التكمــــله
يوم درت أنه باقة هالورد باعثها الوليد..
حست بالشوق يحتويها وينعش روحها اللي كانت ضايعه طول هالأسبوع..
وبدون شعور خذت ورده صفراء لأنها كانت تميل للأصفر وثبتتهافوق أذنها بطرف شعرها المرفوع لفوق..
و على أنه كان في تناقض بين لبسها الأبيض الباهت والأصفر الفاقع.
لكنها طلعت شمس منوره بفصل الصيف الحارق..
انتبهت لها غلا وهي ناويه أنها تقطع لحظة تفكيرها وسرحانها.
فضربت على راسها بخفه وركظت للمطبخ عن فجر وابتسام..
وجمانه ما صدقت على الله تلقى شي من غلا..
فكانت هي بمثابة الكبريت اللي تنتظر أحد يشعللها..
ركظت وراها وهي ناويه على تنتيف شعرها اللي دوم قاهرها..
وشافتها متخبيه ورى فجر والظحكه الخبيثه مرسومه بوجهها
شمرت جمانه أكمامها بفضوضيه واتجهت لها بقوه\جاك الموت ياتارك الصلاه..
ابتسام مسكت جمانه من ايدينها وماسكه ظحكتها\أقول بلا خبال..أنتي وياها...الحريم لسه ماطلعوا..
جمانه طنشتها وحاولت تفك ايدها وغلا تضحك ..وتضحك..وجمانه جاها المرض وارتفع ظغطها من ضحكها\وقسم بالله ماهــدك..
صرخت غلا بدلع\يعني وش بتسوين لي..!
جمانه\بسوي فيك هوايل..أول شي بنتف شعرك اللي تستعرضينه لنا..وثاني شي بمسح هالحفله اللي حاطتها بوجهك..
غلا\ههههههههه ..ظحكتيني..
ابتعدت فجر عنهم وخذت صينية الدلال وطلعت بره المطبخ..وابتسام صارت بينهم..غلا وراها..وجمانه قدامها..وكل واحده فيهم تضرب الثانيه بإيدها\حسبي الله على بليسكم..احترموني على الأقل..
غلا ترفع ايدها وتصوب ضربه خفيفه لجمانه وتشيلها ثانيه\هي اللي بدت..
جمانه وصلت عندها\انطمي يا****ه..لسه ماشفتي شي...ومشعت اطراف شعرها..وعلى طول غلا ضربت إيدها ورفعت شعرها..وطلعت لسانهاعشان تقهرها\يعني يتخويفني..يعني...!!
ابتسام يأست منهم ودزت جمانه وطلعت بره المطبخ تلحق فجر..
أما رقيه وسبيكه تشابكوا في بعض وبدو خناقه جديده..
مين اللي بينتصر..!!؟؟
=========
رفع عينه على ساعة ايده ..بقى نص ساعه ويبتدي الاجتماع..
وبنته مو راضيه تهده؟؟؟
تبي تروح بيت جدتها..وبنفس الوقت تبيه يروح معاها..
قابضه ايده وتصيح بجنون طفله..
وهو ثارت اعصابه..وتوتر أكثر..
وعرف انه بنته راسها يابس..ومو بسهوله ترضى..
هدى أعصابه شوي..وجلس على ركبته ومسح دموع بنته\وبعدين يابابا..خليني اغطج..واروح..عندي شغل..
ردت ريوف عليه وهي ماده شفايفها بطريقه تذوب\مابي..تعالي معاي..
عبدالرحمن\ليش حبيبتي..هناك بتشوفين بنات مثلج وبتلعبين معاهم..
جنت ريوف اكثر يوم تذكرت عزيز اللي ضربها الأسبوع اللي فات بدون سبب..وصاحت زياده..\عبدالرحمن\اللحين أبي أعرف ليش تبجين..!!
ريوف\بث..ماأبي ألوح لوحدي..
عبدالرحمن\عمري روز في بيت يديده تنتظرج,,
ضربت ريوف رجولها بالأرض وثارت أكثر وهي مصممه على رايها\ماأبي..ماأبي..ماأبي..
تضايق عبدالرحمن..بنته دلعها حيل..وهذه نتيجة الدلع الزايد..مسكها من ايدها وطلع من حديقة بيته متجه لبيت عمه يوسف ..
