وقال القلب آآآآآآآآآآآآه ((قصه رومانسيه إجتماعيه واقعيه))

[حنونه]

المشاركة الأصلية كتبت بواسطة trezor

حرام عليك يا حنونة القصة حلوة كتيروبدنا نعرف نهايتها بسرعة الله يخليك.وانشاء الله تزيد لنا متل ها القصص الحلوة
أشكرك كتير يا حلوة

العفوووو حبيبتي
الحمد لله إن القصه عجبتكم
والتكمله جايه بالطريق
يعطيك العافيه على مشاركتك...

[حنونه]

الجزء الثالث عشر:

أم راشد قطعها قلبها على ولدها بعد ماسمعت كلامه <وقامت تبكي مثله..
أم راشد:ياولدي لا تقول كذا وانا أمك قوم تعال وارجع لي أضمك واحظنك قبل مااموت ياولدي..!
حسين بقد ما انصدم فرح من قلب: بعد عمر طويل يا يمه لا تقولين كذا عسانا ما نخلى منك ياشمعة البيت..
شلونك ولهت عليك يا الغالية..؟
ام راشد: كذاب ومن عيونك لو أني واحشتك مثل ما تقول كان جيت لي ورجعت لحظني مو صابر على فراقي سنتين يا الظالم <وقامت تبكي وهي تكمل :يا ولدي هذا قضاء الله وقدره وحنا لازم نرضى به ونخلي إيمانا بالله قوي
وانت مالك ذنب في اللي صار ياولدي ..
حسين:ونعم بالله..صح ان ذنبي مو مباشر بس يرجع ويكون
بسببي لأني انا الوحيد اللي ينلام في هاذي السالفة ..
ام راشد:ياولدي انسي والنسيان نعمه وقوم تعال لي اشوفك واضمك لصدري وأكحل عيوني بشوفتك يا الغالي ياللي من ريحة الغالي ..
حسين:يمه..مو الحين والله ما اقدر أشوفكم وانا سبب بلواكم ..!
أم راشد بحزن:ياولدي قوم تعال واترك عنك هالخرابيط قوم ياحبيب أمك ارجع من هولندا بلاد الأجانب وتعال لبلد العرب اللي أنت منهم..!!
حسين:يمه آنا مو في هولندا..!!
أم راشد تفاجأت:شنو؟! عجل فين انت؟؟!
حسين:يمه آنا في السعودية وبالخصوص في مكة المكرمة ..
أم راشد:وكيف ومن متى؟!
حسين:آنا صج لما سافرت رحت هولندا بس ثلاث شهور وبعدين السنة وشوي الباقيين قضيتهم في مكة وعايش مع صديقي في شقة وندفع الإيجار نص بالنص ...
أم راشد:طمنتني ياولدي دام انك عايش في بلاد الإسلام وأرض الكعبة الشريفة لكن يله ياولدي عشان تثبت لي غلاي عندك روح تعمر وادعي لنا وتعال ارجع قبل هالأسبوع وخلني اشوفك..
حسين ما حب يقطع قلب أمه أكثر ويخليها تتذلل له لا سمح الله وهو بعد عنده رغبه كبيره بالعودة لهم فقال لها: إن شاء الله يمه يا أحلى أم بهالوجود..!
أم راشد:يله في أمان الله وحفظة يسلمون عليك خواتك..
حسين:الله يسلمهم ولهت عليهم بلغيهم تحياتي..
ام راشد:إن شاء الله يله ياولدي في حفظ الرحمن..
حسين:أجمعين ان شاء الله ..
سكرت أم راشد التلفون من حسين وهي تتنهد بفرح وارتياح..
وفاء وهي راجعه الصالة ومستغربة من الكيس اللي ما عمرها عبير ذكرته لها وفيها فضول كاسر تبي تعرف شنو سالفة هالكيس..؟؟!
وسمعت ناصر يقول:هاذي انت يا وفاء تعالي قولي لي شنو صاير ؟
وفاء:لحظة ياناصر بشوف شنو هالكيس اللي يايبته عبير..؟؟!
ناصر وهو متوتر:زين بسرعة..
وفاء فتحت الكيس وكان فيه هدية صغيره مغلفة وشكلها مرتب وفوقه ورقة دفتر عاديه مره فتحتها وهي تقرأ بصوت عالي:وفاء حبيبتي تركي عنك اللقافة ولا تحاولي تحوسي باللي في الكيس لأني أدري ان الفضول ذابحك الحين ..وفي اقرب فرصة تقدرين تشوفين فيها ليلى خالتك عطيها اياه وقولي لها إني ارسلته اليوم يوم مولدها..
وتستـــــــــــاهلين لأني انا اللي غلبتك..
.................................................. .......
