الجديد... قصة و لا أروع خياااال.. رومنسية.. حب.. دموووووووووع.. أكشن.. تفضلوا بالدخول

[ديور]

بلييييييييييز كمليها بلييييييييييييز

[فنوون]

هيااااااااااااااااااا ننتظرك

[جــبــرنــي الــوقــت]

ألـــــف شـــــكــــــــر عـــلــى الــــطرح الـــرائــــع

تــــــحـــــيــــاتــــــــي

[أميرة الورود]

[أميرة الورود]

الجزء الثامن عشر
++++++++++++




يوسف\ســـــلام..
رمى يوسف جاكيته على جنب..وفصخ جوتيه وغط كل واحد على صوب..وراح المطبخ التحضيري وهو يحس بالعطش يبي يشرب شي..ومالقى غير قرشة ماي بـ باب الثلاجه....خذها..وشرب منها..
بدى لؤي بالكلام..ويتمنى يعرف وش صار بين يوسف والدكتور سمير..\أقول يوسف..ماقلت لي وش سويت مع الدكتور سمير..!!
حب يوسف يلعب باعصاب لؤي..ناظره بنظره غريبه وظل ساكت..ويوم حس باظطرابه..تكلم وهو يتقدم صوبه له\مافي شي يستحق الذكر....!!انت شفيك مانمت..مو من عوايدك..!!
ابتسم لؤي ابتسامه مو من خاطره\كنت انتظرك..
جلس يوسف جنبه ومسك ايده وتكلم بهدوء \ليش..!!تبي تعرف شي معين..!!
أستغرب لؤي علامه يوسف..مو هذا أسلوبه..معقوله قاله شي الدكتور سمير..!!عزة الله رحت فيها يالؤي شكوك يالؤي؟؟
لؤي\يوسف..يوسف..يوسف..اذا عندك حجي قوله..لاترفع أعصابي..
ضرب يوسف لؤي بالمخده اللي جنبه وهو لازال ماسك ايده..يحس بالأمتنان له..لكن مش قادر يعبر..يحس كل قواميس العربيه أنمسحت..
مايعرف كيف يشكر لؤي..
وده يضمه...يضمه هاللحظه ومايفكه ابدا..لكن أكيد بيسال ..وبيشك..!!وهو مايبيه يعرف..تنهد يوسف بعمق براحه وعيونه كلها حب وهوى لــ لؤي
ظحك لؤي على تنهيدة يوسف الطويله وعرف انه وراه شي.وفضوله المثير بيقتله\يوســـــف علامك..قول الزبده..شعندك..
يوسف بكل هدوء\..أحبـــك يالؤي..أحبـــك ياأخـــــوي..!هذا اللي عندي .. وهمس..فهمت اللحين..!!
كل الشكوك اللي في بال لؤي كانت صحيحه..يعني يوسف درى وماكبر الموضوع..يعني راضي....
أرتاح لؤي..وماقدر يقول شي.ولأنه متوتر ومش عارف كيف يتصرف..قام من مكانه على طول...لكن أيد يوسف مسكته مره ثانيه ووقف قباله.. وظل فتره طويله يناظر لؤي وكانه يشكره على كل شي فعله له يشكره على المأوى..والمسكن..والطمانينه والراحه..والحب..وألأخوه....وضمه على طول بدون أي كلمه..
ولؤي هنا ماقدر يستسلم وفتح ايده وضمه اكثر واكثر..
لكن ليش يحس بفراق يوسف..!!
ليش...!!
خانته دمعته وهو يتخيل فكرة انه يوسف يبتعد ويرحل عنه...
.وعلى طول مسحها وهو يدعي ربه أنه مايفرق بينهم الا المــوت
++++++++++++



الوليـــــــــــــد...!
طاحت قوى جمانه على الجدار اللي قبالها والسماعه لازالت باذنها....وهي تبي تتنفس..تحس بصعوبه في التنفس....
ماتدري تفرح..ولا تحزن..
ماتدري تبكي راحــه..ولا تبكي قهر..!
الوليــد كلمها..
الوليد ماجطلها..مانساها..ماطنشهـــا..
الوليـد وفى بوعده..
أكرهك يالوليد أكرهــــك..
الوليد متلهف على صوتها..وحتى على خنقاتها تلهف عليها.. وحب يسمع أي شي منها..وبيكتفي بالقليل..حتى لو همس منها\جمـانه.. تسمعيني..!
ماردت جمانه..وعرف الوليد أنها زعلانه..لكن أحساسه خطأ..
جمانه مش قادره تتنفس يالوليد..
خذ على خاطره وتضايق لأنها فهمت اللي تبيه وهو لسه مابرر موقفه ولاحكى..\طيب جمانه لاتتكلمين سمعيني بس..!!بتسمعيني صح..!!
واخيرا ردت لأنها فعلا تبي تسمعه..وجلست على السرير وهي تجاهد الهدوء\..اسمعك..
فرح شوي لأنها مابدت بالهجوم..ونزل من المدرج اللي بالملعب بخفه ووقف شوي عشان ياخذ نفس.. وكمل\أنتي أكيد تبين تعرفين ليش أنا كنت ابي أكلمك..وأكيد ابين تعرفين ليش ماوفيت بوعدي....
ظلت جمانه ساكته وكان هذا مو من صالح الوليد لأنه حتى هو منحرج ومش عارف كيف يبدى معاها..قوى نفسه وخذ نفس وتكلم عن كل شي\..أممم شوفي جمانه أنا بكون صريح معاك..لكن ارجوك لاتفكرين أني جريء لهدرجه..ورق صوته..صدقيني ياجمانه أنا مرغم أني اكلمك بهالموضوع..يعني بلييز لاتفهميني غلط..
وبدون شعور نطقت جمانه \تكلم الوليد..اسمعك..!!
وبهالكلمتين السحرتين الوليد عرف كيف يتكلم وكأنه منتظر الأجابه من جمانه\..أنا ماأدري أذا أنتي تدرين ببعثتي والا لا..!!ويمكن تدرين..!!لكن اللي أبي اقولك اياه..أني أمس جاني الخبر أنهم قبلوني في الجامعه اللي مختارها..وكنت حاط في بالي أني أدرس هالسيمستر هنا والثاني بامريكا و أتفاجأت أنهم قبلوني بهالسرعه..كنت متوقع المسأله تطول أكثر.و طبعا شي طبيعي أني بطول بالدراسه.. يعني بجلس تقريبا 4 سنين..4 سنين بهاجر عنكم..والله يعلم وش بيصير بــ ألأربع سنين..
جمانه حست انه قلبها اللي يتكلم هالمره\لازم..!!لازم تســافر..!!
ابتسم الوليد..وارتاح..يعني جمانه تحاتيني..!!متقبلتني..قوليها ياجمانه وريحيني..\أيه لازم اسافر...واذا تبين تعرفين ليش..أسألي ابتسام هي بتقولك..هذا مو صدد حديثنا اللي أبيك تعرفينه أنــــ....وسكت ثواني..وتكلم بصعوبه..والله مش عارف اشرحلك..
أنــا..وانتي..أممم..آآآه.. أنتي..وووأنـــــا..وغمض عيونه وقالها بسرعه..جمانه أنا أبي أخطبك رسمي..!!
\
\
\
شنوا..في هواء..لا مااظن..انه في هواء بالغرفة..جمانه سحبت الهواء كله..
خبت وجهها بالمخده ورمت التلفون بعيد عنها..
وظلت تتمتم في داخلها..لحقوا علي.
الوليد يبي يخطبني..
يــــــاويـــلـــــــــــــي..
والوليد بالجهه الثاينه يتكلم ويناديها كذا مره.وهي مو بوعيها..واستدركت الموضوع..الوليد لسه على السماعه.. ورفعت وجهها عن المخده وهي ترفع غرتها اللي دوم تشتكي منها....وومسكت التلفون باقوى ماعندها..
الوليد\جمانه..جمانه..جمـــانه..وينك..!!
بهدوء ردت لكن وقلبها كأنها معركة خيل من سرعة نبضاته\انا موجوده الوليد..!
ارتاح الوليد..خاف انها تسكر السماعه بوجهه..ركب سيارته بعد ماطلع من الملعب وشغل المكيف كله ورجع ظهره لورى\طيب ليش ماتردين..!!(سؤال غبي)
كرهته هاللحظه\..يعني شتبين اقول..!!
ظحك الوليد وكمل براحه\لاتقولين شي..يكفيني سكوتك..!!
ماتت جمانه..وماعرفت ترد اللحين..
صاير قوي وقليل أدب وماخذ راحته حيل..
وعشان تهرب من الموقف بتقوله انها بتسكر ..صحيح هي لحد اللحين ماعرفت ليش تأخر بمكالمته لكن مش قادره تكمل معاه..الموقف صار كبير عليها..والوقت تاخر\الوليد أنا مظطره اسكر اللحين..
رفع الوليد ظهره وبدى يحس أنه الوقت ضاع عليه\ليش..انا ماخلصت كلامي..
احتارت جمانه ودها تكمله.وودها تسكر...واسكتت..مش عارفه كيف تتصرف
وكمل الوليد\جمانه..ارجوك سمعيني للأخير..وصدقيني بتكون هذه أخر مكالمه وصدقيني ماراح اظغط عليك اكثر ..لكن عطيني دقيقتين أقول اللي عندي واسكر...اتفقنا..!!
جمانه واستسلمت لكلام الوليد وهي تتمنى تسكر قبل ماتنفضح بصوتها اللي كان هايم عكس طبيعتها\طيب..
بدى الوليد يسترجع الأحداث\أنا بعد ماجيت من البحرين كلمت ابوي عن الموضوع..موضوع بعثتي لأني كنت مرغم خصوصا انه ماعندي الوقت الكثير......وموضوعنا.. وابتسم وهو يعرف أن جمانه اللحين بتنحرج وكمل على طول ..لكنه صدمني لأنه رفض..رفض أني أخطبك واسافر..لأنه..لأنه خايف تنعاد الكره مره ثانيه..ويصير فيني اللي صار بأخوي...
انا ادري أنا موضوعي مختلف..لكن أبوي جرحه ماطاب..ولاراح يطيب الا اذا شاف ولده بحضنه..وسكت دقايق..وهو يحاول يرش الملح على جرحه وجرح ابوه..
المهم
أنا ماأبي ردك اللحين..أبيك بس تنحطين بالصوره..ومسألة أبوي بحلها باذن الله.
والسفره بسافرها..لكن اتمنى انه الوقت اللي ٍاسافر فيه فترة تفكير لك وتردين علي بأقرب فرصه..واذا علي أبوي لاتخافين بقنعه وان شاء الله يوافق..
واللحين ماأطول عليك..بكره وراك جامعه.. وابتسم من ورى خاطره...مبروك ادري أنها متأخره..لكن أعذريني. كنت ضايع ومحتار طول هالأسبوع..وماأرتحت الا لمن قلت لك كل اللي عندي..وسكت فتره..
واللحين اخليك.. تصبحين على خير..مع السلامه....جمانه..وقفل السماعه..وماأنتظر ردها..يمكن يبي يهرب..وهذا المتوقع..مايبي لايسمع رد..ولاتعليق على الموضوع..