دخل حوش البيت وشاف بنته سكتت ..وشكلها ارتاحت..
لكن المصيبه كيف بيدخلها اللحين..!!
شاف حرمتين بيدخلون من باب الحريم وحس بالإحراج بعد شوي عن الباب وناظر بنته\ريوف حبيبتي .يالله دخلي
تركت ريوف ايد ابوها يوم سمعت صوت جدتها ودخلت البيت..
وهنا ارتاح عبد الرحمن وسرع من خطواته وركب سيارته للشركه..
واول مادخلت ريوف البيت شافتها فجر وخذتها لحضنها وهي مشتاقه لها مره\شلون الحلوه اليوم..
ردت ريوف بخجل\تيبه
ياسمين اللي كانت جنب فجر عرفت أنه اللي شافته من شوي هو عبد الرحمن..
فجر\امانه عليك ياياسمين..عمرك شفتي جمال مثل هالقمر..
ياسمين ابتسمت بحنان\ماأظن..تعالي حبيبتي .
فجر\روحي ريوف..سلمي على خاله ياسمين...
قامت ريوف من حظن فجر وقربت جنب ياسمين وهي مستحيه وايدينها الثنيتين حاظنتهم ومنزله عيونها بألأرض..
ياسمين يوم شافت حركات ريوف العفويه ماقدرت تستحمل خذتها بحظنها وضمتها\حبيبتي والله..تهبلين..
فجر\ريوف..قولي لخاله شكرا..
ريوف بمستحى\ثكرا..
ياسمين ماتت على هالبنت\فديت هالثكرا اللي طالعه من ثمك..تروحين الروضه..!!
ريوف ببراءه\ايه..
ياسمين\شاطره..
ريوف\الأبله تقولي شاطره..وحلوه..
ياسمين\وماكذبت ابلتك..انتي شاطره وحلوه وقمر بعد..
فجر\يالله ريوف حبيبتي..روحي لعبي مع البنات,,
أعتفس وجه ريوف بعد ابتسامتها الخجوله وقالت ببراءه\هنا عزيز..؟
فجر\لاحبيبتي ماجاء..
رجعت الأبتسامه لريوف مره ثانيه وراحت تلعب مع ألأطفال بطلاقه وراحة بال..
===============
كان وقف جانب نافذة الغرفه اللي تطل على الشارع..
توه كان متسبح ..والماي لازال مبلل شعره الطويل..
حط ايدينه بمخابيه يلتمس أي ذره دفا بحنايا جسمه الحار..
واللفافه الرماديه الصوفيه الطويله لافها برقبته بأحكام..
اليوم كان الجو صقيع..وبارد يخترق الأنفس..
وظل هو وثامر مرابطين بالشقه..
طاحت عينه على التلفون..ورجع يفكر.يكملها او لا..
قرب جنب تلفونه ومسكه بايده..
وده يكلمها..
وبنفس الوقت ماوده..
كل ماتذكر أنها ماسلمت عليه يتراجع ويقفل السماعه... ويرفعها مره ثانيه..
وبين هالحيره والتشتت واللهفه..
ظغط على رقمها وحط اتصال
ورجع للنافذه..
ينتظر رد منها..
::::::::
جمانه كانت توها طالعه الدور الفوقي ترتب شعرها ولبسها اللي عفسته بعد معركتها مع غلا اللي انتصرت هي فيها
وتوها بتدخل حمام الغرفه الا سمعت تلفونها يدق..
وكان المتصل رقم خاص..
دق قلبها هاللحظه..
حست أنه الوليد..
وبدون شعور ظغطت على رد وسكتت..
الوليد\جمــانه.
يوم سمعت صوته وهو ينادي باسمها التفت الجهه الثانيه وكانها تبي تبتعد عن مسمعه ..
ركظت لباب الغرفه وقفلته مرتين..
واحساسيس كثيره خالطتها خايفه..وتايهه..ومتولهه..
الوليد\جمانه..انتي معي..
أحتارت تتكلم..والا تسكت..ففضلت السكوت..
والوليد بعجز\اسكر..!؟
جمانه\لاااا...
ابتسم الوليد..اخيرا سمع صوتها..
يحس سنين طويله فاتت وهي بعيده..وهو بالمثل بعيد\ على سلامة عمتي..
جمانه بهدوء وهمس\الله يسلمك....شخبارك..
احتار الوليد..شيقول لها..