وفاء توها مستوعبه السالفة ..وخلاص انقهرت وودها لو تكفخ نفسها وهي تتذكر أحداث هالسالفه اللي قبل 8 شهور ..يوم تجي ليلى تبات معاهم وتتجمع مع عبير في بيت وفاء :
ليلى:شوفوا بنات خلونا نتفق ..!
عبير:على شنو نتفق؟؟
ليلى بمسخرة:حنا الحين تقريباً متقاربين في السن ولكن أكيد في وحده قبل الثانية .......
وفاء تقاطعها:ايوه كملي بلا مقدمات..
ليلى:زين صبري يا الغبية خليني أكمل ولا تقاطعيني..
عبير:يله زين كملي وتركوا الهواش..
ليلى:خلونا نتفق ان أول وحده تتذكر يوم ميلاد أي وحده فينا تكون الرابحة..
وفاء وهي رافعة حاجب<كانت منقلبة عليهم ذاك اليوم>:طيب شنو بتعطوني لو ربحت..؟؟!
ليلى:اللي تتذكر أول وحدة فيكم لها مني مفاجأة بتسرها مرة..بس لو انا اللي ربحت شنو بتعطوني؟؟!
عبير:بنعزمك على أكبر عشاء في الدنيا في المكان اللي تبينه ..
ليلى وهي تضحك بهسترة :ههههااي قف مي فايف..
وقاموا يضحكون...
وفاء تذكرت هالرهان اللي تراهنوا عليه هم الثلاثة وكانت حاطه في بالها أنها تبي تهزمهم بس للأسف فازت به عبير..!
ناصر حيران:هي أنتِ وين رحتي؟وشنو سالفة هالورقة وفي ايش عبير غلبتك؟!
وفاء رجعت من عالم سرحانها :ها ناصر خذ شوف وبتفهم,
ناصر أدرك ان وفاء نست انه مايشوف فسكت..
وفاء تداركت الكلمة اللي قالتها فقالت لأخوها تبي تخفف عنه:آسفة ناصر والله ما كان قصدي أجرحك انا بس كنت..
قاطعها ناصر:وهو يحن عليها لأنه يعرف أخته لمن تحس بأنها جرحت أحد تقعد تحاسب نفسها وتلومها طول اليوم: خلاص يا وفاء حصل خير أصلاً انا اليوم في المغرب موعدي في المستشفى يعني اليوم بعرف مصيري النهائي مع عيوني وإذا كنت برجع أشوف..؟!
في السعودية في المستشفى سالم كان قاعد في غرفة الأنتظار وهو يحاتي على أحر من الجمر ومعاه حسام صديقة يحاول يهديه:خلاص يا سالم اختك مافيها إلا العافية..
سالم واللي يعرف عن حركات حسام البطاليه كان حارقة قلبه على انه شاف أخته اللي يعرف أكثر من أي شخص
شكثر هي حلوة فهو خايف أن حسام يحط عينه عليها فهو هو بيكلمه بعدين لمن تتحسن حالة أختة: أدري ان مافيها شي..
حسام باستغراب:عجل ليه متوتر ومرتبك كذا وتروح وتجي؟؟!
سالم:بعدين ..بعدين..
طلع لهم الدكتور:السلام عليكم أخوانا..
سالم استلم الرد:وعليكم السلام..ها بشر يا دكتور؟!
الدكتور:شنو تقرب لك المريضة؟
سالم:جنان أختي يا دكتور..
الدكتور:والله ماادري شنو أقول لك بس هي حالتها النفسية مرة زفت شكلها تلقت صدمة خلتها تطيح..أنا بسألك :هي كيف كانت تصرفاتها هالأسبوع؟
سالم:والله أنا طول هالأسبوع كنت مشغول بس انا سمعت من الوالدة أنها صار لها أسبوع كل حابسة نفسها في غرفتها وماتطلع وما تأكل زين كل مالها خلق..
الدكتور:هي محتاجة تغير جو ذي حالتها النفسية مرة تعبانه شكلها تحاول تبعد نفسها عن الناس فأنتوا بدون ما تحس حاولوا تقربونها منكم أكثر وغير كذا مافيه..بس أعصابها مرة فالتة فحاولوا ما تثيرونها..
سالم منصدم ويفكر بصمت: كل هذا في أختي وأنا ماأدري شنو السبب ياترى؟ هي طول عمرها تمشي بفخر وخيلاء بس انا لاحظت عليها هالأسبوع انها مرة منكسرة الخاطر..الله يستر بس..
حسام كان يستمع للي يقوله الدكتور ويتذكر دعائها على نفسها بالموت وهو مصمم انه يخلي البسمة تنرسم على فمها ..لأنها عجبته ودخلت مزاجه...!

