لؤي: رشا حبيبتي لازم تثقي فية وبوعدك انه اخرتنا لبعض
رشا: والله مجرد ما افكر انه انا رح اتسمى على غير عقلي ما بيستوعب كيف اذا صار الموضوع جد
لؤي: حبيبتي حبنا اقوى من اي ظروف ولازم نتحمل
رشا: خليني اسكر الخط لأنه ماما واقفة قدامي
ام رشا: شو بتحكي مع مين
رشا: مع صاحبتي
ام رشا: صاحبتك ولا لؤي؟
رشا: لأ مع لؤي. وبحب ابشرك انه انا موافقة على طارق, بس والله لتندموا على اللي عملتوه في
ام رشا: احكي منيح معي وغير هيك بحب اقولك لا احنا ولا انتي رح نندم
واتصلت ام رشا بأبوها وبشرته انه رشا وافق وحكيوا مع عمتها ورح يجي ابن عمتها المسا حتى يشوفوا بعض
ورشا المسكينة دخلت على غرفتها وضلت تبكي بقهر وحرقة بشكل بيقتل القلب
واخواتها قعدوا بهدوها بس عالفاضي شو اللي رح يعوضها عن حبيبها لؤي اي صدر ما رح يكون فيه حنية متل حنية صدره
واي ايد ما فيها مشاعر بتخدر الجسد متل ايد لؤي
واي عيون مافيها سحر بيدوخ متل عيون لؤي
كل الحب هاد نهايته تكون هيك ولا حرام
وبكيت وبكيت كأنها أول مرة بتبكي
كأنه البكا عشيقها
ام رشا: ماما حبيبيتي غسلي وجهك وهدي حالك وانشالله مارح تندمي
رشا: هلا انا حبيبتك, وين هاي الكلمة ما كنت بسمعها من كم يوم , انت لو بتحبيني ما بتعملي فيه هيك, لو بتحبيني ما بتبعديني عن لؤي, انت بتعرفي شو بتعملوا فيَ انتم بتدبحوني شوي شوي
ام رشا: ماما احنا بنعرف مصلحتك وين وانت اختيارك خاطئ 100% وانت لساتك صغيرة وما بتعرفي الناس واحنا من حكم خبرتنا بالحياة البشر بنعرفهم مجرد ما نطلع بعيونهم
رشا: يا الله شو هالثقة بس بحب اقلك انك غلطانة والايام جاي ورح تثبتلك العكس
ام رشا: على العموم على الساعة 7 جاي عمتك وابنها
رشا: وليه ابوه مش جاي
ام رشا: يا ماما زوج عمتك متوفي
رشا: شايفة كيف انه هو غريب علي لدرجة اني ما بعرف انه زوج عمتي متوفي
طلعت ام رشا من الغرفة ورجعت رشا تبكي
وقعدت عندها تيماء وهدتها شوي
تيماء : رشا ليه وافقتي
رشا: مش قادرة تعبت من الصراخ والحكي والمشاكل, حاسة الدنيا قلبت جحيم تعبت من الحكي والاقناع حاسة انه ماما وبابا ما بيسمعوني, حاسيتهم ما بيحبوني حاسة حالي ضايعة وغريبة عنهم, تالا اتغيرت ما بعرف ليه ما وقفت معي.
تيماء: حبيبتي انسي كل هاد المهم انت مقتنعة؟
رشا: طبعاً لأ انا ما بدي اياه انا بدي لؤي بس بدي ارتاح شوي بدي اطلع من البيت اشوف لؤي والله اشتقتله, هاي اسوء ايام حياتي مستحيل يكون في شي اسوء من هيك
بس انا لازم اطفشه
تيماء: هلا البسي حتى نختصر ماما وبعد مايروحوا بنكمل حكي
رشا: تعبانة ما فيً حيل اعمل شي
وجابت تيماء لرشا بلوزة لون بيج وتنورة خمري وصندل خمري وبيج وزبطلتها شعرها ومسحت وجها وحطت الها ميك اب خفيف, بس بتصدقوا هاي البنت جمالها غريب يعني حتى وهي تعبانة وباكية بس لساتها اية بالجمال وجها فيه نور غريب وعيونها فيهم حزن جذاب.