ضايع بدونكم..
مايقدر
الوليد\..لكن ....مشتـاق..
ماتدري ليش تصير غبيه اذا كلمته..
ماتدري ليش ترجع ذيك الطفله الخجوله اللي تتخبى ورى أمها
ماتدري ليش تنسى كل الحروف الأبجديه
وتظل ساكته تسمعه..
وتكتفي بصوته
كانت وده تقوله حتى انت وحشتني أكثر..لكن فضلت أنها تسكت مثل كل مره
لكن انفاسها كانت مضطربه وغير ثابته..
وهي تتخيل..أنها لو قالت له وحشتني..
وش بيكون حالها..!!
مسكت الورده الصفراء اللي تقطعت شوي من اوراقها وشالتها من شعرها
ومسحت عليها برقه والرجفه مصاحبتها..وشمت رحيقها بعمق..
وهي تحاول تلهي نفسها باي شي يثبت أنفاسها.
ظغطت على الورده عشان تخفف ارتجافها..
وحست بهدوء الوليد وحيرته..
"""""""
الوليد ظل يناظر بالسماء والثلج اللي نزل وغطى على الشوارع كلها..
ويسمع انفاسها تخترق التفلون وتوصل له..وتسكن روحه وكأنها عاصفه جارفه مليانه شوق ولهفه
وحس فجأه بحميمه..
حميمه عذبته أكثر..وخلته يشتاق ويحن..
جات في باله فكره لكن مايدري هل راح جمانه تقبلها أو لا..!!
قرر يقولها وهي بإيدها الخيار..
الوليد\جمانه..ممكن تعطيني ايميلك..!
جمانه كانت ساكته ومستلمه لأنفاسها الغير هاديه.
لكن يوم سمعت كلمته الأخيره رجعت لواقعها بعد هالأحلام اللي تتخيلها
وجاوبته بـــ ليش..!!
الوليد\يعني..عشان أيش.!!تتوقعين..لاتصيرين ساذجه,,!
جمانه بعتب وحيره\أنا ساذجه..!!
الوليد وتأفف\تونا حلويين..!
جمانه وعصبت اكثر على تأففه\وبعــد..!!..تبى شي الوليد..!!
الوليد\ايه..
جمانه بضيقه\الي هي,,!!
الوليد بكل جوارحه قالها\ابيــك..وسكت..ينتظر ردها..وطال السكوت فتره مو قليله..
جمانه غمضت عينها والكلمه ترد في أذنها..
أبيــك..
ابيـك
ومو أول مره يقولها الوليد لها..
لكن لاحظت هالمره كان له معنى مختلف...وشعور مختلف..
غمرتها فرحه فظيعه..خلتها تبتسم بدون شعور..
تخيلت انها مع الوليد..
لوحدهم..
بعالم خاص لهم.
وانحرجت من هالأفكار اللي تخيلتها
وسمعت طرق باب وفتحت عيونها على طول وهي خايفه
مسك الوليد النافذه اللي كانت مبلله بالماي وكتب اسمها بداخل قلب مايل \بتطولين..!!
جمانه\الوليد..اسمع أحد يطق الباب..مع السلامه..
الوليد\لا ..جمانه لاتقفلين..قولي اول..
جمانه وتناظر الباب \شقول..!!
الوليد\خلاص..برسلك مسج في ايميلي واضيفيني..اتفقنا..!!
جمانه\ليش طيب,,!!
الوليد\في اشياء كثيره أبي أقولك اياها..!!
جمانه وارتبكت\طيب مع السلامه.
الوليد حس بالراحه والقبول المبدئي منها\مع السلامه جمانه..وقفل الخط وهو مبتسم
واخيرا بيرتاح
================
بعد ماخلص يوسف شغل الصاله اليومي..
توجه للسوبر ماركت وشرى أغراض للثلاجه..
وكيكة التوت اللي يحبها لؤي بالكريمه..
حاسب الكاونتر..وطلع يمشي للشقه ..لأنها ماكنت بعيده كثير..
واول مافتح الباب حط الأغراض على طاولة المطبخ وفصخ جاكيته ودخل الغرفه..وهو مقرر أنه يفاتح لؤي مره ثانيه..
ولازم اليوم ينهي الموضوع باي وسيله..مهما كانت العواقب
لكن اللي تفاجا منه أنه لؤي مو بالغرفه,,
فتح الحمام ونادى باسمه..وماشافه..