يتبــــــــــع...

[حنونه]

الجزء الرابع عشر..

عبير في غرفتها تفكر بصوت مسموع وهي فرحانة:قال أيه قال عبير تنهزم وأخيراً رويتك شغلك ياوفاء الحين أكيد الكيس وصل لك وعرفتي بكسبي للمعركة ههههااي.. بعدها ضحكة ترن في نواحي الغرفة ويصاحبها هالمره صوت جوال عبير يرن وشافت أن وفاء المتصلة رفعته وهي تضحك:يا مية أهلين وسهلين..
وفاء بحمق وعصبية:في عين عدوك قولي آمين..
عبير وهي بعدها تضحك وبطريقة غرور:قلت لك بحطمك ما صدقتيني وأنتِ على كيفك
وفاء:أكيد على كيفي عجل على كيفك..
عبير:أقول وفاء حبيبتي خلاص سكري الموضوع والله راسي مصدع ومو قادرة..
وفاء بمسخرة:سلامة راسك يا الخاينة..
عبير:أمواه لحبيبة قلبي..سمعي شرايك تشبكين الحين يمكن نلاقي ليلوه نطفشها شوي..
وفاء:تصدقين قود آيديا ..يله بروح اشبك بـــــاي..
عبير:بـــــــاي..
نرجس وكوثر وهم نازلين من غرفتهم ويضحكون راحوا لقوا أمهم متونسة بعكس حالها لمن تركوها مالها خلق فسألتها كوثر:يمه علامك فرحانة؟
أو راشد:فديتكم والله أخوكم حسين يسلم عليكم..!
نرجس بأستغراب:حسسين؟!ليش هو رد عليكم؟!
أريج:أيه وخلاص كلها أسبوع وهو راجع ..
نرجس:يابعد عمري أخوي أشتقت له..
راشد:هي أنتي وآنا وين رحت؟!
كوثر:أنت بالقلب وهو معاك..هههههههااي
أريج تقاطعهم:يله يمه آنا بروح الحين البيت تعبانة تآمروني على شي..
أم راشد:شنو فيك يا أريج صج أنتِ وجهك صاير لونه أصفر..؟!
أريج زاد توترها:ها يمه ولا شي سلامتك بس راسي يعورني..<ورن جوالها>خلاص يمه هذا محمود يله باي ..
الكل:مع السلامة..وحطي بالك على نفسك(قالتها أم راشد)..
ريم مع خالد في غرفتها ..وهو منسدح على سريرها وهي جالسة على الكرسي اللي قدام المرايه وتسحي شعرها(تمشطه)وتقول:حبيبي خلود..؟!
خالد:قلبه..
ريم بخجل:تسلم ...بغيت آخذ رايك ...
خالد بأهتمام:في شنو..؟
ريم:وش رايك نروح اليوم المغرب نخطب لناصر بعد مانتصل وناخذ منهم موعد وعلى ماتستوي السالفة وتخلص الأجرائات بتاخذ أسبوع وهو بصراحة معور قلبي وودي أشوفة مع اللي تسعدة ..
خالد:والله فكرة حلوة خلاص قومي نروح نسأله وإذا موافق هو وأمك وأبوك ماعندي مانع..
وقامت ريم مع خالد عشان ينزلوا تحت لكن اللي حصل أنهم سمعوا كلام ناصر لوفاء أنه اليوم موعدة في المستشفى ..وأنهى ناصر كلامة بوصول خالد وريم للصالة فعرف أنهم سمعوه ..
ريم:صج ياناصر؟! مادريت أن اليوم المغرب موعدك في المستشفى والله توني أقول لخالد أنك تبي لو تبي نروح اليوم المغرب نخطب لك عبيروه بنروح..
وفاء:هي لو سمحتي أسمها عبير..!
خالد:أي والله قاعدة وهي تقلب في أسامي الناس ولو أحد قال لها ريموه تزعل..!
ناصر كان يفكر بكلام ريم:لا يا ريم أنتِ أتصلي فيهم وخذي الموعد بكرة أن شاء الله عشان أمون أنهيت فحوصاتي وعرفت مصيري فهي لها الحق بمعرفة كل شي قبل ما توافق على الأرتباط فيبني ..
وفاء بأعجاب:صح لسانك نصور..
ناصر يدعي الغضب:هي لاتبدين بالغلط أسمي ناصر مو نصور..شنو أصغر عيالك آنا..!
خالد:آآآه بكرة بنشوف أم العيال إذا ماقالت لك نصور وأحلى على قلبك..
ناصر برومانسية:شلون عجل هاذا أنتت قلتها بلسانك أم العيال...
ريم تبي تختبر خالد:أحم أحم ..خلودي..؟!
خالد:شب ! شنو هاذي بعد خلودي ؟أخوك الصغير وأنا ماادري..؟!قولي خالد وعمى..
ريم بتعجب:طالع هذا مو توك تقول لناصر انها لمن تكون من أم العيال أحلى على قلبك؟!