استيعاب جمانه قل هاللحظه....
تبي تفهم اللي قاله الوليد وماقدرت..
تبي تركب هالجمل اللي رماها عليها,,وحست بصعوبه شديده..ماتدري هل صعوبه بألأستيعاب...أم صعوبه في عدم التصديق..
تركت الجانب الحلو بالموضوع.وظلت تفكر في الجانب السيء..
او نقدر نقول الحزن اللي بالموضوع طغى على الخبر المفرح اللي بشرها لها الوليد..
عمها مو راضي يزوج الوليد عشان يوسف..
عمها لسه ينتظر يوسف اللي مايدرون هو يمت والا حي..
عمها يخاف يتعرض الوليد مثل اللي تعرض له يوسف..
آآآه ياعمي..يعني جرحك ماطاب..مامسحته السنين..ماانهته الأيام..!؟
ظلت تفكر وتفكر وتفكر وحزنها عشان عمها نساها كل أحلى خبر..
خبر كل بنت تفرح فيه من زمان
وكيف اذا صار بحبها اللي فجرته الطفوله..
حب الوليد..
مانامت جمانه..ولاذاقت طعم الراحه..!!
كيف تنام..كيف يغمض لها جفن وهي تدري بصعوبة موقف الوليد..وهي تدري أنه بين نارين..
وهل عيونها بتنام اذا درت انه في شخص عيونها ماتنام..أعترفت بين وبين نفسها أنا عمها اكيد ماينام..واذا نام ينام عشان ينسى ويرتاح
ياما تمنت تفسر النظره الحزينه اللي بعيون عمها و ابتسام والوليد..واثاري هالنظرة نظرة الم وفراق..
وتأكدت وايقنت..انه همومها بسيطه تافه...سخيفه...قدام هموم عمها اللي ينتظر خبر يوسف..!!
وتذكرت الوليد..
الوليد..حسته يبي يتكلم.يبي يفضفض اللي فيه.. يبي يفرغ ..لكن جمودها والخبر الصعب اللي تعرضت له..خلتها صامته وما قّدرت موقفه...ولا قدّرت ألمه..
وزاد همها همين..هم الوليد وعذابه..وهم عمها المريض..أيه مريض..أيقنت انه مريض..ومراح يشفى الا بوجود نظر عينه..يوســف..!


اشرقت شمس الصباح..واعلنت يوم جديد بحلوه ومره..
وكثير أحلموا بأمل لبكره..وكثير خافوا من الم بكره..
لكن مين الرابح..!!
وايش الربح..!!
+++++++++





صحيت اليوم وانا ودي اروح الكليه..لكني ماقدرت وخصوصا لأني أعاني بالأرهاق والتعب يزيد يوم عن يوم..فقررت اني أروح بكره واكيد مافي شي مهم اليوم عشان اتعنى له..أتجهت المطبخ عشان أحظر فطور سريع لأحمد..وسويت له خفايف بسيطه وحطيتها عالطاوله على طول وناظرت الساعه وكانت سته ونص..ياربي تاخر كثير.شفيه ماصحى..!!
ناديته وانا متجهه للمطبخ عشان اجيب له الحليب\أحمـــد..أحمـــد..
وبعد فتره حسيت بازعاج بالصاله وعرفت أنه صحى من النوم..حملت اكواب الحليب ودخلت الصاله وفجأه حسيت بدوخه وألأكواب بيطحون مني لكني تداركت الأمر على طول وتسندت على الجدار ويوم حسيت أنه الدوخه زالت شوي رحت لأحمد وانا أحاول أني أبتسم عشان مايقلق علي...\صبــاح الخير,,شفيك ياأحمد تأخرت..!!
قرب مني وعرفت وش بيسوي وعلى طول غمضت عيوني منحرجه وباسني على خدي كالعاده\صبــاح الخير..شسوي لك أنتي اللي ماصحتيني بدري..!!وضحك وبدى ياكل...
سويت نفسي أني مو منحرجه لكني أعرف أنه يحس باحراجي حتى لو قالي كلمه حلوه...حاولت غير الموضوع وتذكرت أني أبي أزور اهلي اليوم\أحمــد..
رفع عينه وابتسم\عيون احمد..
وثاني مره انحرج..ياربي كاني ناقصه..قاومت مره ثانيه\في وقت البريك حقك أبيك توديني بيت اهلي من زمان مارحت لهم..!!
أحمد\لازم..!!
ابتسمت له\أيه لازم..وسكت وعرفت انه راضي..وسكت أنا وصبيت له كوب حليب وأول ماصبيته حسيت بالدوخه مره ثانيه وهالمره دوخه قويه وماقدرت استحمل ..أحس كل شي يدور حولي وأنفلت مني الكوب..وطاح على ألأرض..
سمعت صوت احمد يجيني من بعيد وحستيه ماسك كتوفي ويهز فيني..لكن الدوخه عملت فيني عمايلها وماقدرت أسوي شي..وغمضت عيوني عشان أخفف الدوران اللي براسي ويوم فتحتها لقيت احمد يشربني ماي وبعيونه خوف وحيره..
ياربي شفيني..!!
أحمد\سمـــاح..قومي..قومي حبيبتي بوديك المستشفى..!!
تضايقت...مااحب أسمع طاري المستشفى..حتى لو كانت صحتي متدهوره\..لا أحمد..ماله داعي أنت وراك دوام وتاخرت عليه..وانا مافيني شي..دوخه وبتروح..!!
لكن أحمد ماطاعني..\مو على كيفك..!!وقام..وانا تسندت على الطاوله..أبي بس أغمض عيوني.وارتاح..!!وماحسيت الا باحمد ماسكني ويلبسني العباه..\ياربي أحمـــد..ماأبي أروح المستشفى..!!ماأبي..
أحمد\سماح لاتجنيني...لازم تروحين..أنا اصلا ملاحظ عليك التعب من زمان..بس ساكت لك..
وطعت اوامره..أنا فعلا تعبانه..تعبانه كثير..لكني أقاوم..وهذه مو أول أحس بالدوره..لكني ماأحب المستشفى..ليش مايفهم ليش..!!
طلعنا من الشقه وركبنا السياره..وشفته يكلم بتليفون وشكله يكلم الشغل..غمضت عيوني وانا ابي أنام..وماتهنيت بغفوتي لأنا وصلنا المستشفى..نزلنا من السياره..ودخلنا على الطوارىء وجلسنا ننتظر دورنا..ولأني مش قادره أسيطر على نفسي..طاح راسي على أحمد بدون شعور..
أحمد\سماح..فيك شي..!!
قلت له بصوت واطي عشان مايستهم علي \لا مافيني شي أحمد..لاتخاف..!!
++++++++++