رجع للصاله وهو محتار..!!
مو من عوايده يطلع هالحزه..!!
جلس على الكرسي وحط ايده على راسه..\وينك يالؤي..!!
معقوله مع عبير..!!
لكن مو لهالحزه..!!
وليش ماترك لي نوته..!!
حرام عليك..حرام عليك يالؤي..!!
تنهد يوسف بضيق..وحاول يلهي نفسه لمن يوصل لؤي,,
دخل المطبخ ودخل الأغراض بالثلاجه..
وصب له عصير ليمون يهدي اعصابه,,
ورجع للصاله مره ثانيه..
وجلس يشرب العصير ويفكر..وين بيكون لؤي اللحين..!!
مرت ساعه..وساعتين..وثلاث..وخمس..
ولوي..مارجــع..
والنوم بدى يسيطر عليه..
وخوفه وقلقه على صديقه موتره وناقز قلبه..
يحس أنه لؤي فيه شي..
لكن مو عارف كيف يتصرف.!!
هو يدري أنه طول هالأسبوع منشغل عنه ومبتعد..
لكن يجي الشقه ويشوفه نايم بسريره..
وحتى لو تأخر .مايتأخر لهالوقت..
وبين هالتفكير والحيره والخوف..
اسند جسمه على الكرسي..ومال براسه...
وغالبه النعاس..واستسلم له..
ونام بقل حيله..
ومعدته فاضيه وتأن من الجوع..
‘‘‘‘‘‘‘‘‘‘‘‘‘‘‘‘‘‘
كوابيس كثيره مرت في باله,,
وكلها مزعجــه وغريبه..
مر بخياله لؤي وهو يركض لبعيد والدموع تسبق انفاسه..
كان يناديه بصوت عالي..
كان يصرخ باسمه ويقوله لاتروح عني.أنا محتاجك....
كان يترجاه ويتوسل له..
لؤي..لــؤي تعال..لاتتركني بروحــي..ارجوك تعال..
لكن لؤي مايسمعه..كان يركض لمكان بعيد ويبتعد عنه..
ويوسف يحاول يسرع من خطواته ويجيه..
ويوم وصل له حاول يتمسك فيه بكل قوته..
واول ماالمسه..
أختفى لــؤي..
وكانه ســراب ..
فتح يوسف عيونه بشده وهو يحاول يلمس الهواء اللي كان مستحل روح لؤي..
لكنه ماقبض بأيده الا هالهواء اللي كل ماله ويزيد وكانه ريح بتاخذه وبتمحيه مثل مامحت صديقه..
وفجأه سمع يوسف صوت من وراه يناديه..
وهالصوت كل ماله ويزيد..
لمن حس أنه هالصوت بيخترق أّذنه..
ميز هالصوت..
هالصوت يعرفه..
نبرته مو غريبه عليه..
هذا صوتـه..
هذا صوت لؤي..
يستنجد فيه..
يوســـــــــــــــــف..
:
:
صحى يوسف من نومه وهو يصرخ وينادي لؤي..!!
ويوم فتح عيونه عرف أنه بالشقه..
رفع عينه على الساعه وشافها 4..4 الفجر..!!
حاول يتذكر اللي صار له أمس..
وتذكر أنه لؤي لسه مارجع..
وعلى طول قام من الكرسي وهو يلعن نفسه لأنه نام وماحس بروحه..
لبس جوتيه..وخذ جاكيته اللي معلق على الباب وطلع يدور على صديقه بكل مكان..
جات في باله اشياء كثيره...
وتذكر الحلم اللي حلمه عن صديقه..
ومات خوف ورهبــه..
وكرر في نفسه أنه لؤي صار له شي كبير..
وهو الغبي اللي نام وماحس بروحه..!!
وش بتكون حياته بدون لؤي..!!
وش الدنيا بتعطيه من الهموم أكثر..
مو كفايه عليه..!!
رفع عينه للسماء وشافها مغيمه والنور يتخللها من كل ناحيه..
فكر كثير.
وين بحصله اللحين..!!
وين ممكن يكون موجود..!!
تذكر صديقته عبير..لكن أستبعد الفكره على طول..
لأنه لؤي مستحيل يسويها ويبات عند صديقته..
نزلت الدموع من عيونه وهو عاجز عن فعل أي شي..