خالد يحب ينرفزها:ايه هذا أنتي قلتيها لو كانت من أم العيال..؟!
ريم:لا والله أحلف..عجل آنا منو..؟
وفاء:هههههااي ..أنتِ حي الله خطيبته الدلوعة..
ريم:شبي أنتِ بس..مااحد دخلك في الموضوع ..
خالد:هي لاتغلطي على أختي الغالية تراها الوحيدة وأنا اللي دخلتها..عندك مانع يعني..!.؟
ريم وهي تمد يدها:مالت عليك بالعشر أنت معاها ..
وفاء تطلع لسانها بحركة تقهر ريم..
ناصر:بسكم أنتوا ماتجتمعون في مكان ألا تهاوشتوا اللي يسمعكم يقول نسوان ريل ..خلاص صدعتوا راسي..
خالد:سلامة راسك يا الأخو(وهنيه رن جوال خالد )..
خالد وهو رافع التلفون:هلا والله باللي ناسيني..
المتصل:شدعوة عاد أمس شايفك ولا جنبك أحد تبي تقهره..
خالد:ماشاء الله عليك دايم ذكي وتفهمها وهي طايره ..وينك حبيبي أشتقت لك..!؟
المتصل:ههههااي والله أنك نكتة مع هالريم ..شنو صاير بعد متهاوشين؟؟
خالد:لا ياقلبي لا تفاول علي بس كذا تعرف أحبك شسوي بعمري ..
المتصل:هههههه ..أقول وأنا أخوك تراني زهقان وطفشان وجالس في البيت بروحي ماكأن عندي أخو المفروض يقعد معاي..
خالد:شدعوة حبيبي أنت تآمر أمر الحين جاي لك ..والله ماأقدر أخليك يانور عيني..
المتصل:هههههه أكيد ماتقدر أخوك الوحيد يله أنا أنتظرك..باي
خالد:بايات..
ريم بغضب بس تدعي الهدؤ:شدعوة ..حبيبي ونور عيني..كنت تكلم منو؟
خالد مستمتع:والله كنت أكلم واحد..
ريم:أدري أنه واحد لأنك ماتقدر تكلم وحدة..والله لأقص رقبتك لو تكلم وحدة..
خالد:وأنتِ شدراك يمكن وحدة وأنا قاص عليكِ ؟؟..!!
ريم خلاص عصبتْ:طز فيك أنت معاها..وركبت غرفتها دون ماتعطيه مجال يرد..
خالد يضحك لكنه متألم في قلبه لأنه آلمها وهو يدري شكثر هي تحبة وتغار عليه من الهواء اللي يتنفسه..وتذكر هالموقف قبل خطوبتهم يوم يروحون البحر مع بعض كلهم وتجي له وحدة تقول له:لو سمحت يا الأخو ممكن تجي تساعدني بحمل هذا الكرتون..؟
هو طالع في ريم اللي أحمّر وجهها وتوه بيمشي يساعدها الا وهي تروح لها :تعالي أختي أنا بساعدك..وتم مبتسم عارف أنها تغار عليه..وتقطع أفكاره وفاء:
هي خلود منو كنت تكلم؟!
خالد:ههههههه كنت أكلم نايف أخوي بس حبيت أحرق أعصابها..{خالد ماعندة الا أخو واحد ويتيم الأبوين}
وفاء:آآآه الله يهديكم ..أنا بروح أشبك مواعدة عبير عشان نبي نلعب على ليلوه خالتي يله باي..
خالد :أنا بعد بروح يله باي..
أحلام طلعتْ من الماسنجر بس لأانها ماقدرت تتحمل هالعواصف من المشاعر الجديدة اللي تجتاح قلبها فخافتْ خافت تسوي شي تندم عليه بعدين وطلعت..وكاهي بعدها جالسة قدام شاشة الكومبيوتر والنت شابك ومو قادرة تسوي فيه شي وسمعت أحد يطق باب غرفتها..
أحلام:دخلي..
عبير:وش دراك يا الساحرة أن دخلي مو أدخل؟؟.!
أحلام وهي لازالت سرحانة:لأن احنا يا الذكية كلنا بنات وماعندنا ريايل في البيت وأبوي بعده مايرجع من المسجد ..
عبير:واااو ماشاء الله عليكِ محللتنها..أوكي أحلاموه أشوفك حطيتي الكومبيوتر في غرفتك واستحليتيه كأنه لك وحدك تراني أبي أجلس عليه شوي يله بسرعة...
أحلام:خذيه ماأبيه..
عبير أستغربت أول مرة في حياتها أحلام تتنازل عن النت بسهوله {هم حالتهم المادية وسط يعني الحمد لله لاهم أغنياء ولاهم فقراء..على قد الحال فما عندهم غير كومبيوتر واحد في البيت}
عبير:أحلام فيك شي وأنا ماادري عنه؟