داومت اليوم بالجامعه..وليتني ماداومت..ضيعت وقتي على الفاضي..مجرد تنزيل جداول وفوضه مالها داعي..
أحس بالنوم يداهمني ويعتصرني من كل جهه..كم مره غمضت عيني وغفيت وانا مش حاسه بنفسي..وماأصحى الا بضجة البنات اللي حولي..مسكت التلفون وانا أترقب مكاملة غلا..والأخت مسويه لي طاف ولحد اللحين ماشفتها..مالت عليها ..!!يعني سوتها وبتخليني لحالي السخيفه..!!أوووف..
شسوي اللحين لحالي..!.!والمشكله هذه مش عوايدي..أنا اذا رحت مكان ماأجلس ابدا..دايما أتحرك وامشي وأظحك واسولف..لكن احس اني وحيده..مافي أحد معاي...حتى صديقاتي اللي كانوا معي بالدفعه تركوني وتفرقنا وكل وحده راحت تدرس بمكان ثاني..
ظليت فتره أناظر اللي رايح واللي جاي..ودققت عيني على وحده تضحك بصوت عالي وتتحرك وهي تتكلم..ومسيطره على الجو كله..وكانت معطتني قفاها..ويوم لفت عشان تسلم على البنت....شفت أنها غلا..بنت خالي..!!وعرفتها من شعرها اللي يدوم فاتحته و ناظارتها اللي دوم أضحك عليها.. نظارتها أكبر من وجهها..!!امحق موضه..!!
ظحكت عليها..!!حتى هنا ياغلا بتسيطرين على الجو..!!أثاريك منتي هينه يابنت خالي,,!
وشفتها تلف على جهتي ..وبعدها أستأذنت من صديقاتها... وجاتني تضحك وتركض وتصرخ..!!ياربي فشلتنا..!!
غلا\جمـــــــانه..!!هلا وغلا..أسفرت ونورت بــ بنت عمتي الخبله..!!
قمت لها عشان اسلم عليها \والله ماغيرك خبله..!!..ليش ماتردين على تلفونك..!!
غلا\يووه نسيت أني حاطته على الصامت..!!شخبارك..!!
ابتسمت لها من ورى خاطري\زفت..ياختي طفشت أبي أرجع البيت..!!
غلا بنعومه وهي متوقعه كلامي\لأنك اول يوم.وبعدين بتتعودين على الجو..!!فطرتي..!!
تذكرت أني ماشربت غير ماي وانا بالبيت\لا مافطرت..!!
مسكت ايدي وصرخت بدلع\أجل أمشي نروح الكافتيريا..!!
وقفتها وقلت\وصديقاتك..!!
ابتسمت بخبال على غير العاده\بالطقـــاق أمشي..انا اليوم عازمتك على حسابي..!!
ومشينا مع بعض..وحسيت اني طفله صغيره..وغلا هي اختي الكبيره اللي تجرني وراها..مدري شفيني..مش عاجبني هالجو..!!
يمكن زي ماقالت غلا هذا أول يوم..وبعدين بتوعد..!!
كل شي جايز..!!
++++++++

مبروك يامدام..أنتي حامـــــل..!!

كررت الكلمه اكثر من مره..سماح حامل..حـــامل مني..ياربي كم انت كريم
لفيت وجهي عليهاوشفت الفرحه بعيونها..ولولا الحيا كان ضميتها..
مشاعر غرييه..مشاعر غريبه امر فيها..!!وكلها تغمرني سعاده..!!
الدكتوره\أنا بكتب لك شوية فتامينات وأبيك الشهر الجاي تراجعيني عشان أطمن على صحتك..!!
وطلعنا من المستشفى بعد ماخذت الأدويه من الصيدليه..وركبنا السياره..وانا ساكت..وسماح ساكته..
مش عارف كيف أتصرف..أول مره أمر بهالموقف...وفرحتي سكتتني..ومشكلتي ماأعرف أظهر مشاعري بوقت الفرح..!!
لكن مستحيل..مستحيل أخلي هاللحظه تمر عابره..مستحيل..!!
وصلنا الشقه وطلعنا بالمصعد ..ودخلنا اخير الشقه..!!
وشفت سماح بتدخل غرفتها..لكني على طول مسكتها وضميتها بكل قوتي فيني حب كبير وابي أفرغه كله لها..لها لوحده.. وهمست باذنها\مبـــــروك حبيبتي..مبروك علينــــا..ماتتخيلين قد أيش أنا سعيد..!!بجـــن ياسمـاح بجن من فرحتــــي..!!
سماح بهمس\وانا اكثر ياحمد..واكثـــر..من زمان وانا اتمنى أجيب طفل منك..!!
بعدت عنها شوي..ومسكت وجهها بأيدي الثنين..وشفت دموعها\ليش الدمــوع..!!
سماح وعيونها تلمع\من الفرحــه..من الفرحـــه ياأحمد..!!
ضميتها ثانيه وانا ودي أدخل بروحها..ونكون جسد واحد نموت ونحيا مع بعض..وغمضت عيوني براحه..!!
وظلينا فتره ساكتين واحساسنا بالحب كل ماله ويكبر بداخلنا
وبعد فتره..
سماح\أحمد..منت رايح الدوام..!!
تضايقت..لازم اداوم..لكن سماح..ماأقدر أخليها لحالها..!!وتذكرت انها تبي تروح لأهلها\تبين تروحين لأهلك اللحين..!!
سماح\ياليت عشان أبشرهم..!!
وابتسمت لأني تطمنت عليها\خلاص أجل..بوصلك قبل ماأداوم..!!
++++++++++