وهذا هو يدور بشوارع فرنسا بيأس وضايع..
محد جنبه..ولحد يخفف عنه مصيبته,
تذكر أول أيام غربته ..
وكيف كان يدور بهالشوارع بدون هدف..
تذكر جوعه ومرضه وحاجته.. والمه وعذابه..
ونزلت دموعه أكثر واكثر..
وهو حاس انه الزمن يعيد نفسه..وبيظل وحيد بهالبلده..
مثل ماكان وحيد ببداية غربته ..
ولأنه تعبان وعلى لحم بطنه من أمس..
ظل يكح ويكح من اعماق قلبه..
وصدره يألمه كل ماكح بشده..
حس أنه روحه بتطلع من كثر مايكح..
وجلس على الأرض الشارع بعجز..
هو يتمنى لو ماي يبل فيه ريقه..
دارت عيونه على المكان وشاف انه المكان خالي من الناس
والكل في بيته نايم..
رفع عينه للسماء وظل يدعي ويدعي أنه الله يبعد الشر عن صديقه..
ظل يدعي ربه بقلب صادق
وقلبه معتصر ندم وحسافه على اشياء كثيره..
واولها أنه طول هالفتره كان هو ولؤي مبتعدين عن بعض..
وبدال مابياخذ بخاطره ويسال عنه..صده والتهى بشغله..
تذكر عيونه اللي كانت تحكي اشياء كثيره..
تذكر حزنه اللي يطفر منه كل مالتقت عينه بعينه..
وكل هالأمور تجنبها وطنشها..
واللحين هو ندمــان أشد الندم على ضياع فرص كثيره ممكن أنه يكتسبها..
هو يدري انه الندم ماله فايده اللحين..
لكنه مايعرف شي غير الذكرى الأليمه والدعاء لصديقه..
قام من الأرض وهو يتحسس صدره ويظغط عليه بالم..
ومشى يدور عليه للمره الثانيه..
وعهد نفسه بين وبين ربه اللي عالم بحاله وشاهد على كل لحظة ندم مر فيها..
انه يدور لؤي مره وثانيه وثالثه لمن يلقاه ويرتاح فؤاده..
وحتى لو هالشيء بيسبب ضرر له..
بيدوره بقلبه وروحه..
لمن ينقطع نفسه..
وكانه الله أستجاب دعائه وحقق مراده..
اول ماتحرك خطوه عن المنطقه اللي هو فيها
وصار قبال الجسر اللي يطل على شارعين..
سمع أصوات بعيده..ولها صدى قوي..
قرب من هالصوت اكثر..
وكانه يتذكر الحلم اللي بمنامه..
وعرف أنه لؤي قبل مايشوفه..
دموعه نزلت مره ثانيه وحاول يمسحها بطرف كمها..
وظل يركض للصوت لمن أختفى..
ووقف,,
وقف وسط الشارع وهو ينتظر الصوت يطلع مره ثانيه..
وطلع هالمره بصوت اعلى من اللي قبل..
لمن وصل لنهاية الجسر..
وشاف رجال ملتوي على الأرض مثل الربيانه..
وعرف أنه لؤي من لبسه..
قرب منه يوسف وهو ينادي عليه ويصيح\لـــؤي..
جلس يوسف على الأرض مقابل له..وحظنه بكل قوته وحط راسه على صدره.. وهو يحمد ربه ويشكره على استجاب دعائه..
حب راس لؤي ووجهه وايدينه الثنتين وهو يصيح ويصيح على شوفته..ويضحك بجنون وفرحه..
ولؤي كان يهذي بأشياء غريبه مو مفهومه..لكن يوم شاف يوسف نادى باسمه وظل يصيح مثله
حس يوسف بشي غريب بــ لؤي..وبريحه غريبه وكريه..
ويوم قرب من فمه..
شم ريحة الخمر اللي تفوح منه..
ابتعد عنه وقام وايده ماسك فيها صدره.. وكانه شي قذر والمسه.
لؤي رفع ايده صوبه باستسلام ورجا\يــوســف..
==========
أنتهى الجزء..
واتمنى أنه نال على اعجابكم..!!
وماعندي أسئله..لأن قلمي عاجز وضايع..
وهالمره أنا أبي أشوف تعقيبكم على كل شي..!!
12-06-2007, 03:44 PM