أحلام انتبهت لنفسها:هاه ولا شي سلامتك قلت لك أخذية وفكيني من القرقة الزايدة..
عبير:على راحتك..وقامت عبير وفتحت مسنجرها..لقتها شابكة وعلطول كلمتها :
(ناداني الحب ولبيته):هلا والله بالغلا ليلى..
(أنفاس خامدة):هلا فيك عبيروه شلونك؟
(ناداني الحب ولبيته):الحمد لله تمامووو أسأل عنك..؟
(أنفاس خامدة):سألأت عنك العافية..أنا بخير ولله الحمد..
(ناداني الحب ولبيته):دوووم موب يوووووم يارب..
(أنفاس خامدة):يسلمووو
(ناداني الحب ولبيته):صج..كل عام وأنتِ بخير..
(أنفاس خامدة):وأنت بخير بس ليش ؟احنا سنة جديدة الحين؟؟!
<في هاذي اللحظة شبكت وفاء>وعلطول كلمت ليلى..
(في خاطري لو أشوفك مرة ثانية):هاي ليلوه..شفتي عبيروه فازتنا..هئ هئ هئ هئ
<ليلى توها مستوعبه أو متذكره السالفة فأشركت عبير معهم في المحادثة..>
(أنفاس خامدة):يؤ صحيح اليوم عيد ميلادي والله نسيت على البركة عبير أخيراً قدرتي تهزمي وفاء..ههههههههااي
(ناداني الحب ولبيته):أي والله أخيراً..قف مي فايف..هههههه
(في خاطري لو أشوفك مرة ثانية):لا والله حلفي أنتِ وياها شرايكم أطق لكم بلوك ونخلص..
(أنفاس خامدة):لا والله حلفي أنتِ بس هذا بعد واليوم فرحتكم بي ..
(ناداني الحب ولبيته):ماعليكِ منها ليلوه أنتِ بس قولي لي متى بتجين لنا البحرين؟؟
(أنفاس خامدة):ليش؟مافالت لك وفاء أني خلاص بجي أدرس وياكم في البحرين؟
(ناداني الحب ولبيته):بلى قالت بس شنو السبب مادريت؟؟
(أنفاس خامدة):ماأدري والله بس أبد مو مرتاحة في الجامعة اللي أنا فيها وغير كذا في بنات مضايقيني ومفتقدتكم وايد فقلت أجي لكم بدل قعدتي بروحي ..<ليلى بنت وايد هادئة وماتندمج مع أحد بسرعة تحب الوحدة دوم وهذا اللي مخليها مفتقدة الناس الوحيدين اللي رافقتهم في حياتها اللي هم شلة وفاء وعبير>
(في خاطري لو أشوفك مرة ثانيه):أنا جيت شنو قلتوا عني مامداني رحت أكلم رفيجتي حشيتوا حش..!
(ناداني الحب ولبيته):بسم الله الرحمن وأنتِ كله شاكه في عمرك..فديت ليلوه ماتحش في أحد..
(أنفاس خامدة):شفتي شلون يا وفاء عندي مدافعين ..ألا تعالي صج بسألك أنتِ عمرك ماحطيتي نك نيم إلا وأنت تقصدين به شي ويكون حقيقي فمنو هذا اللي في خاطرك تشوفينه مرة ثانيه هاه أعترفي يامجرمه؟؟1
(ناداني الحب ولبيته):أيوه صج يا مجرمة منو هذا؟؟!
(في خاطري لو أشوفك مرة ثانيه):هههههههه هههههه هههههه ..عارفيني مااقدر أخبي عليكم شي..يا طويلين العمر هاذي سالفة طويلة ما تنقال بالماسنجر لمن تجون لي بعلمكم بها..
(ناداني الحب ولبيته):واااااااو حتى أنتِ ياوفاء صار عندك سوالف ..
(في خاطري لو أشوفك مرة ثانيه):هههااي أحترمي نفسك أقول هاذي سالفة عاديه مرة بس لو تسمعونها بتضحكون..
(أنفاس خامدة):خلاص فكونا ..على فكرة ترى انا بجي لكم البحرين بكرة..والحين لازم اطلع ..أشوفكم على خير..
(ناداني الحب ولبيته): على خير أنا بعد بطلع بـــــاي..
(في خاطري لو أشوفك مرة ثانيه):دامكم بتطلعون شقعد آنا أسوي ..يله سي يو..
<وكل وحدة سكرت جهازها من جهة وفي بالها أفكار من جهة ثانية>
شنو تتوقعون ياتر ى تكون نتيجة فحوصات ناصر.؟وأيش اللي بيصير في البحرين عند ليلى وعبير ووفاء؟وشنو السبب الحقيقي اللي خلى ليلى تغير جامعتها للبحرين ولا اللي قالته لعبير مقنع؟ومنو هذا اللي نفسها وفاء تشوفة؟
للجواب على هالأسئلة أنتظروني..
وأبي رايكم ..