ظليت فتره حاط ايدي على الكيبورد واضرب بهالأرقام اللي محتاجه تخزين..
وتذكرت أني لازم اروح دبي هالأسبوع..في أجهزه نازله جديده ويبيلي أطلع عليها..!
لكن الوقت ضايع..ضايع علي..ليش ماأدري..!أبي أركز..!!
ركز ياتركي..ركز.!!
فصخت النظاراه ومسحت على وجهي بضيق..شكلي باخذ أجازه يومين..!!
لكن مالي وجه ..توني طالع من أجازه..ومدير البنك صاير لعين هألأيام..!
خلاص..مافي الا بالويك اند أروح دبي وارجع الجمعه باللليل..
هذا أريح حل..والمحلات بيشرف عليها مبارك..!
ناظرت الساعه بملل..بقى ساعتين على البريك..!!
طلبت لي كوفي عشان اصحصح..وحاولت أِشتغل وانا تفكيري كله البنت اللي شفتها في بيت عمي..
ارحمني يارب..ماأبي أفكر فيها.!
ليش هي بالذات..ليش..!!
قطع على تفكيري..صوت تلفوني..رفعته على طول لأني عرفت مين المتصل
تركي\هلا
مبارك\هلا تركي.شخبارك..!!
جاوبته بضيق..أخباري زفت..بنت لاراحت ولا جات شاغله بالي\تمام..وينك انت.!
مبارك\توني طالع من البيت بمر المكتب..وبعيدن بروح المحلات..!
تركي\أوكي..حلو..
مبارك بهدوء\أقول تركي..!!
وسكت انتظره يكمل..مالي مزاج ازيد في الحكي
مبارك\اليوم أبي أِشوفك..عندي موضوع وودي أكلمك فيه..!
ولأني ماحب التأجيل بالمواضيع\خلصنا مبارك..شنوا عندك..!!
مبارك\ماينفع تركي..لازم اشوفك..!!يالله مااطول
ولأنه مالي خلق اتجادل معاه سكرت على طول..ولا سلمت..!
ورجعت اكفر بهالمفعوصه اللي شغلت بالي...!!
++++++++





بشرت امها بحملها..وفرحت كثير..ياما تمنت تشوف حفيد لها..واليوم حققت لها امنيتها..لكنها ضايقتها يوم قالت لها عن سميه..!!صار لها يومين حابسه روحها بغرفتها ومش راضيه تطلع..
راحت لها وهي ناويه تبشرها..أكيد بتفرح لها..
دقت باب الغرفه وشافته مفتوح..وحمدت ربها لأنها ماراح تتعب عمرها بالدق مثل امها وهي تتعب من كثر ما تدق عليها الباب..
واول مافتحته..شافت منظر يقطع القلب..منظر ممكن أنه يذوب الصخر..ويمرض الروح الساهيه التعبانه..
شافت أختها سميه جالسه على ألأرض بزاوية الغرفه وضامه رجولها بحضنها ومنزله راسها وشعرها متناثر على جسمها كله..
أبدا...ابدا..ماتوقعت يجي يوم وتشوف أختها بهالمنظر..ماتصورت انها حزينه لهدرجه..
حستها ميته..بدون قلب وروح ..وجو الغرفه البارد كمل الناقص وزاد الهم والغم كثر ماهو موجود...
حست بالبروده والجفا تتخلل أعظامها...وماقدرت غير أنها تنحي ظهرها وجلست قريب منها وعيونها متحجره..متحجره دموع على حال أختها اللي وصلت له...
وماقدرت غير تنطق بأسمها..وكانت تعني كل حرف تقوله\أختــــي..أختي سميــه..!!
رفعت وجهها سميه..وحست باأختها..
ياللــــــــه..من متى ماسمعتها منك ياسماح..!!
تقولين أختـــي..متأكده أني أختك...!!
هذا اللي كانت تنطق فيه سميه..لكن ماسمعتها سماح لأنها كانت تهمس بداخلها..وماتبي أحد يحس بضعفها اللي يهد حياتها يوم ورى يوم..!!

طال سكوت سميه بالنسبه لسماح..وهذا الشي خوفها..واربكها..
تبي تقول شي..!!توقعت أنه هالكلمه بتهزها..لكنها ماتاثرت...وظلت جامده بدون حركه..
وهي بداخلها..براااكين ثايره..وتنتظر مين يخمدها..!!
رجعت سماح مره ثانيه وهي تحاول أنها تثير عواطف سميه بحنيتها وحبها الواضح بمعالم وجهها..ومسكت ايد سماح اللي كانت حاظنتها واول ماصار التماس بين الطرفين صرخت سميه\طلعي..بره..أنا مو مجنونه...اطلــــــــــعي بـــــــره..!!بــــــــــره..كلكم تكرهونيز.كلكم ماتحبونيز.ليش...! أنا شسويت..!!
تدرين عاد حتى أنـــــا أكرهكـــــــــم..!!بـــــره..طلعي بــــــره..
تكرهها..!!اختها تكرهها..
موقف صعب..موقف صعب اللي تمر فيه سماح..اختها تطلب خروجها..خروجها من حياتها اللي بدت تنتهي..وتكرههـــــا..
هي تعرف أنه سميه شخصيته صعبه وغامضه..لكن ماتوقعت توصل لهدرجه..!!تذكرت انها تبي تقولها عن خبر حملها..وقلبها اعتصر حزن والم..وهي تدري أنه أختها مش فرحانه لها..
اختها الوحيده..ماتفرح لها..!!
وهي شكلها نست أنه متى اختها أصلا فرحت لها بشي..!!
أجل منوا لازم يفرح..!!
تمنت من زمان أنه يجي يوم وتتصلح علاقتها مع أختها..لكن كل مالها وتتدهور أكثر واكثر..وكل مره يكبر الحاجز..وتطول المسافات...والجفا والبعد هو عنوان أخوتهم..!!
كل مره تسأل نفسها هالسؤال..!!
ليش..!ليش هالبعد والجفا لي بينها وبين أختها..!!
ماتذكر انها أساءت لها..ولا غلطت عليها يوم من الأيام..!
لكن شخصية اختها الحقوده نفرت كل الناس منها..وأولهم زوجها اللي تركها بدون سبب ظاهر ممكن يسكت فم كل من يتكلم عليها,..!!
وهي تعرف ومتأكده أنه السبب الأول وألأخير أختها..!!
وأحتارت تطلع وتترك اختها..والا تجلس وتواسيها..!
وبين تفكيرها وحيرتها صرخت سميه للمره الثانيه..وهالمره وكانها ريح هايجه تبي تقضي على أي أحد قدامها\أنت ماتفهـــمين..ماتسمعين..قلت أطلعي بـــــــره..بـــــــــره..ذبحتونــــــــي كلكم بـــــــــره...بــــره..

وطلعت سماح من غرفت أختها وهي جاره أذيال الخيبه والألم..حست بتعب خفيف وتذكرت أنها ماخذت الدواء..وتضايقت اكثر..
ورجعت تاخذه... وهي تحاول تتناسى جبروت اختها..وتفكر بأحزانها ومرضها اللي قتل كل شي حلو فيها....
ونست فرحتها بحملها..ولا تهنت فيه..!!وصغرت الدنيا بعينها..!!
وتمنت أنها مادخلت عندها..ولاسمعت كلامها اللي حرق سعادتها..

ياترى مين اللي ظلمه القدر !..سميه الحاقده..والا القدر اللي زرع الحقد في قلب سميه...!!
+++++++++