تيماء: ماشاء الله بتجنني
رشا: بس انا ما بدي اكون حلوة, حرام لو كان لؤي اللي جايني هلا , انا مابدي اعجبه بدي اياه ما يوافق علي
وبدلت ملابسها ولبست بنطلون جينز وبلوزة سودة ومشطت شعرها وربطته ديل الفرس
تيماء: لساتك قمر
وقعدوا يضحكوا التنتين ورن الجرس
رشا: قلبي بيوجعني
تيماء: حبيبتي قوي حالك والله يجيبلك الخير
تالا: مرحبا
البنات: اهلين
تيماء : شو اجوا
تالا: مين
تيماء: عمتك وابنها
تالا: شو رشا وافقتي
تيماء: yes
تالا: مبروك حبيبتي , وباستها
رشا: الله لا يبارك في على هيك عمله, ونزلت دموعها والبنات صاروا يهدوها ورن الجرس كمان مرة وكانوا عمتها وطارق
ام رشا: يلا تالا اعملي قهوة واعطيها لرشا حتى اضيفهم
رشا: مارح اضيف انت ضيفيهم انا بس بدخل وبسلم وبقعد خمس دقايق وبطلع
ام رشا: طيب..طيب
وفعلا دخلت رشا على غرفة الضيوف طبعا اول ما شافها طارق وقف بشكل لا ارادي وما شال عينه عنها
طارق: ما تحكوا انه هاي رشا, يالله يا ماما هاد شكلك كنت تدعيلي ليل مع نهار, بسم الله قمر لا والله القمر بينزل وبتطلعي مكانه
ام رشا: شوي عليها خجلت البنت
ام طارق: ولا شو يا ماما انا عارفة مين اختارلك
طبعا طول هاد الوقت ورشا واقفة مكانها ما اتحركت من كتر ما هي مرتبكة
وسلمت عليهم وقعدت خمس دقايق وطلعت
طارق: رشا خليكي قاعدة والله منورة ومحلية القعدة
ورشا مشيت من غير ما تتطلع عليه وطلعت من غرفة الضيوف
تيماء: شو كيف
رشا: هاد واحد قليل ادب اتخيل من اول ما شافني بلش يغازل
تالا: مع حق لا يلام هاد وانت مش مهتمة بحالك هيك صار فيه كيف لو شافك وانت توب, احكيلي كيف شكله
رشا: حلو , طويل كتافه عراض شعره اسود وهو ابيض ولابس بدلة رسمي, بس مش ستايلي بتحسيه كبير علي, صحيح هو كم عمره
تالا: 30 سنة
تيماء و رشا: شو كبير
تالا : انت وهي عمركم اسمعتوا انه في واحد بالعشرينات من عمره وبكون معه فلوس كتير ومخلص دكتوراه هاد ابن عمتك ملقب بأصغر مدير في الأردن ومن غير واسطة او شي ومعه شهادة دكتوراه في تخصص المحاسبة وبيشتغل ببنك__________
تيماء: وكمان حلو والله ياريته اتقدملي انا قلبي فاضي وبيوسعه
وضحكوا البنات وراحت رشا على غرفتها وحكت مع لؤي وضلهم طول الوقت يبكوا ولؤي يطلب منها انها تسامحه لانه ما قدر يساعدها
وتاني يوم اتصل طارق بأبو رشا وحدد موعد الخطبة وكان يوم الخميس
ام رشا: ماما رشا هلا حكى ابوكي واتفق مع طارق على انه الحفلة تكون يوم الخميس
رشا: شو مستحيل اليوم الاتنين مستحيل انلحق
ام رشا: يلا البسي خلينا ننزل على السوق حتى نشتريلك فستان
رشا: طيب ووين الحفلة رح تنعمل
ام رشا: في مزرعتهم عندهم مزرعة على طريق........