[! موسيقى المطر !]

وين الباقي؟؟؟

[jolie]

روعةةةةةةةةةةةةةةةةةةةةةةةةةةةةةةة يسلموووووووووووووووووووو حيـــــــــــــــــــــــــــــــــــاتي

[حنونه]

! موسيقى المطر !:

إن شاء الله بكملها...

jolie:
الله يسلمك حبيبتي
يعطيك العافيه..........

[trezor]

و الله يا حنونة حرام عليك وين بقية القصة.
أرجوك ما تتأخري علينا.
يعطيك العافية يا حبيبتي.
كل الشكر من أختك trezor

[بن اليمن السعيدة]

احسنتي حنونه والله انك ابدعتي في رويه
القصه ماكنت اصدق ان هذه منك مشكوووووووووووووووووووووووووووووووووووووووووووووووووره

[حنونه]

trezor:

الله يعافيك حبيبتي

إن شاء الله إني بكملها
مشكووووره على مشاركتك...

بن اليمن السعيدة:
العفووو أخوي
شدعوه طايحين من عينك!!!!
خخخخخخخخخخخخخخخخخخخخخخخ

عموما يعطيك العافيه على مرورك...

[soso14]

حلوه القصه بس ياحرام كلهم يقطعوا القلب

ويعطيك ألف عافيه بس وين الباقي

أنا تعبت كل ما اندمج مع قصه لازم اتعذب إلين اعرف نهايتها

يالله في الانتظار ( على نار ) نار يا حبيبي نار