طيب وش الحل..!!
الوليد\ماأدري..ماأدري ياأبتسام..صدقيني مافيني حيل..وعندي أكثر من شغله لازم اسويها..!!
ابتسام\طيب ليش أنت ماتسافر..واذا خلصت تعال واخطبها..!!
تضايق الوليد..!!شيقول لأخته..!!يقول لها خايف يروح وتنخطب لغيره..!!والا يقول أنه يبي يخطبها عشان يطمن ويرتاح..!!
لكن يحس انه ولا سبب من الأسباب اللي ذكرهم مقنعه..
وسأل نفسه..انا ليش أبي أخطبها..!!
ليش مأأصبر..!!
الكل يعرف انها بتكون لي يوم من ألأيام..!!
لكن هو عنده مخططات ثانيه..!!
مايقدر يصبر يبي يخطبها ويرتاح...
من حقه..!!
الوليد\وانت مفكره اربع سنين سهله..!!ياربي ليش..محد راضي يفهم..!!
قربت ابتسام من الوليد ولصقت فيه وابتسمت له وهي ناويه تجننه\لهدرجه تحبها يالخبيث..!! وغمزت بعينها
عصب الوليد..فاضيه..اخته فاضيه..هو وقت حب اللحين..!!\ابتسام فكينا..مالي خلق لخرابيطك..وشوفي لي حل..أحس انه عقلي وقف..لازم أتخذ القرار بسرعه..!!
ابتسام\طيب الوليد..متى انت بتروح..!!
الوليد\يمكن 3 اسابيع بالكثير وبسافر..!!
ابتسمت أبتسام بالم..وأخفت حزنها غصبن عنها وبدون شعور رق صوتها وصار هادي\..3 أسابيع..!!
حس فيها الوليد..!!
معقوله بيصبر على فراق أهله 4 سنين..!معقوله تقدر يالوليد..!!
لكن لازم ..لازم تقاوم..!!
انت رايح عشان اخوك..!
لازم تدوره..لازم,,!!
ابتسام\كيف تقدر..!!كيف بتقدر تغيب عنا 4 سنين..!واخنقتها العبره وماقدرت تكمل
ابتسم الوليد بحزن\بجيكم..بجيكم ان شاء الله أيام العطله...ولاتخافين ماراح أنساكم..!!وكل يوم بكلمكم..وبكون معك على الماسين..والا نسيتي..!!
حاول الوليد يخفف على ابتسام..!!بشتى الطرق..!!
لكن مايدري..هل هو يخخف على روحه والا على أخته..!!
اربع سنين صعبه..صعبه كثير..بس أيش يسوي ..غصبن عنه..!!
الوليد\ابتسام..سمعيني..احتمال الجامعه اللي أروحها يحذفون بعض المواد اللي درستها هنا..يعني ان شاء الله تقل السنين ..!!
وارجوك..خليك قويه..لاتضعفين..انتي اللحين اللي لازم تصمدين..وأنتي تعرفين ليش أنا بسافر..وتكفين..خلي بالك على ابوي..لاتخلينه يجلس لوحده...وحتى عزيز..خلي بالك عليه..وبتشوفين أنه السنين تركض..وبجيكم وانا حامل الشهاده..
دمعت عيون ابتسام ومسكت ايد اخوها الثنتين وهي تقاوم حزنها\لاتخاف..لاتخاف يالوليد..كل شي بيكون على ماهو..أنت بتروح وبترجع بالسلامه ان شاء الله..
وظحكت بين دموعها..وفيه وحده بعد شكلك نسيتها..ماتبيني أخلي بالي عليها..!!
وابتسم الوليد..وعرف أنه ابتسام تبي تغير جو الحزن\أنتي تعرفين..يعني ماله داعي تسألين ياحمــاره..!!

وظحكت اكثر...لكنها حزينه.ومش قادره تنسى انه أخوها بسافر ويبتعد\أيه هذا اخوي..طلعت على حقيقتك اللحين..مش من شوي صاير لي حنون..!!
وحاول يسايرها غصبن عنه\شسوي لك..تعودي على مزاجي..مره حنون..
وقاطعته على طول\وعشر مرات ثقيل وماتعطي وجهه..!!
++++++++++






سكرت أمي السماعه من احمد..وظليت انتظرها تتكلم..!!
مو من عوايده أحمد يدق هالوقت..!!
وليش أمي فرحانه هالكثر..!!
أكيد فيه شي..!!
فاطمه(ام أحمد)\تدرين وش فيه اخوك..!
بينت اني عادي مو مهتمه ..لكن ماقدرت وعلى طول تكلمت\شفيه..!!
فاطمه وظحكت \سماح حامـــل..!!
وصرخت زي الطفله اللي صارت عنده هديه ثمينه\صــــــــج..!!
فاطمه ولازلت تظحك\شتتوقعين يعني أكذب عليك وأنا بهالكبر..!
فجر\مبروك عليكم..يالله من متى وأنا أتمنى أشوف عيال احمد..!!
فاطمه\أجل شقول أنا..بيكون عندنا ولد صغيرون..!!
فرحــــانه..!!ياربي..يعل هالفرحه تكون دوم..من امس وانا احس بسعاده غريبه..والمشكله ماأعرف وش سببها..!!معقوله كنت متنبأه حمل سماح..!!\طيب يمه ليش ماخليته يجيب سماح عندنا..!!
فاطمه\قلت له..وقال لي هو بالدوام اللحين وسماح بيت أهلها..!وبكره ان شاء الله بيتغدون عندنا..
فجر\ان شاء الله..
فاطمه\بروح أبشر أبوك..أكيد بيستانس..!!
ظليت أناظر أمي وهي تطلع من الصاله وانا فرحانه لفرحها..كنت ادري انه أمي تتمنى يجي يوم وتشوف أحفادها..
وهاليوم كانت تتمناه من زمان..وتعد له الأيام عشان يصير..
كنت اذكر كلامها لي..وهي تقول متى بشوف عيالك يافجر..!!متى..!!
من 11 سنه..لكن الله له حكمه..ومستحيل نعترض عليها..
حاولت أنسى هالأفكار اللي تدور في بالي..واستمتع بخبر حمل سماح..
وطلعت فوق اجاري الزمن..وفكرت اني اكلم غلا وابشرها..اكيد بتستخف اللحين..!!
ودقيت الرقم..لكن ماردت..أكيد حاطته على الصامت..!!
كيفها هي الخسرانه..!!
++++++++++++



رحت الشقه بعد ماطلعت من الدوام..لكني شفتها مفتوحه..!وتذكرت مبارك..!اكيد جاء من المحلات بدري..!!
دخلت على طول وجلست باقرب كنب موجود بالصاله..وغمضت عيوني بتعب..
أبي أنام..هذا اللي جاء على بالي اللحين..
فصخت نظارتي والغتره.. واخذت المفاتيح والجوال وقطيتهم على الكنب..
وتوني بروح ألغرفه الا شفت مبارك بوجهي..!!
وشكله تفاجا أني موجود..!!
مبارك\متى جيت..!!
رديت عليه بتعب\توني جاي..وابي أنـــام تعبان..!!
مبارك\طيب ليش مارحت البيت ترتاح..!!
حكيت على شعري بضيق\لا مالي خلق أحد..قلت خلني أجي هنا وارتاح وبعدين أرجع البيت..!!وتذكرت شي..أيه تعال ..شنوا اللي كنت تبي تقوله لي..!!
حسيت بارتباك مبارك..!!شفيه اليوم مو طبيعي الرجال..!!والا أنا أتوهم هالشي..!!
مبارك\لا مايصلح اللحين..انت فيك النوم وتعبان اذا صحيت بقولك..!!
تسندت على الكرسي اللي قبالي بتعب\مبارك..أنت تعرف اني ماأحب هالأسلوب..ياأخي عندك حكي قوله..لاتصدع لي راسي..!!
مبارك\كيف تبيني أقولك وانت شوي وبتعطيني كف على وجهي..تركي انا أعرفك اذا مالك خلقك تكره الدنيا ومافيها..!!
تأففت من مبارك.!!مايفهم..يعرف اني ماأحب تطويل الموضوع..\أنت شكلك ماتفهم..مبارك...انا مافيني شي...قوللي اللي تبيه وفكني..
حسيته متررد..شكله فيه شي قوي..هديت نفسي ومسحت على وجهي..وجلست على الكرسي..وكرهت مزاجي المخترب..والمشكله أنه مبارك ماله ذنب..لكن هذه طبيعتي اذا كنت متضايق..اكره كل شي قدامي..\خلاص مبارك..أنا هديت..يالله قول اللي عندك..!!
جلس على الكرسي اللي قبالي ومن كثر ماهو متوتر ظل يحرك رجوله وهو مش حاس بنفسه..وبعدين نطق\أنا كنت حاب اخذ ريك بموضوع مهم..وكنت ابي اعرف ردك قبل ماأتقدم لكم.!!
ولأني مش قادر استوعب اللي يقوله سألته\كيف يعني..!!
مبارك واخذ نفس\تركــــي بدخل بالموضوع على طول..أنا أبي أخطب أختك على سنة الله ورسوله..وش قلت..!!
+++++++

أنتهـــــى

[أميرة الورود]

الجزء التاسع عشر
==========


لأني من زمان مارسمت ..وانشغلت بدوام المطعم الصبح..وبالمسا أكمل الصاله الموسيقيه...
قررت اليوم ارسم في المكان اللي متعود ارسم فيه..