رشا: ماما والله انا تعبانة وما قادرة اكمل مشان الله الغوا الموضوع
ام رشا: انت مجنونة انت بدك تفضحينا, بسرعة البسي خلينا ننزل على السوق
ولبست وراحوا على السوق وبسرعة شافت رشا فستان لونه ذهبي ظهره مفتوح ومن قدام ستراب وبيجي قطعتين بس بيبين قطعة واحده واله فتحة طويله من قدام بس هاي الفتحة مغطية بنفس قماشة الصدر
ولبسته وطلعت متل الفراشة
وراحوا شروا السكربينة والاكسسوارات وعطر من جيفنشي وكريم باودر لون برونز وروحوا عالبيت
ولما رجعوا راحوا تيماء وتالا عالسوق حتى يشتروا فساتين للحفلة.
وراحت ام رشا وصت بيتزا واجوا البنات وكانوا شاريين فساتين بتجنن كانوا فيها متل اللعب
وقعدوا ياكلوا ويحكوا وفي هالوقت رن التلفون, ردت تالا.
تالا: رشا تلفون
رشا:مين
تالا: طارق
رشا: هاد شو اللي سمحله بيتصل احكيله اني نايمه
ام رشا: بسرعة قومي وردي على التلفون هاد هلا خطيبك ولازم تحكي معه حتى تتفقوا على الحفلة
طارق: الو
رشا: هالوو
طارق : كيفك يا قمر
رشا: منيحة
طارق : بتعرفي انا اسعد انسان في الدنيا لانه الله رزقني ببنت متلك, يالله ما مصدق انه كمان 3 ايام انه رح اخطبك رسمي, طبعا يوم الخطبة بتعزمي كل صاحباتك لأن رح نعمل حفلة كبيرة ورح يكون في مطرب و DJ ورح اضل الحفلة متأخرة ورح يكون في بوفيه مفتوح
رشا بعقلها فعلاً انك سخيف بتفكرني بنت صغرة وبدك تكسبني بشغلات سخيفة
طارق: شو رشا وينك ليه ما بتردي
رشا: بس انا هلا بدي اروح لأني كنت باكل وما غسلت
طارق: على العموم حضري حالك لانه كمان ساعة انا جايليك
رشا: ليه
طارق: حتى نشتري الشبكة
رشا: طيب بس اخليني احكي مع بابا وبردلك خبر
طارق: انا حكيت معه ووافق
رشا: اوكي, يلا باي
طارق: باي يا احلى قمر
وحكت رشا تلفون مع لؤي وحكتله شو عملت طول اليوم
رشا: لؤي يا ريت انه تكون حفلة يوم الخميس هي حفلتنا انا واياك
لؤي: يا الله لو تعرفي قديه انا مقهور ومضايق بتعرفي هاد اسمه ظلم, صحيح انا هلا بشتغل بشركة.........
رشا: واو هاي شركة كبيرة كيف قدرت تشتغل فيها
لؤي: هاي الشركة بتكون لخالة صاحبي وهو اتوسطلي عندها والحمد لله وافقوا علي
رشا: كتير ممتاز حبيبي ودير بالك على شغلك
لؤي: اليوم لما تتطلعي مع طارق كوني ناشفة معه وما تلبسي حلو
رشا: من غير ما اتوصيني هاد اللي بعمله من غير ما اخطط لا اراديا بكون ناشفة معه
حبيبي خليني اسكر حتى اهلي ما يكشفوا اني كنت بحكي معك
وقعدت رشا تحضر على الTV واجت امها وقالتلها تروح تلبس بسرعة لأنه طارق قرب يجي
وراحت رشا ولبست برمودا سوده وبلوزة بيضة مرسوم علها بالأحمر شكل تم
وزبطت شعرها وحطت ميك اب خفيف ولبست صندل اسود ويا دوب خلصت لبس ولا كان طارق واصل وسلم على ام رشا وطلعت رشا وسلم عليها وباس ايدها
رشا: فعلاً انك قليل ادب
صاروا ام رشا وطارق يضحكوا عليها
ام رشا: هاي ماما مش قلة ادب هاي من كتر الذوق
طارق: يلا يا قمر خلينا نطلع لأنه صاحبي بيستناني عنده طقومة الماس اشي خيلة
وطلعت معه بالسيارة
يتبع
11-10-2006, 05:38 PM
المواضيع المتشابهه 
العرض العادي
