافجر..كلنا كسبنا هالدين..لكن مين اللي يقدر هالنعمه..!!..
مين اللي يقول هذا ديني..!!وانا قول وفعـل..مين...؟"
17-06-2007, 11:00 AM