تركت رساله لــ لؤي وقلت له اني طالع ومو راجع الا بالليل وهو اكيد راح يعرف وين يلقاني..ولصقتها بوسط الثلاجه لأني أعرف أنه أول مايفتح عيونه بيروح سيده للمطبخ وخصوصا لأنه اليوم ويك أند..ومافي دوام..
يعني خذ راحتك يايوسف بعد عذاب أسبوع كامل كله الم وحيره..
ركزت اللوحه على ارض شارع الشانزلزيه اللي تكثر فيها مختلف الرسامين من جميع الدول..وناظرت متحف اللوفر اللي أمنيتي أدخله وامتع عيني بــ لوحاته اللي تجمع ريشة أحلى الفنانين..
لكن هذا شي مستبعد كثير..
أبتسمت على امنياتي البعيده.. وطلعت عدت الرسم..فصخت القبعه اللي شريتها حديثا و جاكيتي الجلدي المعتاد لأنه كان الجو ممتع بنسيمه اللي يهب بحلاوه..ونسمة الهواء اللي تنعشك وتعيش..
وبديت اشخبط..ومدري ليش حسيت أني أبي أرسم سماء....وزرع..وخضره.. و..شمس...ايه شمس..!!
نفسي ارسم شمس تمتلك اللوحه كلها بأشعتها الساطعه القويه..
وتنعكس على الأرض لترسم أحلى صوره أبداعها خالقها...
نفسيتي متفائله اليوم وهالشيء أثر على لوحتي بشكل كبير..!!
أجل انا من متى أرسم بتفاؤل وأمل..كل رسوماتي كانت تعكس شخصيتي المجروحه..
واليوم وبهالوقت نظرت للكون بنظره ثانيه..!!
الله ياعالم..الله يادنيــــا..شكثر أنتي غريبه..ومتقلبه..!!
والقدر بدى يبستم لي من جديد..!!
ويتكون صدمه قويه بالنسبه لي اذا هالمحاوله بتصير فاشله..!!
مش عارف وش بيكون حالي..!!
يأس..ضياع..الم.. جرح ثاني..!!
لا لا..شي اقوى من كذا..
راح أنهار للأخير..
لأني وبكل بساطه..ماعاد لي قلب يستحمل ويعيش من جديد..!!
شي عظيم اذا لمست الأمل بأيدك..لكن الموت اذا كان هالأمل الوحيد راح يكون من فئة المستحيلات..!!
+++++++++



لحظات طويله جالس فيها بالسياره وانا قدام باب بيتنا..
اذن العشاء وظلم الوقت..وأنا لسه بنفس المكان وأفكر بالموضوع..
.. بعد ماطلعت من الشقه وأنا ضايع
وعقلي عاجز عن التفكير..
مبارك..صديق عمري..يبي يخطب اختي...!!
معادله صعبه وعاجز أني أحلها..
انا أكثر واحد يعرفه حتى أكثر من أهله...وماضيه السيء كأنه شريط ينعاد قدامي..!!
وانا وهو نمشي على نفس التيار..وكل واحد فينا عارف معدن الثاني..!!
لكن السؤال اللحين..!!
هل انا راح أرضى أنه اختي تعيش عيشة مبارك..!!
مبارك اخو وأتمنى له التوفيق في حياته..وبرضوا راوين أختي الوحيده ..!
شفيك ياتركي..!!شالمشاعر الغريبه اللي تمر فيها..!!
من متى وأنت تهمك مصلحة أختك..!!
ومن متى أنت تفكر بسعادتها..!!
لك سنين وانت هاملهم وحاطهم أخر اهتماماتك..!!
ولو عليك كان اتبريت منهم للأبد..!!
شالتناقض اللي تمر فيه ياتركي..!!
شكل النوم لعب دوره وبدى يرهقني..
طلعت من السياره ودخلت البيت وانا ناوي أني أجل السالفه لوقت أفضل..
وأول ماطلعت الصاله الفوقيه..شفت راوين جالسه مع ياسر ويلعبون سوني ويظحكون..ومش حاسين بالي حولهم من وناستهم..!!
ظليت فتره واانا أتأمل في راوين..
بــــراءه..رواين أختي كلها براءه..
معقوله اقدر أسلمها لمبارك..!!
غمضت عيوني باستسلام و بتعب وتوجهت لغرفتي..
وشفت نور طالعه من غرفتها..أبتسمت لي وتوها بتكلمني لكن سبقتها ودخلت غرفتي على طول..
أكره ابتسامتها..واكره كل شي فيها..
وهي الوحيده اللي سببت لي التعاسه..!!
+++++++++



اليوم الثاني على طول تغدى أحمد في بيت أبوه وخذ سماح معاه..
وتونسوا الكل بشوفتهم..وام أحمد فاطمه..ماتدري شتسوي بمرت ولدها..ودها دوم تشوفها وتكون تحت نظر عينها..
وفجر وغلا ماقصروا ابدا..
أرتاحت كثير..وتمنت لو هالفرحه تكون في بيت اهلها,,,
وتضايقت على طول.وهي تفكر ليش أهلها مافرحوا بخبر حملها مثل فرحة اهل أحمد..اللي عيونهم تقطر سعاده وراحه..
وتذكرت أختها..وتضايقت كثير..
وهالضيقه بينت كثير بملامح وجهها..
والكل لاحظ حزنها وأولهم أحمد اللي يحاتيها من أمس..لكنها مارضت تنطق بكلمه له..وماتبيه يتضايق عشان أختها..واعتبرتها مسأله بين أخت واختها..وفضلت السكوت..
رفعت عينها وشافت أحمد يناظرها من بعيد..وعرفت أنه حس فيها..وعلى طول ابتسمت بوجهه..ماتبيه يحاتيها..وهو مايستاهل الا كل حب ومعزه..
وهو بادلها باحلى ابتسامه وكأن ينتظر من زمان هالأبتسامه عشان يهدى..
لقطت الموقف غلا وظحكت وهي ناويه على مصيبه....ومين يفتك من لسان غلا..تؤام جمانه في التحرش والنقزات..
غلا\ياعينـــــي ياعينــــــي..وهذا بعد قدامنا..أجل وش تسون من ورانا..!!
أنحرجت سماح لأنه هالموقف صار قدام الكل..اما أحمد مابين شي على ملامحه الجامده دايما..
خزت فجر غلا بعينها..وعلى طول أم أحمد ضربتها بايدها الطويله\صج ماتستحين على وجهك ياخبله..
مدت غلا بوزها الصغير وسوت نفسها زعلانه وقالت كلمتها المشهوره\ياربـــــي..يعني أنا كل ماأتكلم تسكتوني..شالعيشه هذه..!!اوووف
ماعجبه أحمد دلع أخته الزايد..واعتفست ملامحه..وغلا حست بتهزيأه جديده..وعلى طول تنزلت عيونها للأرض..تحترم أحمد بشكل كبير..واحترامها زاد لمن صارت تخاف منه ..وسماح حست بالكهرباء والتوتر فحبت تلطف الجو\\لا الا غلا عاد..لحد يزعلها..!!
غلا بهمس\بـــدري يامرت اخوي..!!

كملت أم أحمد تهزيأها\ليش اذا مو عاجبها..بالطقاق.محد مفتكر فيها..!!
تضايقت غلا..واخترب برستيجها قدامهم..وام أحمد ظحكت لأنه عرفت تقهر بنتها الدلوعه..ورفعت عينها لأحمد وشافته يظحك وملامحه صارت أحلى..أرتاحت هنا..اهم شي أنه اخوها مايعصب عليها..

وكملوا سوالفهم اللي كانت كلها تقتصر عن الطفل الجديد المنتظر من قبل العايله كلها..لمن قام أحمد وهو ماوده يطلع من هاللمه الحلوه
ام أحمد\على وين يمه..!!
ظحك أحمد براحه وتذكر كيف أمه كانت تحاتيه قبل زواجه وماتخليه ابدا يطلع الا لمن تعرف هو وين رايح ومن وين جاي..وماكانت تنام ابدا الا اذا شافته قدام عيونها سليم معافى..ولدها البكر.ومن حقها تخاف عليه وتحبه هالحب الكبير..وناظر سماح وشافها مبتسمه لأنها تعرف هو وين رايح اللحين..!!..
أحمد\الدوام..والمكتب ينادني..ماأقدر أتأخر أكثر..!!
ضرب أم احمد على صدرها بحسره وقلة حيله\ومتى بتفتك ياولدي..!!
ناظر أحمد أمه بعيون حالمه كلها امل وحب لوطن كبير في قلبه\من وظيفتي..!!أمن هالبلاد بعروقي يمه..افديها بروحــــي وبكل خليه فيني حيه..!!
زادت ابتسامة سماح وافتخرت باأحمد كزوج واخو وحبيب لهالوطن..
وفجر ماعلقت ...تعرف أخوها..وتتذكر كيف عانا وهو يرتقي لهالمنصب..وماقدرت غير تدعي أخوها في ظهر الغيب..
وطلع من عندهم أحمد بعد ماسلم عليهم وعيون الكل تحفظه وتدعليله وترعاه..
++++++++++


اليوم هو الأربعاء موعد اجتماع العوايل بيت الجد يوسف..لكن هالأربعاء كان هادي وبارد من امره..ومو الكل حظر..واولهم بيت العم بوتركي..والعمه هند اللي اشهرها الأخير في الحمل قربت وتنتظر هالمولود اللي ممكن يقلب حياتها الى تفاؤل وامل..

مرت هالثلاث ايام زي البرق وخصوصا على الوليد اللي تقدمت بعثته على الأسبوع الجاي يوم الجمعه المغرب..وقرر اليوم ينشر الخبر على العايله كلها..
واللي مضايقه أكثر..أنه قدم خطاب لنادي الأتفاق بانه راح يغيب بره للدراسه..والنادي وافق على هالخطاب..والحلم اللي كان يتمناه أنتهى..ومايدري هل راح يرجع للفريق اذا خلص دراسه او لا..!!
ومايدري هل راح يتوفق والا لا..!!لكن اللي مريحه شوي...صديقه ثامر بيكون معه وهذا الأمر بيكون من صالحه وبيونسه في غربته..وسأل عن المواد اللي درسها ونجح فيها وطلع انه يقدر مايعيدها لأنه الجامعه اللي بيلتحق لها تقريبا تعطي نفس المواد اللي يدرسها..

وأول من درى بالخبر الحريم لأنه ابتسام ماقدرت تكتم حزنها والكل لاحظ هالشيء وأول ماسألتها الجده عن حالها وسبب ضيقتها أنفجرت بكي بدون شعور..وهي تدري أنه الوليد اليوم بيعلمهم بخبر بعثته اللي بيتفاجأون منها..وحاولوا البنات يهدونها لكنها مش قادره وخصوصا لأنها كانت تحت ظغط كبير هالأسبوع اللي مر..واحساسا الوحده والتفكير للمستقبل بيدمرها..ومالقت أحد تشكيله وهي تشوف كيف الوليد يستعد لسفرته ومشغول في ترتيب اموره..ولااحد حاس بالنار اللي عيت تطفيها..
ماقدرت ولاراح تقدر تخبي شعور الحزن والأسى على حالها..!

خذت الجده ابتسام في حضنها وبكت معاها..بكت لوحدتها..و بكت لأمها وليوسف..
حست الجده فيها..وحست بظلم القدر على هالبنت..وماقدرت غير تضمها وتوسيها وابتسام تشهق بصوت مسموع ومؤلم..وكلهم لاحول لهم ولاقوه..و اللي جالسين شعروا بالرهبه والموقف الصعب اللي تمر فيه ابتسام..وكلهم أشفقوا عليها..حتى لطيفه اشفقت عليها لكن بنفس الوقت أستغربت من الموضوع وتضايقت لأنه محمد زوجها ماخبرها بشي..وتذكرت فجأه أنها أسم متزوجه وماله داعي تتضايق وتستهم وهي عارفه وضعها عدل..

الخبر انتشر بشكل سريع في المجلس والبعض كان معارض والبعض موافق..والوليد كان موقفه صعب وحاول قد مايقدر أنه يتحاشى نظرة أبوه الحزينه,,لكن ماقدر انه يقاوم وكأنه عيونه لاأراديا تطيح في عين ابوه..

ومن المؤيدين للبعثه كان ماجد(بوطلال) اللي شجع الوليد\أيه هذا الكلام زين..روح ياولدي أهم شي مستقبلك ماعليك من جدك...!!
تكلم الجد بعصبيه وهو ابدا مو عاجبه الوضع\يالوليد وش لك بــ هالبلاد..أركد في ديرتك احسن لك..ولاتسمع كلام عمك..!!
رفع الوليد عينه على الشباب اللي جالسين جنبه ويبي مساعدتهم في اقناع جده..فحس فيه عبدالرحمن اللي كان جالس قريب من أحمد وتكلم بلباقه\ياعمي الله يهديك هذا مستقبل الوليد وهو أحرص منا كلنا..ومافيها شي انه يدرس بالخارج ..بالعكس تفكيره سليم ومدروس..
ولأول مره الجد يعارض رأي عبد الرحمن..وتضايق من الموضوع واعتفس وجهه وهو يزفر بحراره ويلف على الوليد\يعني شفيها دراستنا ..تقدر تقولي..!!هذا عمامك كلهم طلعوا منها..وماشاء الله بتوظفين في أحسن وظيفه. وماعليهم شر..
وتوه بيتكلم الوليد لكن سلطان رد قبله\يايبه الزمن اللحين تغير..والوظايف صارت صعبه الوصول لها ..وبعدين مافيها شي خلو الولد يدرس بره ولاتضايقونه أكثر..
تعب الجد يوسف من الكلام وحس انها جاي بالوقت الضايع..وصابه الحزن على الوليد اللي يعتبره من أحب احفاده على قلبه \اذا على الوظيفه من بكره بعطيك مكتب وبتستلم راتبك..فكر يالوليد..!؟وبعجز وقل حيله..قلبنا مايقوى على فراقك ياولدي....!

عم الهدوء في المجلس كله بعد الكلام اللي قاله الجد يوسف..كانت كل كلمه يقولها جد فيها رجا وعتب فظيع..وهذا شي أثر على الوليد زود ماهو متأثر اساسا بنظرات ابوه..
حس أنه يبي يبتعد عن المجلس كله..خلاص ماعاد يقاوم اكثر..يبي أحد يسمعه ويفهمه..لكن الكل عواطفهم تغلبت عليهم..وعرف أنه حتى عيال عمه مايبونه يسافر..وكانوا يجامولونه ظاهريا..
مايعرف مين يتوجه له هاللحظه عشان يفهمه..!!
حتى هو عاجز وحاير..ليش مش حاسين بالبروده اللي بقلبه..!!
يعني يفكرون أنه الغربه سهله بنظره..!!
هوعارف وفاهم..ومش قادر يشرح لهم كيف هو يعاني..!..الموضوع اكبر من مسألة غربه ودراسه..!!
الموضوع هو قلبه اللي يحسسه بشعور غريب اتجاه أخوه يوسف..وكأنه هالشعور قريب وموجود..يستشعره ويحس فيه..كل ماتذكر انه بيسافر..
ياما غمض عيونه وشاف أخوه قدامه كأنه نور سطع زي الشمس قدامه..
ياما حلم فيه أحلام يقظه وكلها تنبؤات بوجود أخوه بهالدنيا الوسيعه..
كل شي حوله يحسسه بالأمل..وبنفس الوقت كل شي يحسسه بالمحال..
اللي يعرف باحاسيس الوليد يقول هو يعرف مكان اخوه يوسف..وواثق كل الثقه انه بيحلصه يوم من ألايام..!!
لكن اللي محد يعرفه انه كل هذا مجرد امنيات واحاسيس ممكن أنها تكون حقيقه وممكن تكون تخيلات..!!
عشان كذا محد يعرف السبب الخفي اللي يكنه الوليد داخله الا أخته ابتسام وثامرصديقه ..
++++++++++


مسك يوسف مكان قلبه بقوه..واستنكر هالتغلبات اللي يتخيلهاهالأيام.يحس بقلبه بيطير..أو بينتزع من روحه..وهالأحاسيس صار متعود عليها..لكن شعوره كان غريب ..يحس بفرحه وبنفس الوقت بحزن فظيع..مش عارف كيف يفسر شعوره..!!
حتى مزاجه صار غريب هالفتره..!!ساعات يحس كانه طير على وشك التحليق لسما عاليه عليه..وساعات يحس كأنه العصفور اللي بعشه ومحروم من النور..وفي كلا الحالتين هو عايش وراضي بحكم ربه..!!
رفع عينه لــ لؤي اللي كان توه داخل الشقه وحامل معاه أكياس وعلى طول ابتسم له وشال أيده من صدره..\ياهلا والله..
بادله لؤي الأبتسامه وعلى طول أرخى كل قواه بالكرسي اللي قدامه والأكياس طاحت بالأرض\أووووف تعب والله..احنا لازم ناخذ لنا سياره على قدنا..!!
رفع يوسف شعره الطويل اللي يتخلله الخصلات البيضا اللي بدت تحتل قسم كبير من شعره الخفيف\لاوالله..ومن وين لنا الفلوس..طايحين على بنك وأنا ماأدري..!!
ابتسم لؤي على سخرية يوسف الواضحه\لا طايح على عبير,,!!
تذكر يوسف صديقة لؤي الجديده اللي تعرف عليها من أيام وكانت أردنية الأصل تدرس في فرنسا عشان تكتسب لغه فرنسيه..وأنعجبت في لؤي يوم دخلت مع صديقاتها المطعم اللي يشتغلون فيه..وأول ماشافته وهي متعطشه للحب وخصوصا لأنه عربي وجميل بنظرها..
لؤي\تدري وش احسن شي بالموضوع..!!
يوسف\شنوا..!!
لؤي\انها ماشافتك..لأني أعرف اذا بس طاحت عينها عليك بتنساني وبتنسى أني موجود أصلا ..
ظحك يوسف على حال لؤي وتذكر سيلينا..وحمد ربه انها ماأقتحمت حياته بعد أخر موقف بينها وبينه\أقول قوم وحط لنا العشاء تراني حدي جوعان وانتظرك من زمان..!!
قام لؤي للمطبخ وحط ألأغراض بصينيه وجابها لــ يوسف\الله والأغراض عاد..أنت كثير عليك جبنه فرنسيه وخبز محمص..!!
ظحك يوسف براحه غريبه\وانا راضي كل الرضا..!!...أهم شي تكون وياي..
وبدى يوسف ياكل ولؤي يشاركه في الأكل وبنفس الوقت يختلس نظراته له وكملته الأخيره ترن في أذنه..
يكفي أنك وياي
يكفي أنك وياي
وبدون شعور تكلم وهو يهمس له\..وانا ويــاك..
ظحك يوسف على لهجة لؤي الهاديه وتوه يحس بمدى تأثير الكلمه عليه..
+++++++++++



كان الوضع بين مبارك وتركي متوتر والرسميه صارت ماخذه حيز كبير في تعاملهم..وكأنه هالسنين الصداقه اللي مضت أنمحت في يوم وليله..وكل هذا بسبب رد تركي الجاف على مبارك..وأخذ موضوع دراسة راوين عذر لأقناعه في تأجيل سالفةالخطبه..وبكذا تسكر الموضوع لأجل غير مسمى للطرفين..
واليوم موعد رحلة تركي لدبي ومبارك موجود معاه بمطار الملك خالد..
تركي\اذا دق عليك عميل المنتجات وطلب فلوسه قول له أني مسافر وبرجع خلال هاليومين..
مبارك\واذا طلب رقمك..!!أعطيه اياه..!!
تنرفز تركي..من متى احد يعرف رقمه الشخصي..صج غبي\شفيك مبارك..!!ياأخي تصرف مو كل مره بقولك لاتعطي أحد رقمي..!
عض مبارك على شفايفه بقهر..ومايدري متى ينكسر غرور وجبروت تركي \أوكي نسينا..أي أوامر ثانيه أستاذ..!!
تنهد تركي ومسح على وجهه كالعاده اذا تنرفز..
مايدري ليش ماهو طايق مبارك هالفتره..وكل مايتذكر أنه طلب أيد أخته..يتجمع الدم كله براسه..!!
مايدري ليش هالأحاسيس الغريبه,,!!
وين الصداقه...معقوله تنتهي بموقف واحد..!!
شالتناقض اللي يعيشه تركي..!!
وليش..!!
وليش جاء بهالوقت..!!
اسئله كثيره مش عارف لها جواب..!!وتصرفاته صارت غريبه..!!
تناقض..
تركي يعيش بحالة تناقض...
+++++++



طيب ممكن تهدين اللحين..!

مسحت ابتسام دموعها بالمنديل اللي تبلل دموع\ماأقدر..انتوا مو حاسين..!!
ابتسمت فجر لها..اذا هي مو حاسه فيها..أجل منوا اللي بيحس ياابتسام..؟
فجر\يعني هذا رأيك فينا..!!
تأففت ابتسام بضجر..وكرهت لسانها اللي يدوم يزل\لا ..هذا موقصدي..لكن انا متضايقه يافجر..من زمان وأنا اعرف والتفكير أتعبني..ومو لاقيه احد أشكي له..كنت اشوف ابوي حزين وساكت كالعاده..وبنفس الوقت أشوف الوليد يرتب أموره ومتوتر..وأنا اللي طايحه بينهم..مش عارفه كيف اتصرف..والا مين أكمله عشان يريحني...كنت ضايعه يافجر..كنت أتمنى ذيك اللحظه تكون امي بجنبي تسمعني واسمعها..وكل واحد فينا تهون على الثانيه..
لكن لا امي موجوده..ولا احد موجود يسد مكان امي عندي..!
واليوم يأست وماقدرت استحمل وبدون شعور بكيت يوم حسيت بنبرة الدفا اللي بصوت جدتي...وكانت كل قواي انهارت وكأني زي اللي منتظره أي كلمه أو نظره عشان أفرغ اللي بداخلي..
صعب.صعب يافجر تحسين باللي كنت احس فيه..
حسيت بالغربه طول هالأسبوع اللي فات..وكنت أشفق على حالي..
ومالقيت..مالقيت غير جدارن تحاوطني من كل جهه..وتشهد لحظات صمتي وعذابي..
أكره هالأحساس يافجر..أكرهه..
أكرهه الغربه اللي مصاحبتني وكأني مأسور لها..
وهالغربه اليوم بتبعد عني الوليد..اللي طالع الله ثم اطالعه..!!
تدرين فجر..صرت وحيده..خلاص مافي أحد بعد اليوم بيكون معي..
مافي أحد بتخانق معاه..وبحاتيه في اكله وشربه..!!
مافي أحد بنتظره اذا رجع متأخر بالليل..مافي أحد بيسأل عن حالي..!!
محد بيعرف اذا كنت مريضه ومحتاجه دواء يريحني..
محد بيعرف اذا انا متضايقه والا لا..!!
أنا ضعت يافجر..
ضعت بعد الوليد..مثل ماضعت..بعد يوسف وامي ..
مابقى أحد..خلاص مأبقى أحد..!!
..
تاثرت فجر بكلام ابتسام وابدا ماتوقعت أنه ابتسام حزينه ومكسورة الخاطر..وماقدرت تسوي شي لها..لأنها ضربت على الوتر الحساس..لكنها تعرف اذا سكتت بتذبح ابتسام أكثر..
و قاومت وتكلمت والكلمات تطلع بدون شعور\واحنا..وين رحنا..!!وابوك..وعزيز..وجدتي ..والا نسيتهم بعد الوليد..!!
قامت ابتسام من مكانها وهي مجروحه أكثر من أول ودموعها بللت وجهها كله\أنتـــوا....تصدقين احس سؤال صعب...ماأعرف اذا بيبقى أحد بعيني بعد الوليد والا لا..!!
وطلعت من المكان وهي ضايعه..وعيون فجر تتبعها و مليانه دمــوع على حال ابتسام المؤلم..
+++++++++++




٭•٭•٭•٭ وصيت قلبي عليك ٭•٭•٭•٭

[أميرة الورود]

الردوووووووووووووووووووووووووود لاكمال القصة ما يهمنيش

ردوووووووووووووووووووووووووووود